2 Chronicles 29

Kamba (MBIVILIA ŨVOO MŨSEO)

← Chapter 28 Jump to: Chapter 30 →

1Esekia atw'ĩkie mũsumbĩ e na ũkũũ wa myaka mĩongo ĩlĩ na ĩtano. Asumbĩkie vandũ va myaka mĩongo ĩlĩ na kenda e Yelũsalemu. Inyia wake eetawa Aviya mwĩĩtu wa Nzekalia.

2Nĩweekaa maũndũ ala mamwendeeasya Mwĩai Ngai, o tondũ ũmae wake Ndeviti weekaa.

3Mweinĩ wa mbee wa mwaka wa mbee wa kũsumbĩka kwake, Esekia nĩwavingũie mĩomo ya Ĩkalũ ya Mwĩai Ngai na amĩseũvya.

4Nĩwoombanĩisye athembi na Alivai kĩwanzanĩ kya Ĩkalũ, kĩla kĩ ngalĩko ya wumĩlonĩ wa syũa,

5na aneena namo amea atĩĩ, “Mbĩthukĩĩsyei inyw'ĩ Alivai! Ĩthesyei yu na mũithesya Ĩkalũ ya Mwĩai Ngai, Ngai wa aaũmae menyu. Vetangai kĩko kyonthe kĩla kĩ Ĩkalũnĩ.

6Aaũmae maitũ mayaĩ aĩkĩĩku kũla kwĩ Mwĩai Ngai, Ngai waitũ, na nĩmeekie maũndũ ala matamwendeeasya. Nĩmamũtiie na malea wĩkalo wake.

7O ta ũu nĩmavingie mĩomo ya Ĩkalũ na mavosya taa. Mayaavĩvya ũvani kana kũthembea Ngai wa Ĩsilaeli nthembo sya kũvĩvw'a Ĩkalũnĩ.

8Nũndũ wa ũu Mwĩai Ngai nĩwathatiw'e nĩ andũ ma Yuta na ma Yelũsalemu; nũmekĩte maũndũ ma kũkĩwa mũno, ma kũtelemya, na ma kũtuma mavũthw'a, o tondũ mwonete.

9Kĩu nĩkyo kyatumie aaũmae maitũ moaĩwa kaũnĩ, na ana na eĩtu maitũ na iveti sitũ makwatwa na kũtwawa me ove.

10Yu nĩenda kũseũvya ũtianĩo na Mwĩai Ngai, Ngai wa Ĩsilaeli, nĩ kana aeke kũtũthatĩa.

11Ana makwa, yu mũikalee kũtethya wĩa, nĩkwĩthĩwa Mwĩai Ngai nũmũnyuvĩte mũũngamae mbee wake na kũmũthũkũma, mũtongoeasye andũ kũmũthaitha na mũimũvĩvĩsya ũvani.”

12Nĩvo ĩndĩ Alivai aya mambĩĩie kũthũkũma: Maathu mwana wa Amasai na Yoeli mwana wa Asalia kuma mũsyĩ wa Koathi. Kisi mwana wa Avati na Asalia mwana wa Yealeleli kuma mũsyĩ wa Melali. Yoa mwana wa Nzima na Eteni mwana wa Yoa kuma mũsyĩ wa Ngelisoni.

13Simili na Yeueli kuma mũsyĩ wa Elisavani, Nzekalia na Matania kuma mũsyĩ wa Asavu.

14Yeueli na Simei kuma mũsyĩ wa Emani, Semaia na Usieli kuma mũsyĩ wa Yetuthuni.

15Aũme asu nĩmoombanisye Alivai ala angĩ na onthe meethesya, na ĩndĩ malika mambĩĩa kũthesya Ĩkalũ kwĩanana na ũndũ meeaĩĩtwe nĩ mũsumbĩ, o tondũ Mwĩai Ngai weeaĩte.

16Athembi nĩmalikile Ĩkalũnĩ nthĩnĩ mayĩthesye, na maumaalya kĩwanzanĩ kĩla kĩ nza wa Ĩkalũ syĩndũ syonthe ila itaĩ ntheu. Kuma vau Alivai nĩmaikuie syonthe maitwaa nza wa ndũa kalũsĩnĩ ka Kĩtilonĩ.

17Mambĩĩie wĩa wa kũthesya mũthenyanĩ wa mbee wa mwei wa mbee, na mũthenyanĩ wa nyanya wa mwei ũsu mavika valandanĩ wa Ĩkalũ. Nĩvo ĩndĩ mathũkũmie mĩthenya ĩngĩ nyanya, nginya mũthenyanĩ wa ĩkũmi na thanthatũ wa mwei, na kwoou mathesya Ĩkalũ ya Mwĩai Ngai.

18Nĩvo ĩndĩ Alivai maendie kũla kwĩ Mũsumbĩ Esekia na mamwĩa atĩĩ, “Nĩtũtheisye Ĩkalũ yonthe, kĩthembeo kya nthembo ya kũvĩvw'a na syĩndũ syakyo syonthe, na mesa ya kwia mĩkate ĩthembeetwe Ngai, vamwe na syĩndũ syayo syonthe.

19O ta ũu nĩtũtũngie syĩndũ syonthe ila Mũsumbĩ Aasu wavetangie, ĩvindanĩ yĩla ũtaĩ mũĩkĩĩku kũla kwĩ Ngai, na nĩtũivathie ĩngĩ syĩthĩwe syĩ ntheu. Syonthe yu syĩ mbee wa kĩthembeo kya Mwĩai Ngai.”

20Ũnĩ ũsu kwakya tene Mũsumbĩ Esekia nĩwoombanisye atongoi onthe ma ndũa, na mambata Ĩkalũnĩ ya Mwĩai Ngai.

