Song of Solomon 7

Kamba (Mbivilia) 1956

← Chapter 6 Jump to: Chapter 8 →

1A! Ũndũ maseũvĩte maũũ maku me iatũnĩ, we mwĩĩtu wa mũnene wĩ mbee ũsumbĩnĩ! Matako maku nĩ mavilingĩku ta tũvila twĩ thooa mũnene, Wĩa wa moko ma ndũĩka.

2Mwĩĩ waku nĩ ta kĩkombe kĩvilingĩku, Kĩla nthĩnĩ wakyo mbinyu mbulan’ye ĩtanyivaa: Ĩvu yaku nĩ ta kĩvumbu kya nganũ Kĩthyũlũlũkĩtw’e na malaa ma lili.

3Nondo syaku ilĩ itilyĩ ta maswii elĩ Mavatha ma nthwaia.

4Ngingo yaku nĩ ta mwako mũtũlu wa mũnyoolo wa maeo ma nzou; Metho maku nĩ ta ndia ila syĩ Esivoni, Ũtee wa mbingĩlo ya Mbathi‐lavimi; Ĩnyiũũ yaku nĩ ta mwako mũtũlu wa mũnyoolo wa Levanoni Ũla welekele Ndamasiku.

5Mũtwe waku nĩ ta kĩĩma kya Kalimeli, Na nzw’ĩĩ sya mũtwe waku itilyĩ ta ndune; Mũsumbĩ nũlũmĩtwe e mũtave mũvĩndĩlenĩ wasyo.

6A! Ũndũ wanakavĩte na kwendeesya, Mwendwa, kwondũ wa kũtanĩthya!

7Kĩũngamo kyaku nĩ ta kya mũtĩ wa mũtende, Na nondo syaku ta itũngo syaw’o.

8Nasya, nĩngũlĩsa mũtĩ wa mũtende, Nĩngwĩkwatĩla mbonge syaw’o: Nondo syaku nĩsyĩthĩwe ta itũngo sya mũsavivũ, Na mũuke wa mĩthũmũ yaku ta wa ũsyao wa mũtĩ wa mũevo,

9Na kanyw’a waku ta mbinyu ĩla nzeo mbee, Ĩla ĩmelekaa nesa kwondũ wa mwendwa wakwa, Ĩvĩtĩlaa mbola ilomonĩ sya ala makomete.

10Nĩ wa mwendwa wakwa; Na kwenda kwake nĩkũmbelekele.

11Ũka, mwendwa wakwa, tumaale mũũndanĩ; Tũkomele tũmĩsyĩ.

12Twambate kĩoko tene mĩũndanĩ ya mĩsavivũ; Tũsisye ethĩwa mũsavivũ wĩ wenze, Na malaa maw’o nĩ malaũku, Na mĩkũngũmanga ĩ malaa: Vau ngakũnengea wendo wakwa.

13Matunda ma kwendana mataavũkasya mũuke mũseo; Na mĩomonĩ yaitũ ve mĩthemba yonthe ya matunda me vata mũno ala meũ na ala ma tene, Ala nakwiĩe, we mwendwa wakwa.

← Chapter 6 Jump to: Chapter 8 →