2 Chronicles 28

Kamba (MBIVILIA ŨVOO MŨSEO)

← Chapter 27 Jump to: Chapter 29 →

1Aasu atw'ĩkie mũsumbĩ e na ũkũũ wa myaka mĩongo ĩlĩ. Asumbĩkie vandũ va myaka ĩkũmi na thanthatũ e Yelũsalemu. Nĩwavĩtĩisye Mwĩai Ngai, na ndaatĩĩa ngelekany'o nzeo ya Ndeviti ũmae wake.

2Nĩwaatĩĩie ngelekany'o nthũku ya asumbĩ ma Ĩsilaeli. O na nĩwaseũvisye mĩvw'anano ya ngai ĩla yĩtawa Mbaali aitũmĩa kyũma kĩtwekethye.

3Nĩwavĩvĩisye ũvani Mwandanĩ wa Mbeni-inomu na athemba ana make methĩwe nthembo ya kũvĩvw'a, aatĩĩe ngelekany'o ya maũndũ mathũku ala meekawa nĩ andũ ma nthĩ ingĩ, ala Mwĩai Ngai walũngilye mauma nthĩ ya Kanaani, yĩla andũ ma Ĩsilaeli maendee kũmĩlika.

4Aasu nĩwaumĩasya nthembo na kũvĩvĩsya ũvani kũndũnĩ kũla andũ mathaithĩaa iĩmanĩ ĩũlũ, tũlĩmanĩ, na ungu wa kĩla mũtĩ wĩ matũ maingĩ.

5Nũndũ wa naĩ ĩla Mũsumbĩ Aasu weekie, Mwĩai Ngai, Ngai wake nĩwatumie mũsumbĩ wa Silia amũsinda, na atava andũ aingĩ mũno ma Yuta amatwaa Ndamasikũ me ove. O ta ũu Mwĩai Ngai nĩwatumie mũsumbĩ wa Ĩsilaeli asinda Aasu na ooaa asikalĩ aingĩ mũno.

6Mũthenyanĩ o ũmwe, Veka mwana wa Lemalia ooaie asikalĩ ngũmbaũ ngili ĩana na mĩongo ĩlĩ ma Yuta. Ũu weekĩkie nũndũ andũ ma Yuta nĩmaleete kũatĩĩa Mwĩai Ngai, Ngai wa aaũmae moo.

7Nzikili mũsikalĩ ũmwe ngũmbaũ kuma Evalaimu, nĩwooaie Maaseia mwana wa mũsumbĩ, ooaa Asilikamu ũla waũngamĩe nyũmba ya kĩ-ũsumbĩ, na o ta ũu ooaa Elikana ũla nĩwe waĩ mũnini wa mũsumbĩ.

8Asikalĩ ma Ĩsilaeli matavie kuma kwa ana-a-ĩthe moo ma Yuta andũ ngili maana elĩ, ala maĩ vamwe na iveti, anake na eĩtu. Nĩmamatwaie Samalia me vamwe na syĩndũ ingĩ mbingĩ ila matavĩte.

9Mwathani ũmwe wa Mwĩai Ngai weetawa Oteti na waĩ Samalia, nĩwathaũie asikalĩ ma Ĩsilaeli ala mookie Samalia. Nĩwaneenie namo amea atĩĩ, “Mwĩai Ngai, Ngai wa aaũmae menyu nũnathatiw'e nĩ andũ ma Yuta, na nĩkyo kĩnatumie mũmasinda, ĩndĩ inyw'ĩ mũmoaie na ũthatu mwingĩ, na ũndũ ũsu wamũvikĩa Mwĩai Ngai.

10Yu mwĩenda kũtw'ĩkĩthya aũme na aka ma Yuta na Yelũsalemu ngombo syenyu. Nĩmũkũlya inyw'ĩ nomwĩsĩ kana nĩmũmũvĩtĩsye Mwĩai Ngai, Ngai wenyu?

11Mbĩthukĩĩsyei yu, na mũitũnga ana-a-ĩthe na eĩtu-a-inyia menyu kũla mũmaumisye, nũndũ Mwĩai Ngai nũthatĩtw'e ninyw'ĩ.”

12Nĩvo ĩndĩ amwe ma atongoi ma mbaĩ ya Evalaimu, namo nĩ Asalia mwana wa Yoanani, Mbelekia mwana wa Mesilemothi, Yeisikia mwana wa Salumu na Amasa mwana wa Aatilai maleanile na meko ma asikalĩ asu maumĩte kaũnĩ.

13Atongoi asu nĩmeeie asikalĩ atĩĩ, “Mũikaete andũ asu mũtavĩte vaa! Nĩtũminĩte kũvĩtĩsya Mwĩai Ngai na tũkatuma athata ũkethĩa no atũkany'e. Yu mwĩenda kwĩka ũndũ ũsu wongeleele ĩvĩtyo yitũ?”