21Nĩmaetie nzaũ mũonza, ndũũme mũonza, tũtena mũonza tũũme twa malondu, na tũtena mũonza tũũme twa mbũi syĩthĩwe nthembo kwondũ wa ũekeo wa naĩ kwondũ wa andũ ma mũsyĩ wa kĩ-ũsumbĩ, kwondũ wa Ĩkalũ, na kwondũ wa andũ ma Yuta. Mũsumbĩ nĩweeaĩie athembi ala nĩ nzyawa sya Alũni, mathembee nyamũ isu kĩthembeonĩ kya Mwĩai Ngai.

22Kwoou nĩmathĩnzie nzaũ, na athembi moosa nthakame yasyo maminzangĩsya kĩthembeo. Nĩmasyokie mathĩnza ndũũme na maminzangĩsya nthakame yasyo kĩthembeonĩ. Mamina ũu nĩmathĩnzie tũtena twa malondu, na maminzangĩsya nthakame yatw'o kĩthembeonĩ.

23Nthenge sya nthembo kwondũ wa ũekeo wa naĩ nĩsyatwaiwe mbee wa mũsumbĩ na andũ onthe, na masilĩĩla moko moo.

24Athembi nĩmathĩnzie nthenge isu na maumya nthakame yasyo kĩthembeonĩ, yĩthĩwe nthembo ya kũvetea andũ onthe naĩ, nĩkwĩthĩwa mũsumbĩ nĩweeaĩte nĩ kana nthembo sya kũvĩvw'a na nthembo kwondũ wa ũekeo wa naĩ, ithembwe kwondũ wa andũ onthe ma Ĩsilaeli.

25Mũsumbĩ nĩwaatĩĩie ũndũ Mwĩai Ngai weeaĩĩte Mũsumbĩ Ndeviti kwĩsĩla vala ve Ngati, ũla waĩ mwathani wa mũsumbĩ, na kwĩsĩla vala ve mwathani Nathani. Nĩwaiie Alivai Ĩkalũnĩ, me na tũmasaya, ngitaa nene na ngitaa nini.

26Kwoou Alivai nĩmaũngamie meyũmbanĩtye me na syĩndũ sya mbathi iilyĩ ila syaĩ sya Ndeviti, namo athembi maũngama vau makwete masoo.

27Nĩvo ĩndĩ Esekia weeaie nĩ kana nthembo ya kũvĩvw'a ĩthembewe kĩthembeonĩ. Yĩla nthembo ĩsu yambĩĩie kũvĩvw'a, andũ nĩmambĩĩie kwinĩa Mwĩai Ngai mavuvĩte masoo na makũnĩte syĩndũ sya mbathi iilyĩ ila syaĩ sya Ndeviti mũsumbĩ wa Ĩsilaeli.

28Andũ onthe nĩmakumanie mathaithe, namo aini nĩmainie, na masoo mavuvwa. Maũndũ asu nĩmaendeeie nginya nthembo ya kũvĩvw'a yavya vyũ.

29Yĩla nthembo yavĩe yathela, mũsumbĩ na andũ onthe ala maĩ vamwe nake nĩmakumanie na mathaitha.

30Mũsumbĩ na anini make nĩmeeie Alivai mainĩe Mwĩai Ngai mbathi sya kũtaĩa, ila syaandĩkiwe nĩ Ndeviti na mwathani Asavu. Kwoou andũ onthe nĩmainĩie Mwĩai Ngai mena ũtanu mũnene na mamũthaitha.

31Nĩvo ĩndĩ Esekia weeie andũ atĩĩ, “Yu nĩmweethĩwa mwĩ atheu kũla kwĩ Mwĩai Ngai; thengeeai na kũete nthembo, na nthembo sya kũtũnga mũvea Ĩkalũnĩ ya Mwĩai Ngai.” Kwoou andũ onthe nĩmaetie nthembo na nthembo sya kũtũnga mũvea, na onthe ala mendaa nĩmaetie nthembo sya kũvĩvw'a.

32Ũtalo wa nthembo sya kũvĩvw'a ila andũ maetie waĩ nzaũ mĩongo mũonza, ndũũme ĩana na tũtena twa malondu maana elĩ. Isu syonthe syaĩ nthembo ya kũvĩvw'a ya Mwĩai Ngai.

33Nyamũ ila syavathiwe ta nthembo, syaĩ nzaũ maana thanthatũ na mbũi na malondu ngili itatũ.

34Ĩndĩ athembi maĩ anini mũno ũkethĩa maitonya kũthĩnza nyamũ syonthe sya nthembo ya kũvĩvw'a. Kwoou ana-a-ĩthe moo Alivai nĩmamatetheeisye nginya wĩa w'onthe wathela, na nginya athembi angĩ meethesya, nĩkwĩthĩwa Alivai nĩmeethĩawa meyũmbanĩtye kwĩthesya mbee wa ũndũ athembi meethĩawa.

35Nthembo sya kũvĩvw'a syaĩ mbingĩ, na o ta ũu vaĩ mauta kwondũ wa nthembo sya ngwatanĩo, na vaĩ nthembo sya kũnyuwa ila syeethĩawa syĩ vamwe na nthembo sya kũvĩvw'a. Kwoou ũthaithi Ĩkalũnĩ ya Mwĩai Ngai nĩwambĩĩiwe ĩngĩ.

36Mũsumbĩ Esekia na andũ onthe nĩmatanie mũno nũndũ wa maũndũ ala Ngai weekie andũ make, nũndũ wĩa ũsu nĩwatethiw'e mĩtũkĩ.

← Chapter 28 Jump to: Chapter 30 →