Song of Solomon 3

Kamba (Mbivilia) 1956

← Chapter 2 Jump to: Chapter 4 →

1Ũtukũ nĩ ũkomonĩ wakwa Nĩmũmanthie ũla ngoo yakwa yendete: Nĩmũmanthie, ĩndĩ ndinamwona.

2Nasya, nĩngũkĩla yu, na ngĩthi ngangange ndũanĩ; Nzĩanĩ nene na nzĩanĩ mbaamu Ngamũmantha ũla ngoo yakwa yendete: Namũmantha, ĩndĩ ndinamwona.

3Asyaĩĩsya ala mangangaa ndũanĩ mambona; Kwa asu nameie, Nĩmwamwona ũla ngoo yakwa yendete?

4Kwaĩ o kavinda kanini namatia, Yĩla namwonie ũla ngoo yakwa yendete: Namũkwatie, na ndyaamũeka athi, Kũvika namũete nyũmbanĩ ya inyia wakwa, Na kasũmbanĩ ka ũla wangitavie.

5Nĩngũmũavĩthya, inyw’ĩ eĩtu ma Yelusaleme, Na nthwaia nga kana ndaatai nga sya kĩthekanĩ, Kana mũikamũthũlũmũe, kana kũmũamũkya mwendwa wakwa, Kũvika endeew’a.

6Ũũ nũũ ũla wambatĩte kuma weũnĩ Ta ituĩ sya syũki, Anyungĩthĩtw’e nĩ manemane na ũvumba, Na mĩtĩ yonthe ya mũthoosya ĩla ĩnyungaa nesa?

7Sisya, nĩ mũsekeseke wa Solomoni; Andũ mĩongo thanthatũ ngũmbaũ moothyũlũlũkĩte, Ma andũ ngũmbaũ sya Isilaeli.

8Onthe nĩ akwati ma ũvyũ, na nĩ ai kaũnĩ: Kĩla mũndũ e na ũvyũ wake kĩnyunyunĩ kyake, Nũndũ wa w’ĩa ũtukũ.

9Mũsumbĩ Solomoni eeseũvĩsya ĩsela ya kĩũsumbĩ Ya mũtĩ wa Levanoni.

10Aseũvĩsya itũĩ syayo sya vetha, Ĩtina yayo ya thaavu, na wikalo wayo wa ngũa ĩtilyĩ ndune, Nthĩnĩ wayo vanakavĩtw’e na wendo, Waumĩte eĩtunĩ ma Yelusaleme.

11Umaalai, inyw’ĩ eĩtu ma Saioni, na mũkyona mũsumbĩ Solomoni, E na ngovia ya ũsumbĩ ĩla inyia wake wamwĩkĩie Mũthenya wa kũtwaana kwake, Na mũthenya wa ũtanu wa ngoo yake.

← Chapter 2 Jump to: Chapter 4 →