Song of Solomon 4

Kamba (Mbivilia) 1956

← Chapter 3 Jump to: Chapter 5 →

1Sisya, we wĩ mwanakavu, mwendwa wakwa; sisya, we wĩ mwanakavu; Metho maku nĩ ta ma mavũĩ ungu wa suka waku mũvũthũ wa ũthyũ. Nzw’ĩĩ syaku nĩ ta ndĩthya ya mbũi. Ila itindiaa mwaĩĩonĩ wa kĩĩma kya Ngileati.

2Maeo maku matilyĩ ta ndĩthya ya malondu maka matilĩtwe maw’ĩa mĩtũkĩ, Ala mambatĩtw’e kuma kũthambw’a, Kĩla yĩmwe yamo yĩ na mavatha, Na vati yĩmwe katĩ wamo yaakw’ĩthya.

3Ilomo syaku nĩ ta ũlii mũtune mũno, Na kanyw’a waku nĩ mwanake mũno. Nthĩa syaku itilyĩ ta kĩlungu kya ĩkũngũmanga Ungu wa suka waku mũvũthũ.

4Ngingo yaku ĩtilyĩ ta mwako mũtũlu wa mũnyoolo wa Ndaviti Waakiwe nũndũ wa mĩio ya kaũ, Ũla wanĩkawa tũkalo ngili, Ngao syonthe sya ngũmbaũ.

5Nondo syaku syelĩ nĩ ta maswii elĩ Ala nĩ mavatha ma nthwaia, Ala maĩsaa katĩ wa malaa ma lili.

6Kũvika mũthenya ũusye, na myuunyĩ yalalĩle, Ngaenda kĩĩmanĩ kĩ manemane, Na kalĩmanĩ ke ũvumba.

7We wĩ mwanakavu ki, mwendwa wakwa; Na vati kalanga nthĩnĩ waku.

8Ũka tũendan’ye kuma Levanoni, mũtwawa wakwa, Wĩ nakwa kuma Levanoni: Sisya kuma mũtumbĩnĩ wa Amana, Kuma mĩtumbĩnĩ ya Senili na Elimoni, Kuma ngunganĩ sya mĩnyambũ, Kuma iĩmanĩ syĩ ngo.

9We nĩwakũmbaĩthisye ngoo yakwa, mwĩĩtu‐a‐ia, mũtwawa wakwa; We nĩwakũmbaĩthisye ngoo yakwa na yĩmwe ya metho maku, Na mũnyoo ũmwe wa ngingo yaku.

10Wendo waku ko nĩ mũseo, mwĩĩtu‐a‐ia, mũtwawa wakwa! Wendo waku ko wĩ kavaa kwĩ mbinyu! Na mũuke wa mauta maku kwĩ mĩthemba yonthe ya mĩtĩ ĩla ĩnyungaa nesa!

11Ilomo syaku, we mũtwawa wakwa, ilovotangaa ta ĩwa: Ũkĩ wa nzũkĩ na ĩia syĩ ungu wa ũĩmĩ waku; Na mũuke wa ngũa syaku ũilyĩ ta mũuke wa Levanoni.

12Mũũnda mwiie nĩ mwĩĩtu‐a‐ia, mũtwawa wakwa; Mbuluti mbiie, nthongo nziĩle.

13Mathongooo maku nĩ mũũnda wa makũngamanga, wĩ ũsyao wĩ vata mũno; Mũena vamwe na mĩkenge ya mĩtĩ ĩla ĩseũvw’a manukato,

14Manukato na manzano, Ithua na mũtalasini, na mĩtĩ yonthe ya ũvumba; Manemane na uuti, na mĩtĩ yonthe mĩseo ĩla ĩnyungaa nesa.

15We wĩ nthongo ya mĩũnda, Kĩthima kya manzĩ ma thayũ, Na tũlũsĩ tũvĩtĩtye manzĩ kuma Levanoni.

16Amũka, we kĩseve kya ngalĩ ya ĩũlũ; na ũkyũka we kya ngalĩ ya ĩtheo; Uutanĩai mũũnda wakwa, nĩ kana mĩtĩ ĩla ĩnyungaa nesa ĩtaavũke. Mwendwa wakwa nĩoke mũũndanĩ wake, Na kũya matunda make me vata mũno.

← Chapter 3 Jump to: Chapter 5 →