Luke 21

Kamba (MBIVILIA ŨVOO MŨSEO)

← Chapter 20 Jump to: Chapter 22 →

1Yesũ nĩwasyaĩĩisye andũ, na oona ũndũ andũ athwii meekĩaa mĩvothi yoo kĩnandũnĩ kya Ĩkalũ.

2O ta ũu nĩwoonie kĩveti kĩmwe ndiwa na kĩtaĩ kĩndũ kyeekĩa tũsumunĩ twĩlĩ.

3Nĩvo ĩndĩ waisye atĩĩ, “Nĩmũtavya w'o, kĩveti kĩĩ ndiwa na kĩte syĩndũ, nĩkyo kyaumya mbingĩ kũte andũ ala angĩ onthe.

4Nũndũ andũ ala angĩ onthe meumasya nũndũ wa kwingĩvĩwa, ĩndĩ kyo o na kau nĩ ngya, kyaumya kyonthe kĩla kĩĩ kĩkwatya kwondũ wa mavata makyo onthe.”

5Amanyĩw'a amwe ma Yesũ nĩmaneenaa ĩũlũ wa Ĩkalũ, ũndũ yanakavĩtw'e nĩ mavia ala yakĩtwe namo, na mĩthĩnzĩo ĩla yaumĩw'e Ngai. Yesũ nĩwameie atĩĩ,

6“Syĩndũ ii mũkwona, ve ĩvinda yũkĩte wĩthĩe vai ĩvia o na yĩmwe yĩkatiwa yĩ ĩũlũ wa yĩngĩ; syonthe ikaomboangwa vyũ.”

7Nĩvo ĩndĩ mamũkũlilye atĩĩ, “Mũmanyĩsya, maũndũ aa makeethĩwa ĩndĩĩ, na nĩ kyaũ kĩkwonany'a kana ĩvinda nĩ ĩviku maũndũ asu methĩwe?”

8Yesũ amea atĩĩ, “Ĩkalai mwĩsũvĩĩte na mũiketĩkĩle mũndũ o na wĩva amũkenge. Andũ aingĩ makooka na ĩsyĩtwa yakwa mayasya, ‘Ninyie Klĩsto,’ na, ‘Ĩvinda nĩ ĩviku!’ Mũikatate kũmaatĩĩa.

9Yĩla mwĩĩw'a ituu sya makaũ na ithokoo mũikaamake, nũndũ maũndũ asu no nginya meamba kwĩthĩwa, ĩndĩ maikethĩwa mayonany'a kana ĩvinda ya mũminũkĩlyo nĩ ĩviku.”

10Nĩwaendeeie na kũmatavya amea atĩĩ, “Nthĩ ĩkakwatya kaũ na ĩngĩ, na ũsumbĩ ũkavithũkĩa ũngĩ.

11Kũkeethĩwa itetemo nthũku sya nthĩ, na kũkeethĩwa mayũa kũũ na kũũ na mowau mathũku mũno. O ta ũu kũkeethĩwa syĩndũ sya kũtelemya na mawonany'o manene yayayanĩ.

12Ĩndĩ maũndũ aa onthe matanamba kwĩthĩwa nĩmũkakwatwa na kũthĩnw'a. Mũkatwawa nyũmbanĩ sya Ayuti sya kũthaithĩa na kũmbanĩa mũkasilĩlwe na mũyovwa yela. O ta ũu nũndũ wa kwĩthĩwa mwĩ aatĩĩi makwa, mũkatwawa mbee wa makavana na asumbĩ.

13Yĩu yĩkeethĩwa ĩvinda yenyu ya kwĩthĩwa mwĩ ngũsĩ.

14Kwoou tw'ai ngoonĩ syenyu kana mũikambaa kũtinda mũisũanĩa ũndũ mũũthi kũneena,

15nũndũ nyie ngamũnenga ũĩ wa kũmanya ndeto sya kũneena, ila amaitha menyu matakethĩwa matonya kwilea kana kwikananĩa.

16O na nĩmũkathoow'a nĩ ana-a-inyia menyu, andũ ma mũsyĩ na anyanyae menyu; na amwe menyu nĩmakoawa.

17Mũkamenwa nĩ kĩla mũndũ nũndũ wakwa.

18Ĩndĩ vai ũsw'ĩĩ o na ũmwe wa mĩtwe yenyu ũkaa.

19Kwa kũmĩĩsya kwenyu mũkakwata thayũ ũtathela.