14Asikalĩ asu nĩmatiĩie atongoi asu na andũ onthe ma Ĩsilaeli andũ ma Yuta ala matavĩte, o vamwe na syĩndũ ila ingĩ matavĩte.

15Nĩvo ĩndĩ ala atongoi ana ma mbaĩ ya Evalaimu manengie andũ asu matavĩtwe ngũa kuma syĩndũnĩ ila syatavĩtwe. Nĩmamanengie ngũa na iatũ meekĩa, na o ta ũu mamanenga lĩu na kya ũnyw'a na mametĩkĩsya mauta kũla maũmĩĩte. Ala mataĩ na vinya ũkethĩa maitonya kũthi nĩmalĩsilw'e mang'oinĩ na onthe ala maĩ atave matũngwa nthĩ yoo ya Yuta ndũanĩ ya mĩkĩndũ ĩla yĩtawa Yeliko. Nĩvo ĩndĩ andũ ma Ĩsilaeli menũkie ndũanĩ ya Samalia.

16Ĩvindanĩ yĩu, Mũsumbĩ Aasu nĩwatũmanie kũla kwĩ mũsumbĩ wa Asuli ayenda amũtetheesye.

17Aetomu maĩ manooka ĩngĩ, makavithũkĩa Yuta, na makatava andũ makathi namo.

18Namo Avilisiti nĩmavithũkĩĩte ndũa sya Yuta ila syaĩ nguumo wa iĩma ngalĩko ya ũthũĩlonĩ wa syũa, na ila syaĩ ngalĩko ya ĩtheo ya Yuta ĩla yĩtawa Nengevu. Nĩmakwatĩte ndũa ya Mbethi-semesi, ya Aiyaloni na ya Ngetelothi. O ta ũu nĩmakwatĩte ndũa ya Soko, Timina na Ngimiso. Makwatĩte ndũa isu vamwe na motũi ala maithyũlũlũkĩte, na makatũa vo.

19Mwĩai Ngai aetie mathĩna nthĩ ya Yuta, nũndũ Mũsumbĩ Aasu wa Yuta nĩwatumĩte andũ ma nthĩ ĩsu meka maũndũ mathũku, na akethĩwa ate mũĩkĩĩku kwa Mwĩai Ngai.

20Yĩla Mũsumbĩ Tikilathi-vileseli wa Asuli wookie, vandũ va kũtetheesya Aasu nĩwamũeteie mathĩna.

21Aasu nĩwoosie syĩndũ sya thooa mũnene kuma Ĩkalũnĩ, nyũmbanĩ ya kĩ-ũsumbĩ na kuma nyũmbanĩ sya atongoi, na ainenga mũsumbĩ wa Asuli syĩthĩwe koti, ĩndĩ o na ũndũ ũsu ndwaamũtethya.

22Ĩvindanĩ yĩla Mũsumbĩ Aasu waĩ na mathĩna, nĩwaendeeie kwĩthĩwa ate mũĩkĩĩku kũla kwĩ Mwĩai Ngai.

23Nĩwaumĩisye ngai sya andũ ma Ndamasikũ nthembo, ala mamũsindie. Nĩwasũanĩie ayasya, “Nũndũ ngai sya Asumbĩ ma Silia nimatetheeisye, nĩngũithembea nĩ kana indetheesye.” Ũndũ ũsu nĩwatumie Aasu na andũ ma nthĩ yake maminwa.

24O ta ũu Aasu nĩwoombanisye mĩio yonthe ĩla yaĩ Ĩkalũnĩ na amĩtilanga ilungu. Nĩwavingie mĩomo ya Ĩkalũ na aaka ithembeo kĩla vandũ ndũanĩ ya Yelũsalemu.

25Nthĩnĩ wa kĩla ndũa ya Yuta, Aasu nĩwaakie kũndũ kwa kũthaithĩa nĩ kana athembeae ngai ingĩ kw'o, na ũndũ ũsu wathatya Mwĩai Ngai, Ngai wa aaũmae make.

26Maũndũ ala angĩ onthe Aasu weekie yĩla wasumbĩkĩte, vamwe na mwĩkalo wake, kuma wa mbee nginya wa mũthya, maandĩkĩtwe Ĩvukunĩ ya Asumbĩ ma Yuta na ma Ĩsilaeli.

27Aasu nĩwakwie na athikwa ndũanĩ ya Yelũsalemu, ĩndĩ ndaathikwa mbũanĩ ila syathikawa asumbĩ ma Ĩsilaeli. Esekia mwana wake nĩwatw'ĩkie mũsumbĩ ĩtina wake.

← Chapter 27 Jump to: Chapter 29 →