bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Kamba
/
Kamba (MBIVILIA ŨVOO MŨSEO)
/
2 Chronicles 30
2 Chronicles 30
Kamba (MBIVILIA ŨVOO MŨSEO)
← Chapter 29
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 31 →
1
Mũsumbĩ Esekia nĩwatũmanie kũla kwĩ andũ onthe ma Ĩsilaeli na ma Yuta, na aandĩkĩa andũ ma Evalaimu na Manase valũa amathoketye moke Ĩkalũnĩ ya Mwĩai Ngai Yelũsalemu, kũtanĩa Mboka ya Vasaka ya Mwĩai Ngai, Ngai wa Ĩsilaeli.
2
Mũsumbĩ e na anini make na andũ onthe ala maĩ Yelũsalemu, nĩmavangie kũtanĩa Mboka ya Vasaka mweinĩ wa kelĩ.
3
Maleile kũtanĩa mboka ĩsu ĩvindanĩ yĩla yathĩĩwe, nũndũ athembi ala meetheetye mayaĩ eanu, na andũ mayaĩ manoombanĩa Yelũsalemu.
4
Mũvango ũsu nĩwendeeisye mũsumbĩ na andũ onthe.
5
Kwoou nĩmavangie kũtũma andũ kĩla vandũ nthĩ ya Ĩsilaeli, kuma Mbeeli-sieva ngalĩko ya ĩtheo kũthi kũvika Ndani ngalĩko ya ĩũlũ. Nĩmeetie andũ moke Yelũsalemu na kũtanĩa Mboka ya Vasaka ya Mwĩai Ngai, Ngai wa Ĩsilaeli. Mboka ĩsu ndyaĩ yaatanĩwa nĩ andũ aingĩ kwĩanana na ũndũ kũandĩkĩtwe.
6
Kwoou andũ nĩmaendie kĩla vandũ nthĩ ya Ĩsilaeli na Yuta, makuĩte valũa kuma kwa mũsumbĩ na anini make, o tondũ mũsumbĩ weeaĩte. Valũa isu syaĩtye atĩĩ: “Andũ ma Ĩsilaeli, syokeai Mwĩai Ngai, Ngai wa Avalaamu, Isaka na Yakovo, nĩ kana amũsyokee inyw'ĩ ala mũtiele, ala mũnavonokie kuma ũtonyinĩ wa asumbĩ ma Asuli.
7
Mũikekale aaũmae menyu, na ana-a-ĩthe menyu ala mataĩ aĩkĩĩku kũla kwĩ Mwĩai Ngai, Ngai wa aaũmae moo, nginya amakany'a mũno o tondũ mũkwona.
8
Mũikomye ngoo ũndũ aaũmae menyu mailyĩ; ĩnenganei kũla kwĩ Mwĩai Ngai. Ũkai Ĩkalũnĩ ya Mwĩai Ngai, yĩla ũvathĩte tene na tene. Thũkũmai Mwĩai Ngai, Ngai wenyu, nĩ kana aeke kũmũthatĩa.
9
Ethĩwa mũkasyokea Mwĩai Ngai, ana-a-ĩthe menyu na syana syenyu makeew'ĩwa tei nĩ ala mamatavĩte na kũsyoka nthĩ ĩno, nĩkwĩthĩwa Mwĩai Ngai, Ngai wenyu nĩ mũseo na e tei. Mwamũsyokea ndakamũlea.”
10
Andũ asu matũmĩtwe nĩmaendie kuma ndũa ĩmwe kũthi ĩngĩ, nthĩ yonthe ya Evalaimu na ya Manase, kũthi kũvika Nzevuluni. Ĩndĩ andũ ma nthĩ isu nĩmamathekeeie na mamavũthya.
11
No andũ anini ma Aseli, Manase, na ma Nzevuluni ala meenyivisye na mooka Yelũsalemu.
12
O ta ũu Ngai nĩwatumie andũ ma nthĩ ya Yuta methĩwa na ngoo ĩmwe, nĩ kana meke ũndũ mũsumbĩ na anini make meeaĩte, kwĩanana na mwĩao wa Mwĩai Ngai.
13
Andũ aingĩ mũno nĩmoombanĩie Yelũsalemu mweinĩ wa kelĩ, matanĩe Mboka ya Mũkate ũte Mbota.
