bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Kamba
/
Kamba (MBIVILIA ŨVOO MŨSEO)
/
Luke 2
Luke 2
Kamba (MBIVILIA ŨVOO MŨSEO)
← Chapter 1
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 3 →
1
Ĩvindanĩ yĩu, Aukusito mũsumbĩ wa Loma nĩwaumisye mwĩao andũ onthe ũsumbĩnĩ wa Loma matalwe.
2
Kũtalwa kũu nĩkw'o kwaĩ kwa mbee, na kweethĩiwe yĩla Kwilinio waĩ ngavana wa nthĩ ya Silia.
3
Kĩla mũndũ nĩwaendie kwĩyĩandĩkĩthya ndũanĩ ĩla ya wumo wake.
4
Kwoou Yosevu nĩwaumie ndũanĩ ya Nasaleti ĩla yĩ Kalilii, na athi nthĩ ya Yutia ndũanĩ yĩtawa Mbetheleemu vala Ndeviti wasyaĩwe, nũndũ we aĩ nzyawa ya Ndeviti.
5
Nĩwaendie kwĩyĩandĩkĩthya vamwe na Meli ũla weevaĩtye, nake aĩ mũito.
6
Me kũu Mbetheleemu, ĩvinda ya Meli ya kũsyaa nĩyavikie, na asyaa
7
kana ka mbee ka kavĩsĩ. Nĩwakavw'ĩkie ngũa sya kaũkenge, na akakomya ĩsandũkũnĩ ya kũnengea indo lĩu, nũndũ nyũmbanĩ ya aeni vayaĩ vandũ mekala.
8
Nthĩ ĩsu kwaĩ aĩthi amwe maĩ kĩthekanĩ ũtukũ maisunga indo syoo.
9
Mũlaĩka wa Mwĩai nĩwamaumĩlĩĩle, na kyeni kya ũtheu mũtisu wa Ngai kyamamulĩka ngalĩko syonthe, namo makwatwa nĩ w'ĩa mwingĩ.
10
Ĩndĩ mũlaĩka amea atĩĩ, “Ekai kũkĩa, nĩnamũetee ũvoo mũseo wa ũtanu mũnene, ũla ũkethĩwa wa andũ onthe.
11
Ũmũnthĩ ndũanĩ ĩla Ndeviti wasyaĩwe, nĩmũsyaĩwe Mũtangĩĩi, nake nĩ Klĩsto ũla Mwĩai.
12
Ũũ nĩw'o mũũthi kũmũmanya: Nĩmũũthi kwĩthĩa kana kavw'ĩkĩtwe ngũa sya kaũkenge kakometw'e ĩsandũkũnĩ ya kũnengea indo lĩu.”
13
O vau kwa vau, nguthu nene ya alaĩka kuma ĩtunĩ nĩyoonekie yĩ vamwe na ũla mũlaĩka maimũkatha Ngai mayina atĩĩ,
14
“Ngai nĩakumw'e kũu ĩũlũ ĩtunĩ, na mũuo wĩthĩwe kũũ ĩũlũ wa nthĩ, kwa andũ ala mamwendeeasya.”
15
Yĩla alaĩka asu matiie aĩthi masyoka ĩtunĩ, aĩthi nĩmeeanie atĩĩ, “Tũendei Mbetheleemu yu tũkone ũndũ ũsu weekĩka, ũla Mwĩai watũmanyĩthya.”
16
Kwoou nĩmaendie mĩtũkĩ na meethĩa Meli e na Yosevu, na kala kana kakometw'e ĩsandũkũnĩ ya kũnengea indo lĩu.
17
Aĩthi asu moona kana kau nĩmatavanisye ũndũ meeiwe nĩ mũlaĩka ĩũlũ wako.
18
Andũ onthe ala meewie maũndũ ala aĩthi maneenie nĩmaseng'ie mũno.
19
Ĩndĩ Meli nĩwaiie maũndũ asu onthe ngoonĩ yake na kũmasũanĩaa.
20
Nĩvo ĩndĩ aĩthi masyokie makĩmũkumya na kũmũkatha Ngai kwondũ wa maũndũ ala meewie na moonie. Meethĩie maũndũ onthe mailyĩ o tondũ matavĩtwe nĩ mũlaĩka.
21
Mũthenyanĩ wa nyanya ĩtina wa kana kau kasyawa, nĩmakaĩkie na makatw'ĩĩa ĩsyĩtwa maketa Yesũ, nayo nĩ ĩsyĩtwa yĩla yanenganĩtwe nĩ mũlaĩka katanamba kũitavwa.
22
Ĩvinda nĩyavikie ya Yosevu na Meli kũthi kũthew'a o tondũ mathĩtwe Mĩaonĩ ya Mwose. Nĩmakuie kana mathi nako Yelũsalemu makakanengane kwa Mwĩai,
23
nũndũ Mĩaonĩ ya Mwĩai nĩkũandĩkĩtwe atĩĩ, “Kĩla ĩkithathi ĩũme yĩkanenganawe kwa Mwĩai.”
24
O ta ũu nĩmaendie kumya nthembo, ĩla kwĩanana na Mĩao ya Mwĩai yaaĩlĩte kwĩthĩwa ndumbũ ilĩ kana maswii elĩ ma mavũĩ.
25
Ĩvindanĩ yĩu vaĩ mũndũ wekalaa Yelũsalemu weetawa Simioni. Aĩ mũndũ mũlũngalu na nĩwamũĩkĩĩaa Ngai. Nĩweeteelete e na mea ma kwona Ngai ayovosya andũ ma Ĩsilaeli, na Veva Mũtheu aĩ vamwe nake.
