2 Chronicles 34

Kamba (MBIVILIA ŨVOO MŨSEO)

← Chapter 33 Jump to: Chapter 35 →

1Yosia atw'ĩkie mũsumbĩ e na ũkũũ wa myaka nyanya. Asumbĩkie vandũ va myaka mĩongo ĩtatũ na ũmwe e Yelũsalemu.

2Yosia nĩweekaa maũndũ ala mamwendeeasya Mwĩai Ngai. Nĩweekaa maũndũ ala ũmae wake Ndeviti weekaa, na nĩweanĩasya na kĩthito mĩao yonthe ya Mwĩai Ngai.

3Mwakanĩ wa nyanya wa kũsumbĩka kwake, Yosia e o wa mũika nĩwambĩĩie kũthaitha Ngai ũla Ndeviti ũmae wake wathaithaa. Mwakanĩ wa ĩkũmi na ilĩ wa kũsumbĩka kwake, Yosia nĩwambĩĩie kwananga kũndũ kwa kũthaithĩa ngai sya mĩvw'anano, mĩvw'anano ya ngai nga ĩla yĩtawa Asela, na ngai ila ingĩ syonthe sya mũvw'anano.

4Nĩwaumisye mwĩao ithembeo sya ngai ya Mbaali syaanangwa; nĩwatilangile ithembeo sya kũvĩvĩsya ũvani ila syaĩ vakuvĩ na ithembeo isu sya Mbaali. O ta ũu nĩwaanangie ituĩ sya ngai ĩla yĩtawa Asela, na ngai ila ingĩ syonthe sya mũvw'anano, na anyaĩĩkĩsya mũtutu wasyo mbũanĩ sya andũ ala maithembeaa.

5Nĩwavĩvĩisye mavĩndĩ ma athembi ma ngai isu ithembeonĩ ila mathaithĩaa. Kwa kwĩka ũu, nĩwatumie ndũa ya Yuta na ya Yelũsalemu syĩthĩwa syĩ ntheu ĩngĩ.

6Ndũanĩ sya Manase, Evalaimu, na Simioni kũthi kũvika Navutalĩ na maũombokunĩ ala maithyũlũlũkĩte,

7nĩwaanangie ithembeo na atumbatumba ituĩ sya ngai nga ĩla yĩtawa Asela na mĩvw'anano syatw'ĩka mũtutu. O ta ũu kĩla vandũ nthĩ ya Ĩsilaeli nĩwaanangie ithembeo sya kũvĩvĩsya ũvani syonthe, na ĩndĩ asyoka Yelũsalemu.

8Mwakanĩ wa ĩkũmi na nyanya wa kũsumbĩka kwa Yosia, ĩtina wa kũthesya nthĩ ya Ĩsilaeli na Ĩkalũ, Yosia nĩwatũmie aũme atatũ makatũngĩĩe Ĩkalũ ya Mwĩai Ngai. Aũme asu maĩ: Savana mwana wa Asalia, Maaseia ngavana wa ndũa ya Yelũsalemu, na Yoa mwana wa Yeaasi ũla waĩ mũandĩki wa maũndũ.

9Andũ asu nĩmaendie kũla kwĩ Mũthembi Mũnene Ilikia, na mamũnenga mbesa ila syaetetwe Ĩkalũnĩ ya Ngai, ila Alivai ala mekalaa meteelete mĩomonĩ moombanĩtye kuma andũnĩ ma Manase, Evalaimu, andũnĩ ma Ĩsilaeli ala matialĩte, na kuma andũnĩ onthe ma Yuta na Mbengyameni na ala matwĩe Yelũsalemu.

10Nĩvo ĩndĩ manengie aũme ala manyuvĩtwe maũngamĩe wĩa Ĩkalũnĩ ya Mwĩai Ngai mbesa isu. Aume asu nĩmaĩvie athũkũmi ala matũngĩĩie na maseũvya Ĩkalũ.

11O ta ũu nĩmanengie andũ ala maseũvasya syĩndũ sya mbwaũ, na ala maakaa nyũmba mbesa sya kũthooa mavia masũvye, na mbwaũ sya kũtũngĩĩa myako ĩla asumbĩ ma Yuta maekete ĩkanangĩka.

12Aũme asu nĩmatethisye wĩa woo kwa ũĩkĩĩku. Maũngamĩwe nĩ Yaathi, na Ovatia, ala maĩ Alivai kuma mũsyĩnĩ wa Melali, Nzekalia na Mesulamu ala maĩ ma kuma mũsyĩnĩ wa Koathi. Alivai onthe maĩ na kĩnengo kya kũkũna mĩio ya mbathi.

13Alivai angĩ maũngamĩe wĩa wa kũkua syĩndũ na makaũngamĩa andũ ala matethasya wĩa wĩ kĩvathũkany'o; angĩ maĩ aandĩki na angĩ maĩ asikalĩ ma kũsunga mĩvĩa.

14Maendee kwosa mbesa ila syatwaĩtwe Ĩkalũnĩ ya Mwĩai Ngai, mũthembi Ilikia nĩwoonie ĩvuku ya mĩao ya Mwĩai Ngai ĩla Ngai wanengie Mwose.

15Ilikia nĩweeie mũandĩki Savani atĩĩ, “Nĩnonie ĩvuku ya Mĩao Ĩkalũnĩ ya Mwĩai Ngai.” Ilikia nĩwanengie Savani ĩvuku yĩu.

16Nĩvo ĩndĩ Savani watwaie ĩvuku yĩu kũla kwĩ mũsumbĩ. Nĩwaneenie na mũsumbĩ amwĩa atĩĩ, “Athũkũmi maku nĩmaendee kũtethya wĩa w'onthe ũla ũmanengete.

