bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Kamba
/
Kamba (MBIVILIA ŨVOO MŨSEO)
/
Luke 24
Luke 24
Kamba (MBIVILIA ŨVOO MŨSEO)
← Chapter 23
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
1
Wakyumwa vaa kũitheatheana, aka nĩmaendie mbũanĩ makuĩte mĩtĩ ĩnyungaa nesa ĩla maseũvĩtye.
2
Nĩmeethĩie ĩvia yĩla yavingĩte mũomonĩ yĩvingilitĩtw'e yĩkauma vau mbũanĩ.
3
Ĩndĩ yĩla malikile nthĩnĩ mayaaĩthĩa mwĩĩ wa Mwĩai Yesũ.
4
Maendee na kũsaanĩw'a nĩ ũndũ ũsu, aũme elĩ mekĩĩte ngũa ikũtisatisa nĩmaũngamie vakuvĩ namo.
5
Aka asu me na w'ĩa mwingĩ nĩmakumanĩie nthĩ, namo aũme asu mamakũlya atĩĩ, “Nĩkĩ mũũmantha mũndũ wĩ thayũ katĩ wa ala akw'ũ?
6
Nde vaa nũthayũũkie. Kwa lilikanai ũndũ wamũtavisye yĩla waĩ Kalilii:
7
‘Mwana wa Mũndũ no nginya anenganwe kwa avĩtany'a ambwe, na ĩtina wa mĩthenya ĩtatũ aithayũũka kuma kwa akw'ũ.’ ”
8
Nĩmalilikanile ndeto isu sya Yesũ,
9
na mauma mbũanĩ mathi matavany'a maũndũ asu onthe kwa ala amanyĩw'a ĩkũmi na ũmwe na kwa andũ ala angĩ.
10
Aka asu matavisye atũmwa ũvoo ũsu nĩ Meli Makitalene, Yoena, na Meli inyia wa Yakovo o vamwe na aka angĩ maĩ namo.
11
Ĩndĩ amanyĩw'a moosa ndeto isu ta sya mana na malea kũĩkĩĩa aka asu.
12
Ĩndĩ Vetelo ookĩla asemba mbũanĩ. Nĩwakumanie akunĩkĩla nthĩnĩ, na oona ila ngũa sya kũthika mũndũ syĩ syoka. Nĩvo ĩndĩ wasyokie mũsyĩ aseng'etw'e nĩ kĩla kĩthĩwa kĩkĩkie.
13
Mũthenyanĩ o ũsu, amanyĩw'a elĩ ma Yesũ nĩmaendete ndũanĩ yĩtawa Emaũ, yĩ kĩlomita ta ĩkũmi na kĩmwe kuma Yelũsalemu.
14
Maendete makĩea ngewa ĩũlũ wa maũndũ onthe ala maneekĩkie.
15
Maendee na kũea ngewa na ũkũlany'a maũndũ, Yesũ nĩwamathengeeie na aendany'a namo.
16
Nĩmamwonie, ĩndĩ mayaamũmanya.
17
Yesũ nĩwamakũlilye atĩĩ, “Nĩ kyaũ kĩĩ mũendete mũkĩea ngewa ĩũlũ wakyo?” Namo maũngama, matukĩtye mothyũ moo.
18
Nĩvo ĩndĩ ũmwe woo ũla weetawa Kĩliovasi wamũkũlilye atĩĩ, “Noue mũeni ũla wĩkalaa Yelũsalemu ũtesĩ maũndũ ala mekĩkĩte kũu ĩvindanĩ yĩĩ?”
19
Nake Yesũ amakũlya, “Nĩ maũndũ maũ?” Namo mamwĩa atĩĩ, “Maũndũ ala maneekĩkie kwa Yesũ ũla wumĩte Nasaleti. Anaĩ mwathani na nũneesĩkĩe nĩ Ngai na andũ ta mũndũ ũnai na ũkũmũ mekonĩ make na ndetonĩ syake.
20
Athembi anene na atongoi maitũ nĩmanamũnenganie atw'ĩĩwa kũawa na ambwa ngelany'onĩ.
21
Ithyĩ tũneekwatasya kana nĩwe wĩetee andũ ma Ĩsilaeli ũthasyo! Na vamwe na ũu, ũũ nĩw'o mũthenya wa katatũ kuma maũndũ asu meethĩwa.
22
Ũndũ ũngĩ, ve aka ma nguthu yaitũ matũseng'isye mũno. Maendie mbũanĩ vaa kũitheatheana,
23
ĩndĩ mainethĩa mwĩĩ wake. Masyokie mayasya nĩmaumĩlĩĩlwa nĩ alaĩka woninĩ mamea kana nũthayũũkie.
24
Amwe ma nguthu yaitũ nĩmaendie mbũanĩ, na meethĩa maũndũ mailyĩ o ũndũ aka meĩwetete, ĩndĩ mainamwona.”
25
Nĩvo ĩndĩ Yesũ wameie atĩĩ, “Inyw'ĩ ko mũtumanĩte ata, na ko mũĩkĩĩaa na vinya ata maũndũ onthe ala maneenetwe nĩ athani!