26
Veva Mũtheu nĩwamwonetye nesa kana ndakakw'a atanamba kũmwona Klĩsto atũmĩtwe nĩ Ngai.
27
Kwoou Simioni atongoew'e nĩ Veva Mũtheu, nĩwaendie alika Ĩkalũnĩ. Yĩla Yosevu na Meli maetie kana Ĩkalũnĩ mekane nako o tondũ mĩao yaĩtye,
28
Simioni nĩwakosie na amũkatha Ngai ayasya atĩĩ,
29
“Yu ĩndĩ Mwĩai Mũsumbĩ, eka nyie mũthũkũmi waku nĩkw'e na mũuo, nũndũ kĩla wambathie nĩweanĩĩsya.
30
Nĩneeyonea Mũtangĩĩi na metho makwa,
31
ũla woombanisye oneke nĩ andũ onthe.
32
We nĩ kyeni kya kũvuany'a kwenda kwaku Andũnĩ-ma-mbaĩ-ingĩ, na kũete ũkumyo kwa andũ maku Ĩsilaeli.”
33
Ĩthe na inyia wa Yesũ nĩmaseng'iw'e nĩ maũndũ ala Simioni waneenie ĩũlũ wake.
34
Simioni nĩwamaathimie na eea Meli inyia wa kana atĩĩ, “Nĩwene, kana kaa kaku kakatuma andũ aingĩ ma Ĩsilaeli manangwa, na o ta ũu aingĩ matangĩĩwa. Kakeethĩwa ke wonany'o wa ũkany'o ũla wĩlewa nĩ andũ aingĩ,
35
na kwoou kakaumbũany'a mosũanĩo ma ngoo syoo. Naku we, woo ũkatonya ngoo yaku ta ũvyũ.”
36
O ta ũu vaĩ mũndũ mũka ũmwe mwathani waĩ mũkũũ mũno weetawa Ana, mwĩĩtu wa Vanueli, wa mbaĩ ya Aseli. Nĩwakw'ĩĩwe nĩ mũũme ĩtina wa kwĩkalany'a nake vandũ va myaka mũonza,
37
na ekala e ndiwa kũvika ĩvindanĩ yu waĩ na ũkũũ wa myaka mĩongo nyanya na ĩna. Myakanĩ ĩsu yonthe atindĩaa kũthi Ĩkalũnĩ kũmũthaitha Ngai ũtukũ na mũthenya, kwa nzĩa ya kũvoya na kũtĩĩa kũya.
38
Ĩvindanĩ o yĩu Ana nĩwaendie Ĩkalũnĩ na amũkatha Ngai, na aneena ĩũlũ wa kana kau kwa andũ onthe ala mekalĩte meteelete kwovow'a kwa Yelũsalemu.
39
Yosevu na Meli mamina kwĩka maũndũ onthe kwĩanana na Mĩao ya Mwĩai, nĩmasyokie ndũanĩ ĩla yoo ya Nasaleti ĩla yĩ Kalilii.
40
Kana nĩkeanie na kaendeea kwĩthĩwa na vinya na ũĩ, na mumo wa Ngai waĩ vamwe nako.
41
Asyai ma Yesũ nĩmaendaa Yelũsalemu kĩla mwaka kwondũ wa Mboka ya Vasaka.
42
Yesũ avikya ũkũũ wa myaka ĩkũmi na ĩlĩ, nĩwaendanisye na asyai make mbokanĩ ĩsu o tondũ kweekawa.
43
Ĩvinda ya mboka yathela, Yosevu na Meli nĩmambĩĩie kyalo kya kũsyoka mũsyĩ, ĩndĩ mayaamanya kana Yesũ atiwa Yelũsalemu.
44
Masũanĩaa e o kũu katĩ wa andũ, na kwoou mathi mũendo wa mũthenya mũima, na ĩndĩ mambĩĩa kũmũmantha andũnĩ ma mũsyĩ na kũu anyanyaenĩ.
45
Mayaamwona na kwoou masyoka Yelũsalemu mamũmanthĩte.
46
Ĩtina wa mĩthenya ĩtatũ nĩmamwĩthĩie Ĩkalũnĩ ailyĩ nthĩ katĩ wa amanyĩsya ma Mĩao, aimethukĩĩsya o vamwe na kũmakũlya makũlyo.
47
Andũ onthe ala mamwĩw'aa aineena nĩmaseng'iw'e mũno nĩ ũmanyi ũla waĩ naw'o, na ũndũ wasũngĩaa makũlyo.
48
Asyai make nĩmaseng'ie mũno mamwona, na inyia wake amũkũlya atĩĩ, “Mwana, ũtwĩkie ũu nĩkĩ? Nĩna ĩthe waku twĩkũmanthaa twĩ na kyeva mũno.”
49
Nake amasũngĩa amea atĩĩ, “Mwĩmanthĩaa kĩ? No mwĩsĩ kana naĩlĩte kwĩthĩwa nyũmbanĩ ya Asa wakwa?”
50
Namo mayaaelewa nĩ ũu wamasũngĩie.
51
Nĩvo ĩndĩ wasyokanisye namo nginya Nasaleti, na eethĩwa e mwĩwi kwoo. Inyia wake nĩwaiie maũndũ asu ngoonĩ yake.
52
Yesũ nĩwaendeeie kũĩva na kwĩana, akĩmwendeesya Ngai o vamwe na andũ.
← Chapter 1
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 3 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24