2 Chronicles 35

Kamba (MBIVILIA ŨVOO MŨSEO)

← Chapter 34 Jump to: Chapter 36 →

1Mũsumbĩ Yosia nĩwatanĩie Mboka ya Vasaka e Yelũsalemu kwondũ wa kũnenga Mwĩai Ngai ndaĩa. Katena ka ĩlondu kwondũ wa Mboka ya Vasaka kathĩnziwe mũthenyanĩ wa ĩkũmi na inya wa mwei wa mbee.

2Nĩwanengie athembi wĩa ũla maaĩlĩte kũtethya Ĩkalũnĩ, na amathangaasya maũtethye nesa.

3O ta ũu nĩwaneenie na Alivai ala mamanyĩasya andũ onthe ma Ĩsilaeli, na ala maĩ avathe kwondũ wa Mwĩai Ngai aimea atĩĩ, “Likyai Ĩsandũkũ ĩtheu ya Ũtianĩo Ĩkalũnĩ yĩla Mũsumbĩ Solomoni mwana wa Ndeviti waakie. Vai vata wa kũyĩkua kuma vandũ vamwe kũthi vangĩ. Ĩndĩ thũkũmai Mwĩai Ngai, Ngai wenyu na andũ make Ĩsilaeli.

4Andũ ma kĩla mũsyĩ nĩmose mwanya Ĩkalũnĩ kwĩanana na wĩa ũla mwanengiwe nĩ Mũsumbĩ Ndeviti na mwana wake Solomoni.

5Ũngamai vala vandũ vatheu mwĩ na kĩkundi kya Alivai kwondũ wa kũtheesya kĩla nguthu ya mĩsyĩ ya andũ ala angĩ ma Ĩsilaeli, ala mate athembi.

6Thĩnzai tũtena twa malondu twa Mboka ya Vasaka, na mũyĩthesya. Seũvyai nthembo ĩsu kwondũ wa andũ ala angĩ ma Ĩsilaeli, nĩ kana meke maũndũ ala Mwĩai Ngai weeaie kwĩsĩla vala ve Mwose.”

7Mũsumbĩ Yosia nĩwanenganie kuma ndĩthyanĩ yake tũtena twa mbũi na malondu ngili mĩongo ĩtatũ na tũsalũ ngili itatũ, twĩthĩwe nthembo ya Vasaka kwondũ wa andũ onthe ala maĩ vo.

8O ta ũu o namo anini make nĩmaumisye syĩndũ itũmĩwe nĩ andũ ala angĩ athembi na Alivai. Atongoi ala maũngamĩe Ĩkalũ ala nĩ Ilikia Mũthembi Mũnene, Nzekalia, na Yeieli nĩmanengie athembi tũtena ngili ilĩ na maana thanthatũ twa mbũi na malondu, na tũsalũ maana atatũ twĩthĩwe nthembo ĩvindanĩ ya mboka ĩsu.

9Atongoi ma Alivai ala nĩ Konania, Semaia, Nethaneli na ana-a-ĩthe make Asavia, Yeieli na Yosavati nĩmanengie Alivai tũtena ngili itano twa mbũi na malondu, na tũsalũ maana atano kwondũ wa nthembo sya Vasaka.

10Yĩla syĩndũ syonthe syoombaniw'e kwondũ wa Mboka ya Vasaka, athembi na Alivai nĩmekalile kũla maaĩlĩte kwĩkala o tondũ meeaĩwe nĩ mũsumbĩ.

11Tũtena twa mbũi na malondu twa Mboka ya Vasaka nĩtwathĩnziwe, na Alivai matumya kĩthuma, namo athembi maminzangĩsya nthakame yatw'o kĩthembeonĩ.

12Nĩvo ĩndĩ andũ maanie nyamũ kwondũ wa nthembo ya kũvĩvw'a kwĩanana na mĩsyĩ, nĩ kana maithembe kwĩanana na ũndũ mĩao ya Mwose yaĩtye.

13Alivai nĩmavĩvĩisye nthembo sya Mboka ya Vasaka mwakinĩ kwĩanana na ũndũ kweekawa, na matheũkya nthembo ntheu na mbisũ, masilia, ikaangi, na maaĩa andũ nyama isu na mĩtũkĩ.

14Ĩtina wa maũndũ asu, nĩmaseũvisye nyama syoo na sya athembi, nũndũ athembi, ala nĩ nzyawa sya Alũni nĩmathembaa nthembo sya kũvĩvw'a na ilungu sya mathunya nginya kũkatuka. Kwoou Alivai nĩmaseũvisye nyama kwondũ woo na kwondũ wa athembi ala nĩ nzyawa sya Alũni.

