Song of Solomon 5

Kamba (Mbivilia) 1956

← Chapter 4 Jump to: Chapter 6 →

1Nĩnooka mũũndanĩ wakwa, mwĩĩtu‐a‐ia, mũtwawa wakwa: Nĩnoomban’ya manemane makwa na mĩtĩ yakwa inyungaa nesa; Nĩnaĩsanĩsya ĩwa yakwa na ũkĩ wakwa wa nzũkĩ; Na nanyw’a mbinyu yakwa na ĩia yakwa. Yai, inyw’ĩ anyanyawa; Nyw’a, ĩĩ, nyw’a mũno, mwendwa wakwa.

2Nĩĩ nĩnakoma, ĩndĩ ngoo yakwa nĩyĩĩamũkĩte: Nĩ wasya wa mwendwa wakwa ũla ũvingũasya, akyasya, Mbingũĩa, mwĩĩtu‐a‐ia, mwendwa wakwa, ĩvũĩ yakwa, ũtaavukw’a wakwa, Nũndũ mũtwe wakwa nĩusũĩte ĩmwe, O na nzw’ĩĩ syakwa mavoloto ma ũtukũ.

3Nĩnumĩtye ngũa yakwa; nĩmĩkĩa ata? Nĩthambĩtye maũũ makwa; nĩmavukya ata?

4Mwendwa wakwa ekĩie kw’oko kwake ĩimanĩ ya mũomo, Na ngoo yakwa nĩyakusĩkie nũndũ wake.

5Nokĩlile kũvingũĩa mwendwa wakwa; Na moko makwa malovotangasya manemane, Na syaa syakwa manemane matweku, Ĩũlũ wa ikwati sya kĩvingi.

6Navingũĩa mwendwa wakwa; Ĩndĩ mwendwa wakwa aĩ aneetulũla, na akathi. Ngoo yakwa nĩyanthelele yĩla waneenie: Nĩnamũmanthie, ĩndĩ ndyaatonya kũmwona; Namwĩta, ĩndĩ ndaanzũngĩa.

7Asyaĩĩsya ala mangangaa ndũanĩ mambona, Mangũna, mambũkite; Asũvĩi ma maũvai mambuta suka wakwa.

8Nĩngũmũavĩthya, eĩtu ma Yelusaleme, Ethĩwa mũkoona mwendwa wakwa, Kana mwĩmwĩa, atĩ nĩnĩwaĩtw’e nĩ wendo.

9Mwendwa waku nũvĩtũkĩte ũngĩ wendawa ata, We ũla wĩ mwanakavu kũvĩtũka aka ala angĩ? Mwendwa waku nũvĩtũkĩte ũngĩ wendawa ata, Kana ũtũavĩthye ta ũu?

10Mwendwa wakwa nĩ mweũ na mũtune, Mũnene mbee katĩ wa ngili ĩkũmi.

11Mũtwe wake nĩ ta thaavu ũla mũseo mbee; Nzw’ĩĩ syake nĩ mbingĩ, na nziũ ta ngũngũũ.

12Metho make matilyĩ ta ma mavũĩ me ũtee wa tũlũsĩ, Mathambĩtw’e na ĩia, na kwiwa nesa.

13Matau make nĩ ta ĩvuĩo syĩ mĩtĩ ĩnyungaa nesa, Ta mĩthaĩĩo yĩ nyũnyi syĩ mũyo: Ilomo syake nĩ ta malaa ma lili, inyũlũlũkasya manemane matweku.

14Moko make nĩ ta ngome sya thaavu syĩ na tũvila twa nzumalati ntheu tũlũmanĩtw’e iĩndĩnĩ syatw’o: Mwĩĩ wake nĩ ta maeo ma nzou manakavĩtw’e na tũvila twa savili.

15Maũũ make nĩ ta ituĩ sya mavia maseo, me iĩndĩnĩ sya thaavu mũseo: Ũmbe wake ũtilyĩ Levanoni, mũseo mũno ta mĩkũũ.

16Kanyw’a wake wĩ mũyo mũnene; Ĩĩ, nĩ mwanake ki. Ũũ nĩ mwendwa wakwa, na ũũ nĩ mũnyanyawa, Inyw’ĩ eĩtu ma Yelusaleme.

← Chapter 4 Jump to: Chapter 6 →