26
Nĩkũlya, ndũnaĩ ũndũ mwaĩlu Klĩsto kũthĩnw'a na ĩndĩ ailika ũkumyonĩ wake?”
27
Nĩvo ĩndĩ Yesũ wamaeleisye maũndũ onthe ala mawetetwe ĩũlũ wake nthĩnĩ wa Maandĩko Matheu, kwambĩĩa mavukunĩ ma Mwose kũthi kũvika momanyĩsyo ma athani onthe.
28
Yĩla mathengeeie ndũanĩ ĩla maendete, Yesũ nĩweekie ta ũkũendeea na kyalo,
29
ĩndĩ amanyĩw'a asu mamwĩsũva maimwĩa atĩĩ, “Ĩkala naitũ nũndũ mũthenya nĩwathela na kĩvindu kĩendee na kwĩkusĩanĩsya.” Kwoou Yesũ ekala namo.
30
Yĩla wekalile nthĩ namo maathĩw'e, nĩwoosie mũkate na atũnga mũvea; nĩwaũtilangile na amanenga.
31
Nĩvo ĩndĩ masalukilw'e metho mamũmanya, nake aa maeka kũmwona.
32
Nĩmaneenanisye me elĩ makũlany'a atĩĩ, “Tũinew'a ngoo sitũ syambĩĩa kũvyũva yĩla ũkũneenaa naitũ twĩ nzĩanĩ aitũelesya Maandĩko Matheu?”
33
Nĩmookĩlile saanĩ o ũsu na masyoka Yelũsalemu, na meethĩa ala amanyĩw'a ĩkũmi na ũmwe mombanĩte na andũ ala angĩ maĩ namo,
34
mayasya atĩĩ, “Kwa w'o Mwĩai nũthayũũkie; nũmumĩlĩĩile Simioni!”
35
Nĩvo ĩndĩ amanyĩw'a asu elĩ namo mamaeleisye kĩla kĩkĩkie nzĩanĩ, na ũndũ mamũmanyie Yesũ yĩla ũtilangile mũkate.
36
O maendee na kũea ngewa ĩsu, Yesũ mwene nĩwaumĩlile aũngama katĩ woo na amea, “Mũuo nĩwĩthĩwe nenyu!”
37
Ĩndĩ nĩmatelemile na makwatwa nĩ w'ĩa maisũanĩa nĩ ĩimũ.
38
Yesũ nĩwamakũlilye atĩĩ, “Mũtelemetw'e nĩ kyaũ? Nĩkĩ mwĩ na nzika ngoonĩ syenyu?
39
Kwa sisyai moko makwa na maũũ, na nĩmũũmanya kana kwa w'o Ninyie. Ngwatangei na nĩmũũmanya, nũndũ ĩimũ yĩi mwĩĩ kana mavĩndĩ ũndũ mũũmbona nyie nĩ nasyo.”
40
Amina kwasya ũu, nĩwamonisye moko make na maũũ make.
41
O maendee kũlea kũĩkĩĩa nĩ mũyo na kũseng'a nĩwamakũlilye atĩĩ, “Vaa mwĩ na kĩndũ kĩĩwa?”
42
Nĩmamũnengie ĩkũyũ ĩkaange,
43
nake oosa aya masyaĩĩsye.
44
Nĩvo ĩndĩ wameie atĩĩ, “Maũndũ aa nĩmo namũtavasya yĩla naĩ nenyu, kana maũndũ onthe ala maandĩkĩtwe ĩũlũ wakwa mavukunĩ ma Mwose, ma Athani, o vamwe na ma Savulĩ, no nginya meanĩw'e.”
45
Nĩwaamũkisye ilĩko syoo maelewe nĩ Maandĩko Matheu,
46
na amea atĩĩ, “Ũũ nĩw'o kũandĩkĩtwe: Klĩsto no nginya akw'e, na no nginya athayũũke kuma kwa akw'ũ ĩtina wa mĩthenya ĩtatũ.
47
O ta ũu no nginya andũ matavw'e ũvoo ĩũlũ wa kwĩlila kwondũ wa naĩ syoo, na kũekewa naĩ ĩsyĩtwanĩ yake kwambĩĩa Yelũsalemu.
48
Inyw'ĩ mwĩ ngũsĩ sya maũndũ aa.
49
Nyie ngamũtũmĩa ũla Ĩthe wakwa wathanie, ĩndĩ ĩkalai vaa mũsyĩnĩ kũvika mũnengwe vinya kuma ĩũlũ.”
50
Nĩvo ĩndĩ Yesũ watongoeisye aatĩĩi asu make onthe mauma Yelũsalemu amatwaa Mbethani, na me vau ookĩlya moko make amaathima.
51
Aendee na kũmaathima nĩwoosiwe kuma vala maĩ ambatw'a ĩtunĩ.
52
Nĩmamũthaithie na masyoka Yelũsalemu me na ũtanu mwingĩ.
53
Ĩvinda yonthe mekalaa Ĩkalũnĩ maimũtũngĩa Ngai mũvea.
← Chapter 23
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24