20“Yĩla mũkona Yelũsalemu yathyũlũlũkwa nĩ asikalĩ ma kaũ, mwĩmanya kana kwanangwa kwayo kwĩ vakuvĩ.

21Andũ ala meĩthĩwa Yutia mekĩa mathi iĩmanĩ ĩũlũ. Ala makethĩwa Yelũsalemu nthĩnĩ meuma vo mathi. Namo andũ ala makethĩwa na ku motũinĩ, maikaatate kũthi Yelũsalemu.

22Ĩsu ĩkeethĩwa yĩ mĩthenya ya ũĩvanĩsyo, nĩ kana maũndũ onthe ala mawetetwe Maandĩkonĩ Matheu meanĩe.

23Tei nĩ kwa aka ala makethĩwa me aito na ala makethĩwa mena twana tũnini tũkwonga! Kũkeethĩwa thĩna mwingĩ mũno ĩũlũ wa nthĩ, na ũthatu wa Ngai ũkatheea ĩũlũ wa andũ aa.

24Amwe moo makooawa na mbyũ, na angĩ maitavwa manyaĩĩkw'e nthĩ syonthe. Yelũsalemu nayo ĩkakinyangĩwa nthĩ nĩ Andũ-ma-mbaĩ-ingĩ, kũvika yĩla ĩvinda yoo yĩkathela.

25“Maũndũ ma kũseng'ya makeekĩka syũanĩ, mweinĩ, na ndatanĩ. Ĩũlũ wa nthĩ mbaĩ sya andũ ĩkeethĩwa mathĩnanĩ itesĩ ũndũ ikwĩka, nũndũ wa kĩlitũko kya ũkanga na kũkĩlany'a kwa itulumo.

26Andũ makatw'ĩka nda nĩ w'ĩa, meteelete kĩla kyũkĩte ĩũlũ wa nthĩ, nũndũ mavinya ma syĩndũ ila syĩ yayayanĩ makathingithangw'a.

27Nĩvo ĩndĩ makamwona Mwana wa Mũndũ okĩte e mathweonĩ, e na ũtonyi na ndaĩa nene.

28Mwoona maũndũ asu mambĩĩa kwĩkĩka, mwĩũngama na kũng'elela ĩũlũ, nũndũ wovosyo wenyu ũkeethĩwa wĩ vakuvĩ.”

29Nĩvo ĩndĩ Yesũ wamatavisye ngelekany'o ĩno: “Kwa sũanĩai ĩũlũ wa mũkũyũ, o vamwe na mĩtĩ ĩla ĩngĩ yonthe.

30Yambĩlĩĩlya kũthongoosya matũ, nĩmũmanyaa kana ĩvinda ya mbua yĩ vakuvĩ.

31No ta ũu, mwoona maũndũ asu mayĩkĩka, mwĩmanya kana ũsumbĩ wa Ngai wĩ vakuvĩ.

32“Nĩmũtavya w'o, maũndũ aa makeekĩka andũ ala me thayũ yu tũĩ matanakw'a onthe makathela.

33Ĩtu na nthĩ ikathela, ĩndĩ ndeto syakwa ikekala tene na tene.

34“Ĩkalaai mwĩsũvĩĩte, ngoo syenyu iikakwatwe nĩ ũyi na ũnywi na mawĩmakĩo ma thayũ ũũ, naw'o Mũthenya ũsu ũimũkĩa kwa kĩthũlũmũko.

35Mũthenya ũsu ũkooka ta mũteo kwa andũ onthe ala me ĩũlũ wa nthĩ.

36Kwoou ĩkalaai mwĩyũmbanĩtye na kũvoyaa kĩla ĩvinda, mũnengwe kũsinda maũndũ asu onthe makekĩka, na kũũngama mbee wa Mwana wa Mũndũ.”

37Kĩla mũthenya ĩvindanĩ yĩu, Yesũ eethĩawa Ĩkalũnĩ akĩmanyĩsya andũ, ĩndĩ ĩa mawĩoo aendaa Kĩĩmanĩ kya Mĩthata kwĩkala vo.

38Kĩoko tene kĩla mũthenya, andũ onthe nĩmaendaa Ĩkalũnĩ kũmwĩthukĩĩsya.

← Chapter 20 Jump to: Chapter 22 →

Recommended Reading

Commentary Luke Commentaries → Devotional Luke Devotional Guide → Get This Bible Kamba (MBIVILIA ŨVOO MŨSEO) Study Bible →