15Aini aa maatĩĩe ala maumĩte mũsyĩnĩ wa Alivai wa Asavu, maĩ kũndũnĩ kũla mavangĩwe kwĩkala kwĩanana na ũtw'ĩo wa Mũsumbĩ Ndeviti: Asavu, Emani, na Yetuthuni ũla waĩ mwathani wa mũsumbĩ. Asikalĩ ala maĩ mĩomonĩ ya Ĩkalũ mayaauma kũndũnĩ kwoo, nũndũ Alivai ala angĩ nĩmamaseũvĩsye Mboka ya Vasaka.

16Kwoou, o tondũ Mũsumbĩ Yosia weeaĩte, maũndũ onthe nĩmeekiwe kwondũ wa ũthaithi wa Mwĩai Ngai, kũtanĩa Mboka ya Vasaka, na kũthembea nthembo sya kũvĩvw'a kĩthembeonĩ.

17Andũ ma Ĩsilaeli ala maĩ vo nĩmatanĩie Mboka ya Vasaka ĩvindanĩ yĩu, na Mboka ya Mũkate ũte Mbota vandũ va mĩthenya mũonza.

18Mboka ya Vasaka ndyaĩ yaatanĩwa ũu Ĩsilaeli kuma ĩvinda ya mwathani Samũeli, na vai mũsumbĩ wa Ĩsilaeli waĩ aatanĩa Mboka ya Vasaka ĩilyĩ ta ĩno yatanĩiwe nĩ Yosia, e na athembi, Alivai, na andũ onthe ma Yuta na ma Ĩsilaeli ala maĩ vau, me vamwe na andũ ma Yelũsalemu.

19Mboka ĩno ya Vasaka yatanĩiwe mwakanĩ wa ĩkũmi na nyanya wa kũsumbĩka kwa Yosia.

20Ĩtina wa maũndũ asu, Yosia amina kũseũvya Ĩkalũ, Neko mũsumbĩ wa Misili nĩwatongoeisye asikalĩ make ma kaũ mathi Kalikemisi vakuvĩ na Ũsĩ wa Euvalati, vala Yosia waendie kũkita nake.

21Mũsumbĩ nĩwatũmie andũ mathi kũla kwĩ Yosia makamwĩe atĩĩ, “We mũsumbĩ wa Yuta, kaũ ũũ ngũkita ndũũkonetye. Nyie ndyũkĩte kũkita naku; nũkĩte kũkita na amaitha makwa. Ngai ambĩaĩa nĩkalaate. Ngai e vamwe nakwa, na kwoou ndũkanziĩĩe ndakese ũkwĩka ũndũ mũthũku.”

22Yosia ndaaekana na Mũsumbĩ Neko, ĩndĩ nĩweetw'ĩkĩthisye mũndũ ũngĩ nĩ kana akokite na Neko. Ndaaĩthukĩĩsya ndeto sya Neko ila syaumĩte kũla kwĩ Ngai, ĩndĩ nĩwaendie akokitĩe nake ũiĩnĩ wa Mekito.

23Kaũ ũsu ũendee, Mũsumbĩ Yosia nĩwaathiwe na ĩangi nĩ asikalĩ ma Misili. Yosia nĩweeie athũkũmi make atĩĩ, “Mbetangei vaa; nĩnaũmĩw'a mũno!”

24Nĩmamũkĩlilye mamumya ĩkasyanĩ yake na mamwĩkĩa ĩkasyanĩ ya kelĩ yĩla yaĩ vau, na mamũtwaa Yelũsalemu vala wakw'ĩĩe. Nĩwathikiwe vala asumbĩ mathikawa mbũanĩ sya kĩ-ũsumbĩ. Andũ onthe ma Yuta na Yelũsalemu nĩmaĩie nũndũ wa kĩkw'ũ kyake.

25Mwathani Yelemia nĩwaseũvisye wathi wa kĩĩo nũndũ wa kĩkw'ũ kya Yosia. Kũvika o na ũmũnthĩ, aini onthe aũme na aka yĩla meũlilikana kĩkw'ũ kya Yosia, nĩmainaa wathi ũsu wa kĩĩo. Nĩmatw'ĩkĩthisye wathi ũsu kĩthĩo kya Ĩsilaeli na waandĩkwa ĩvukunĩ ya iĩo.

26Maũndũ ala angĩ Yosia weekie yĩla wasumbĩkĩte na meko make maseo, kwĩanana na ũndũ kũandĩkĩtwe mĩaonĩ ya Mwĩai Ngai,

27kuma ũndũ wa mbee nginya wa mũthya maandĩkĩtwe Ĩvukunĩ ya Asumbĩ ma Ĩsilaeli na ma Yuta.

← Chapter 34 Jump to: Chapter 36 →