2 Chronicles 3

Kamba (MBIVILIA ŨVOO MŨSEO)

← Chapter 2 Jump to: Chapter 4 →

1Nĩvo ĩndĩ Solomoni wambĩlĩĩlye kwaka Ĩkalũ ya Mwĩai Ngai Yelũsalemu, Kĩĩmanĩ kya Molia vala Mwĩai Ngai waumĩlĩĩle Ndeviti ĩthe wake. Vandũ vau nĩ vala vaĩ kĩvũĩo kya Alaũna, mũndũ waĩ Mũyevusi, vala Ndeviti waĩ ananyuva.

2Mũsumbĩ Solomoni ambĩlĩĩlye kwaka Ĩkalũ yĩu mũthenyanĩ wa kelĩ, mweinĩ wa kelĩ, mwakanĩ wa kana kuma atw'ĩka mũsumbĩ.

3Ĩkalũ yĩla Mũsumbĩ Solomoni waakie yaĩ na ũasa wa mita mĩongo ĩlĩ na mũonza, na ũthanthau wa mita kenda.

4Valanda ũla waĩ mbee wa vala valikĩlawa Ĩkalũnĩ waĩ na ũasa wa mita kenda ta ũthanthau wa Ĩkalũ, na waĩ na ũtũlu wa mita mĩongo ĩtano na inya. Ũkũta wa valanda ũsu ngalĩkonĩ ya nthĩnĩ woombĩĩwe thaavu mũthei.

5Aseũvisye vala valikĩlawa Ĩkalũnĩ na mbwaũ sya mĩtalakwe, na asyũmbĩĩaa thaavu mũseo mũno na avanakavya na mavisa manake ma kũtemeleelwa ma mĩtende na ma nyololo.

6Mũsumbĩ nĩwaanakavisye Ĩkalũ na mavia manake ma thooa mũnene, na thaavu waumĩte nthĩ ya Valivaimu.

7Nĩwoombĩĩie thaavu ũsu mokũtanĩ ma Ĩkalũ, mĩambanĩ ya vala kĩala kyambĩĩe, mbwaũnĩ sya mĩomonĩ, na mĩangonĩ. Nĩwasie mavisa ma syũmbe syĩ nthwau syĩtawa akelũvi mokũtanĩ.

8Nĩwaakie Vandũ vala Vatheu Mũno; ũasa wa vo waĩ mita kenda na ũthanthau wa mita kenda ũndũ ũmwe na ũthanthau wa Ĩkalũ. Ngũta sya Vandũ vala Vatheu Mũno syoombĩĩiwe thaavu mũseo mũno wa kĩlo ngili mĩongo ĩlĩ.

9Mĩsumaa ĩla Solomoni watũmĩie kwaka Vandũ vau Vatheu Mũno, yaseũvĩtw'e na thaavu wa ngulamu maana atano na mĩongo mũonza. O ta ũu nĩwoombĩĩie tũsũmba tw'onthe twa ĩũlũ thaavu.

10Mũsumbĩ Solomoni nĩwaseũvisye mavisa elĩ ma mũtĩ ma syũmbe syĩ nthwau syĩtawa akelũvi, amombĩĩa thaavu na amaia Vandũnĩ vala Vatheu Mũno.

11Kĩla kĩmwe kya syũmbe isu kyaĩ na nthwau ilĩ syĩ na ũasa wa mita inya na nyusu, kuma mũthya wa ũthwau ũmwe nginya mũthya wa ũthwau ũla ũngĩ; kĩla ũthwau wĩ na ũasa wa mita ilĩ na sendimita mĩongo ĩlĩ na itano. Ũthwau ũmwe watinĩte ũkũta ngalĩkonĩ ĩmwe ya kasũmba kau, na ũla wa kelĩ ũkatinana na ũthwau wa kyũmbe kĩla kya kelĩ.

12O ta ũu ũthwau ũmwe wa kyũmbe kĩla kya kelĩ, watinĩte ũkũta ngalĩkonĩ ĩla ĩngĩ ya kasũmba kau, na ũthwau ũla wa kelĩ ũkatinana na ũthwau wa kyũmbe kĩla kya mbee kasũmbanĩ kau katĩ.

13Ũasa w'onthe wa nthwau sya syũmbe isu waĩ mita kenda. Syũmbe isu syaũngyĩ isyaĩtye vala valikĩlawa Ĩkalũnĩ.

14Solomoni nĩwaseũvisye suka wa kĩtambaa kya ndii nzeo ndũmu sya langi wa mbuluu, ũngi wa langi wa nzambalaũ, na ũngĩ mũtune mũno. Akyanakavisye na mavisa ma syũmbe syĩ nthwau syĩtawa akelũvi.

15Mũsumbĩ Solomoni nĩwaseũvisye ituĩ ilĩ ngalĩkonĩ ya mbee ya Ĩkalũ. Kĩla kĩmwe kyaĩ na ũtũlu wa mita ĩkũmi na itano na nyusu, na kyaĩ na ngovia ya ũtũlu wa mita ilĩ na sendimita mĩongo ĩlĩ.

16Mĩthya ya ituĩ isu yaanakavĩtw'e na nyololo ivĩlanganĩtw'e. O ta ũu nĩwaseũvisye mavisa ĩana ma matunda ma makũngũmanga na amakwatĩlĩĩlya nyololonĩ isu.

17Aakie ituĩ isu syelĩ ngalĩkonĩ ya mbee ya Ĩkalũ, kĩmwe ngalĩko ya Ĩtheo, na kĩngĩ ngalĩko ya ĩũlũ. Kĩla kyaĩ ngalĩko ya ĩtheo akĩtie Yakini, na kĩla kyaĩ ngalĩko ya ĩũlũ akĩta Mboasi.

← Chapter 2 Jump to: Chapter 4 →