17Nĩmosie mbesa syonthe ila syĩĩ Ĩkalũnĩ ya Mwĩai Ngai, na mainenga atongoi na athũkũmi.”

18Savani nĩwaendeeie kũneena na mũsumbĩ amwĩa atĩĩ, “Mũthembi Ilikia nĩwanenga ĩvuku.” Savani nĩwasomeie mũsumbĩ ĩvuku yĩu.

19Yĩla mũsumbĩ weewie ndeto sya ĩvuku yĩu ya Mĩao, nĩwatembũangie ngũa syake nĩ kyeva.

20Mũsumbĩ nĩweeaĩie mũthembi Ilikia, Aikamu mwana wa Savani, Avitoni mwana wa Mika, mũandĩki Savani, na Asaia mũthũkũmi wa mũsumbĩ amea atĩĩ,

21“Endai mũkakũlye Mwĩai Ngai ũtao kwondũ wakwa, na kwondũ wa andũ ala matialĩte Ĩsilaeli na Yuta ĩũlũ wa momanyĩsyo ma ĩvuku yĩĩ. Mwĩai Ngai nũthatĩtw'e nĩ ithyĩ nũndũ aaũmae maitũ mayaaĩanĩsya ndeto ya Mwĩai Ngai na mayaaĩka maũndũ ala ĩvuku yĩĩ yaĩtye maĩlĩte kwĩka.”

22Kwoou Ilikia na andũ ala angĩ mũsumbĩ watũmĩte nĩmaendie kũla kwĩ mwathani mũndũ mũka weetawa Ũlita. Ũlita aĩ kĩveti kya Salumu mwana wa Tokathi ũla waĩ mwana wa Asala. Salumu nĩwe wasũvĩaa vala vaiawa ngũa ila syatũmĩawa Ĩkalũnĩ. Ũlita atwĩe Yelũsalemu Ũtũinĩ wa Kelĩ. Nĩmatavisye mũndũ mũka ũsu maũndũ onthe ala meekĩkĩte,

23nake amea nĩmasyoke kũla kwĩ mũsumbĩ makamwĩe,

24Mwĩai Ngai easya atĩĩ, “Nĩngũkany'a andũ onthe ma Yelũsalemu na andũ mayo onthe na iumo syonthe ila iandĩkĩtwe ĩvukunĩ yĩla yĩsomeiwe mũsumbĩ.

25Nĩmandekete na makavĩvĩsya ngai sya mĩvw'anano ũvani, makanthatya nũndũ wa maũndũ onthe ala mekĩte, na kwoou ngamakany'a na ndikamaekea.

26Ĩndĩ kwondũ wa mũsumbĩ wa Yuta ũla ũmũtũmie mũkakũlye ũtao kwa Ngai, endai mũkamũtavye kana ũũ nĩw'o nyie Mwĩai Ngai, Ngai wa Ĩsilaeli ngwasya ĩũlũ wa ndeto ila ũneewie,

27nũndũ nũnaumbũlile na weenyivya mbee wakwa wamina kwĩw'a kana nĩmbangĩte kũkany'a Yelũsalemu na ala matwĩe vo, na nũndũ nũnatembũangie ngũa syaku, na waĩa wĩ mbee wakwa, nĩneew'a mboya syaku. Nĩasya ũu nyie Mwĩai Ngai.

28Kwoou ũkakw'a na ũithikwa na mũuo. Ndũkona thĩna ũla ngaete vandũnĩ vaa, na ngĩetee ala matũaa vo.” Andũ asu nĩmasyokie kũla kwĩ mũsumbĩ na mamũtavya ũtũmani ũsu.

29Nĩvo ĩndĩ Mũsumbĩ Yosia weetie atongoi onthe ma Yuta na ma Yelũsalemu mombane vamwe.

30Nĩwambatie Ĩkalũnĩ ya Mwĩai Ngai e vamwe na andũ ma Yuta na ma Yelũsalemu, athembi na Alivai; andũ ala angĩ onthe anene na anini. Nĩwamasomeie ndeto syonthe sya Ĩvuku ya Ũtianĩo yĩla yeethĩiwe Ĩkalũnĩ ya Mwĩai Ngai onthe methukĩĩsye.

31Mũsumbĩ nĩwaũngamie vala waĩlĩte kwĩkala na aseũvya ũtianĩo na Mwĩai Ngai kana akamwĩw'aa na kwĩanĩasya mĩao, mokũsĩ na motw'ĩo make na ngoo yake yonthe na thayũ wake w'onthe, na o ta ũu akeekaa ũndũ ndeto sya ũtianĩo ũsu, ila iandĩkĩtwe ĩvukunĩ yĩu ikwasya.

32Nĩwatumie andũ onthe ma Yelũsalemu na Mbengyameni mevĩta kwĩanĩsya ũtianĩo ũsu. Kwoou andũ ma Yelũsalemu nĩmeanĩisye maũndũ ala maaĩlĩte kwĩanĩw'a ma ũtianĩo ũla maseũvĩtye na Ngai wa aaũmae moo.

33Mũsumbĩ Yosia nĩwavetangie ngai syonthe sya mũvw'anano sya kũthatya kuma kĩsionĩ kya andũ ma Ĩsilaeli, na atuma andũ onthe ma Ĩsilaeli mathũkũma Mwĩai Ngai, Ngai woo. Ĩvindanĩ yonthe ya thayũ wake, mayaalea kũatĩĩa Mwĩai Ngai, Ngai wa aaũmae moo.

← Chapter 33 Jump to: Chapter 35 →