14
Nĩmambĩĩie kũthũkũma na mavetanga ithembeo ila syaĩ Yelũsalemu, na ithembeo syonthe sya kũvĩvĩsya ũvani masyĩkya Mwandanĩ wa Kĩtilonĩ.
15
Nĩmooaie katena ka ĩlondu ka Mboka ya Vasaka mũthenyanĩ wa ĩkũmi na inya wa mwei wa kelĩ. Athembi na Alivai ala mataĩ maneethesya nĩmakwatiwe nĩ nthoni, na kwoou meethesya na maete nthembo sya kũvĩvw'a Ĩkalũnĩ.
16
Nĩmekalile kũla maaĩlĩte kwĩkala Ĩkalũnĩ kwĩanana na ũndũ mĩao ya Mwose, mũndũ wa Ngai yaĩtye. Alivai nĩmanengie athembi nthakame ya nthembo, namo mamĩminzangĩsya kĩthembeonĩ.
17
Nĩkwĩthĩwa andũ aingĩ wũmbanonĩ ũsu mayeetheetye, Alivai nĩmooaie tũtena twa malondu twa Mboka ya Vasaka kwondũ wa andũ onthe ala mataĩ atheu, na matũvatha kwondũ wa Mwĩai Ngai.
18
Andũ aingĩ katĩ wa ala maumĩte Evalaimu, Manase, Isakali, na Nzevuluni mayeetheetye, ĩndĩ nĩmaĩe Mboka ya Vasaka o na kau kũyaandĩkĩtwe ũu. Maĩe nũndũ Esekia nĩwamavoyeie ayasya atĩĩ, “Mwĩai Ngai ũla mũseo, ekea andũ onthe,
19
ala meyumasya na ngoo syoo mamũmanthe Mwĩai Ngai, Ngai wa aaũmae moo, o na kau ti kwĩanana na mĩao ya ũtheu ya Ĩkalũ.”
20
Mwĩai Ngai nĩweewie mboya ya Esekia, na aekea andũ alea kũmakany'a.
21
Andũ ma Ĩsilaeli ala maĩ Yelũsalemu nĩmatanĩie Mboka ya Mũkate ũte Mbota vandũ va mĩthenya mũonza me na ũtanu mũnene, Alivai na athembi nĩmainĩaa Mwĩai Ngai na vinya woo w'onthe kĩla mũthenya.
22
Esekia nĩwaneenie athuthya Alivai onthe ala maĩ na ũmanyi mwingĩ wa kũthũkũma Mwĩai Ngai. Kwoou andũ nĩmaĩe lĩu wa Mboka ya Vasaka vandũ va mĩthenya mũonza, maithemba nthembo sya ngwatanĩo na kũtũngĩa Mwĩai Ngai wa aaũmae moo mũvea.
23
Andũ onthe nĩmeew'anie matanĩe mboka ĩsu vandũ va mĩthenya ĩngĩ mũonza; kwoou nĩmamĩtanĩie vandũ va mĩthenya ĩngĩ mũonza na ũtanu.
24
Esekia mũsumbĩ wa Yuta nĩwanengie andũ nzaũ ngili ĩmwe, na mbũi na malondu ngili mũonza maye. O ta ũu namo atongoi nĩmamanengie nzaũ ngili ĩmwe, na mbũi na malondu ngili ĩkũmi. Athembi aingĩ nĩmeetheisye.
25
Andũ onthe ma Yuta, vamwe na athembi na Alivai, na andũ onthe ala moombanĩte kuma Ĩsilaeli, na aeni onthe ala maumĩte Ĩsilaeli na ala matũaa Yuta nĩmatanie.
26
Kwaĩ na ũtanu mũnene Yelũsalemu, nĩkwĩthĩwa kuma ĩvinda ya Solomoni mwana wa Ndeviti, kũyaaĩthĩwa ũndũ wa mũthemba ũsu Yelũsalemu.
27
Athembi na Alivai nĩmaũngamie maathime andũ, na Ngai amew'a nĩkwĩthĩwa mboya syoo nĩsyavikie ĩtunĩ, wĩkalonĩ wake mũtheu.
← Chapter 29
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 31 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34
35
36