Song of Solomon 2

Kamba (Mbivilia) 1956

← Chapter 1 Jump to: Chapter 3 →

1Nyie nĩ ĩlaa ya lose ya Saloni, Ĩlaa ya lili ya myandanĩ.

2Ta ĩlaa ya lili katĩ wa mĩw’a, Now’o mwendwa wakwa ũilyĩ katĩ wa eĩtu.

3O tondũ mũtĩ wa mũevo ũtilyĩ katĩ wa mĩtĩ ya kĩthekanĩ, Now’o mwendwa wakwa ũilyĩ katĩ wa ana aũme. Nĩnekalile nthĩ ĩtheo wa muunyĩ wake nĩ na mũyo mũnene, Na matunda make maĩ mũyo mũsamonĩ wakwa.

4Andetie nyũmbanĩ ya mboka, Na kĩvevelo kyake ĩũlũ wakwa kyaĩ kya wendo.

5Mbĩkĩai vinya na tũkũmbwa twa nzavivũ mbovu, mbuũkyai na ũsyao wa mũevo; Nũndũ nĩwaĩtw’e nĩ wendo.

6Kw’oko kwake kwa aka kwĩ ungu wa mũtwe wakwa, Na kw’oko kwake kwa aũme nĩkwĩmbĩtĩĩsye.

7Nĩngũmũavĩthya inyw’ĩ, eĩtu ma Yelusaleme, Na nthwaia nga, kana na ndaatai nga sya kĩthekanĩ, Mũtikamũthũlũmũe, kana ũmũamũkya mwendwa wakwa, Kũvika endeew’a.

8Wasya wa mwendwa wakwa! Sisya, nĩwũkĩte, Akĩtũlĩlanga ĩũlũ wa iĩma, Kũthakathaka ĩũlũ wa tũlĩma.

9Mwendwa wakwa atilyĩ ta nthwaia nga kana ndaatai nzamba ya mũika: Sisya, aũngamĩte ngalĩ ĩya ya wako witũ; Aisyaĩlya nthĩnĩ mbũthinĩ; Atemethelya metho mĩtĩnĩ mĩkelangan’ye.

10Mwendwa wakwa nĩwaneenie, na ambĩa, Ũkĩla, mwendwa wakwa, mbanake yakwa, na kwĩendea.

11Nũndũ, sisya, ĩvinda ya mbevo nĩ ĩvĩtu; Mbua nĩ mbĩtu na ĩkathi;

12Malaa nĩ moneku ĩũlũ wa nthĩ; Ĩvinda ya kwina ya nyũnyi nĩ yũku, Na wasya wa ndumbũ nũkwĩw’ĩka nthĩ yaitũ;

13Mũkũyũ nĩwĩw’ĩte makũyũ maw’o methĩ, Na mĩsavivũ nĩ mĩlaũku; Nĩyataavũkĩte mĩuke yayo mĩseo. Ũkĩla, mwendwa wakwa, mbanake yakwa, na kwĩendea.

14We ĩvũĩ yakwa, wĩ mĩvatĩnĩ ya ivĩsĩ, Wĩvithonĩ wĩ kĩvaũũkonĩ, Eka nzisye ũthyũ waku, Eka nĩw’e wasya waku; Nũndũ wasya waku wĩ mũyo, na ũthyũ waku nĩ mwanake.

15Tũkwate mbĩwa, mbĩwa ila nini, Ila syanangaa mĩũnda ya mĩsavivũ; Nũndũ mĩũnda yaitũ ya mĩsavivũ nĩ mĩlaũku.

16Mwendwa wakwa nĩ wakwa, nakwa nĩ wake: Eĩthya ndĩthya yake ya mbũi na malondu katĩ wa malaa ma lili.

17Kũvika syũa yausya, na myuunyĩ yalalĩla, Ĩthyũũe, mwendwa wakwa, na ĩthĩwa ta nthwaia nga kana ndaatai nzamba ya mũika Ĩũlũ wa iĩma sya Mbetheli.

← Chapter 1 Jump to: Chapter 3 →