Song of Solomon 6

Kamba (Mbivilia) 1956

← Chapter 5 Jump to: Chapter 7 →

1Mwendwa waku aendie kũ, We mwanakavu kũvĩtũka aka ala angĩ? Mwendwa waku ethyũũĩle va, Kana tũmũmanthe vamwe naku?

2Mwendwa wakwa atheeie mũũndanĩ wake, Ivũĩonĩ syĩ mĩtĩ ĩla ĩnyungaa nesa, Kwĩĩthĩsya mĩũndanĩ, na kũmban’ya malaa ma lili.

3Nyie nĩ wa mwendwa wakwa, na mwendwa wakwa nĩ wakwa: Eĩthya ndĩthya yake katĩ wa malaa ma lili.

4We wĩ mwanakavu, mwendwa wakwa, ta Tilisa, Wa kwendeesya ta Yelusaleme, Wa kũtĩsya ta ita syĩ na ivevelo.

5Thyũũa metho maku maikanzisye, Nũndũ nĩmeũngatha. Nzw’ĩĩ syaku nĩ ta ndĩthya ya mbũĩ, Ila itindiaa mwaĩĩonĩ wa Ngileati.

6Maeo maku nĩ ta ndĩthya ya malondu maka, Ala mambatĩtw’e kuma kũthambw’a; Kĩla yĩmwe yamo yĩ na mavatha, Na vati yĩmwe katĩ wamo yaakw’ĩthya.

7Nthia syaku itilyĩ ta kĩlungu kya ĩkũngũmanga Ungu wa suka waku mũvũthũ.

8Ve aka asumbĩ mĩongo thanthatũ, na aka ngombo mĩongo nyanya, Na eĩtu atheu matatalĩka.

9Ĩvũĩ yakwa, ũtaavukw’a wakwa, no ũmwe; No ũmwe wa inyia wake; Nowe weka mũnyuve wa ũla wamũsyaie. Eĩtu mamwona, na mamwĩta mũathimwa; Ĩĩ, aka asumbĩ na aka ngombo, na mamũtaĩa.

10Nũũ ũla ũsiasya ta kũikya, Mwanakavu ta mwei, Mũtheu ta syũa, Wa kũtĩsya ta ita syĩ na ivevelo?

11Natheea mũũndanĩ wa mĩtĩ ya mbatani, Kũsisya ũthithinĩu wa mĩkenge mwandanĩ, Kũsisya ethĩwa mũsavivũ wĩ wenze, Na mĩkũngũmanga ĩ na malaa.

12Mbee wa ndanamba kũmanya, ngoo yakwa yambĩkalya Katĩ wa makasya ma andũ makwa anene.

13Syoka, syoka, we Mũsulami; Syoka, syoka, nĩ kana tũkũsisye. Nĩkĩ mũkũmũsisya Mũsulami, Ta kũsisya mũsũngĩle wa Maanaimu?

← Chapter 5 Jump to: Chapter 7 →