Song of Solomon 8

Kamba (Mbivilia) 1956

← Chapter 7 Jump to:

1A! Kethĩwa wĩthĩwa ta mwana‐a‐ia, Ũla wongie nondo sya mwaitũ! Yĩla nesa ũkũwĩla ũtee, ngakũmumunya; Ĩĩ, na kũti ũmwe wĩmbũthya.

2Nĩthĩwa ngũtongoesya, na ũkũete nyũmbanĩ ya mwaitũ, Ũla wĩmanyĩsya; Nĩthĩwa ngũnyw’ĩthya mbinyu yĩ mũuke mũseo, Ya ngoyoo ya makũngũmanga makwa.

3Kw’oko kwake kwa aka kwĩthĩwa ungu wa mũtwe wakwa, Na kw’oko kwake kwa aũme kwĩmbĩtĩĩsya.

4Nĩngũmwĩavĩthya, inyw’ĩ eĩtu ma Yelusaleme, Kana mũtikathũlũmũe, kana kũmũamũkya mwendwa wakwa, Kũvika endeew’a.

5Nũũ ũũ wambatĩte kuma weũnĩ, Eyaĩĩsye mwendwa wake? Ĩtina wa mũtĩ wa mũevo nĩnakũamũkisye: Vau nĩvo inyia waku wakwaũnyie, Vau nĩvo waũnyĩe ũla wakũsyaie.

6Mbĩkĩa ta ũsiĩlũ ĩũlũ wa ngoo yaku, Ta ũsiĩlo ĩũlũ wa kw’oko kwaku: Nũndũ wendo wĩ vinya ta kĩkw’ũ; Kĩwĩu nĩ kyai ta Seoli; Itw’ĩki syakyo nĩ itw’ĩki sya mwaki, O kĩtw’ĩki ki kya mwaki wa Yeova.

7Manzĩ maingĩ matitonya kũvosya wendo, O na kĩw’ũ kingĩ ki kũũthika: Ethĩwa mũndũ nũnengane syĩndũ syonthe sya nyũmba yake nũndũ wa wendo, Akavũthw’a vyũ.

8Twĩ na mwĩĩtu‐a‐ia mũnini, Na nde nondo: Tũkeka ata ũndũ wa mwĩĩtu‐u‐ia Mũthenya ũla ũkevaw’a?

9Kethĩwa nĩ ũvai, Tũmwakĩĩa nthongole ya vetha: Na kethĩwa nĩ mũomo, Tũkamwiiĩa na mbwaũ sya mĩkũũ.

10Nyie nĩ ũvai, na nondo syakwa nĩ ta myako mĩtũlu ya mĩnyoolo yaw’o: Na ĩndĩ methonĩ make naĩ ta ũmwe ũla wonie mũuo.

11Solomoni aĩ na mũũnda wa mĩsavivũ ku Mbaali‐amoni; Atiĩa mũũnda wa mũsavivũ asũvĩi; Kĩla ũmwe ũndũ wa ũsyao waw’o aĩ wa kũete ilungu sya vetha ngili.

12Mũũnda wakwa wa mĩsavivũ, ũla wakwa, wĩ mbee wakwa: We, o we Solomoni, ũkeethĩwa na i ngili, Na ala masũvĩaa ũsyao waw’o makeethĩwa na maana elĩ.

13We ũla ũtũaa mĩũndanĩ, Atindan’ya mĩmethukĩĩasya mew’e wasya waku: Tuma nakwa nĩwĩw’a.

14Ĩkalaate, mwendwa wakwa, Na ĩthĩwa ta nthwaia nga kana ta ĩswii ya ndaatai Ĩũlũ wa iĩma syĩ mĩtĩ ĩla ĩnyungaa nesa.

← Chapter 7 Jump to: