bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Kamba
/
Kamba (MBIVILIA ŨVOO MŨSEO)
/
Luke 6
Luke 6
Kamba (MBIVILIA ŨVOO MŨSEO)
← Chapter 5
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 7 →
1
Mũthenya ũmwe wa Savato Yesũ aendete esĩlĩte mĩũndanĩ ya nganũ, amanyĩw'a make nĩmambĩĩie kũtw'a iia imwe na kũikiitha maiya.
2
Nĩvo ĩndĩ Avalisi amwe makũlilye atĩĩ, “Nĩkĩ mũkwĩka ũndũ ũla ũtaĩlĩte kwĩkwa mũthenyanĩ wa Savato?”
3
Yesũ nĩwamakũlilye atĩĩ, “Nũndũ inyw'ĩ mũtaasoma ũndũ Ndeviti weekie, ĩvindanĩ yĩla we na ala waĩ namo maĩ na nzaa?
4
Nĩwalikile nyũmbanĩ ya Ngai, na oosa mĩkate ĩla yathembeetwe Ngai aya, na amanenga o namo andũ ala waĩ namo maya. Ĩndĩ kwĩanana na Mĩao yaitũ, no athembi oka meetĩkĩlĩtw'e kũya mĩkate ĩsu.”
5
Nĩvo ĩndĩ Yesũ wameie atĩĩ, “Mwana wa Mũndũ e na ũkũmũ ĩũlũ wa Savato.”
6
Mũthenyanĩ ũngĩ wa Savato, Yesũ nĩwaendie nyũmbanĩ ya Ayuti ya kũthaithĩa na kũmbanĩa amanyĩsya, na vau vaĩ mũndũ kw'oko kwake kwa aũme kwaĩ kwonzu.
7
Amanyĩsya ma Mĩao na Avalisi nĩmasyaĩĩsye Yesũ mone kana nũkũvosya mũthenyanĩ wa Savato, nĩ kana makwate ũndũ mamũsikata naw'o.
8
Ĩndĩ Yesũ nĩwamanyie ũndũ mekũsũanĩa na amwĩa mũndũ ũsu waĩ na kw'oko kwonzu atĩĩ, “Ũkĩla ũũngame vaa mbee.” Mũndũ ũsu nĩwookĩlile na aũngama vau mbee.
9
Nĩvo ĩndĩ Yesũ wamakũlilye atĩĩ, “Kwĩanana na Mĩao, mũthenyanĩ wa Savato twĩtĩkĩlĩtw'e kwĩka ũndũ ũseo kana nĩ ũndũ mũthũku? Nĩ kũtetheesya mũndũ ndakakw'e kana nĩ kũmũeka akw'e?”
10
Ĩtina wa kũmasiangya onthe nĩweeie mũndũ ũsu atĩĩ, “Tambũũkya kw'oko kwaku.” Nĩwakũtambũũkisye na kwavoa.
11
Andũ asu nĩmathatie mũno na mambĩĩa kũoany'a ũndũ mekwĩkana na Yesũ.
12
Ĩvindanĩ yĩu Yesũ nĩwaendie kĩĩmanĩ akavoye, na ekala vo ũtukũ mũima akĩvoya Ngai.
13
Ũnĩ ũsu nĩwoombanisye amanyĩw'a make vamwe, na katĩ woo anyuva ĩkũmi na elĩ ala weetie Atũmwa.
14
Namo nĩ Simioni, ũla Yesũ watw'ĩĩie ĩsyĩtwa yĩngĩ amwĩta Vetelo, na Endelea mwana-a-inyia; Yakovo na Yoana; Vilivũ na Mbatholomiũ;
15
Mathayo na Tomasi; Yakovo mwana wa Aveasi, na Simioni ũla weetawa Nzelote;
16
Yutasi mwana wa Yakovo na Yutasi Ĩsikalioti, ũla wesie kũmũthoosya Yesũ.
17
Yesũ nĩwatheeie kuma kĩĩmanĩ vamwe na atũmwa asu, na aũngama vandũ vatindimalu. Vau vaĩ nguthu nene ya amanyĩw'a make na ĩkomano ĩnene ya andũ maumĩte kĩla vandũ Yutia na Yelũsalemu, na kuma ndũanĩ sya Tile na Sitoni, ila syĩ ũtee wa ũkanga.
18
Andũ asu mookĩte kũmwĩthukĩĩsya Yesũ na kũvow'a mowau moo. O namo andũ ala mathĩnaw'a nĩ maimũ nĩmavoiw'e.
19
Kĩla mũndũ ĩkomanonĩ yĩu nĩwatataa kũmũkiita Yesũ, nũndũ vinya nĩwaumaa nthĩnĩ wake na kũmavosya onthe.
20
Yesũ nĩwasyaisye amanyĩw'a make na asya atĩĩ, “Mwĩ aathime inyw'ĩ ala ngya, nũndũ ũsumbĩ wa Ngai nĩ wenyu!
21
Mwĩ aathime inyw'ĩ ala mwĩ na nzaa yu, nũndũ mũkavũnĩthw'a! Mwĩ aathime inyw'ĩ ala mũkũĩa yu, nũndũ mũkatheka!
22
“Mwĩ aathime inyw'ĩ yĩla andũ meũmũmena na kũmũlea, na kũmũumanga na kũmwanangĩa ĩsyĩtwa kwondũ wakwa nyie Mwana wa Mũndũ.
23
Ĩw'ai mũyo ĩvindanĩ yĩu na mũisũnga na ũtanu nũndũ nĩmwiĩwe ĩtuvi ĩnene ĩtunĩ. Aaũmae moo meekanie na athani oou.
24
Ĩndĩ kyeva nĩ kwenyu inyw'ĩ ala athwii, nũndũ nĩmũminĩte kũkwata ũkiakisyo wenyu!
25
Kyeva nĩ kwenyu inyw'ĩ ala mũvũny'e yu, nũndũ nĩmũkew'a nzaa! Kyeva nĩ kwenyu inyw'ĩ ala mũũtheka yu, nũndũ mũkakwatwa nĩ kyeva na kũĩa!
26
“Kyeva nĩ kwenyu inyw'ĩ yĩla andũ onthe meũmũneenea nesa, nũndũ ũu now'o aaũmae moo meekanie na athani ma ũvũngũ.
27
“Ĩndĩ ekai nĩmũtavye inyw'ĩ ala mũmbĩthukĩĩsye: Mendei amaitha menyu na mekaei nesa andũ ala mamũmenete;
28
athimaai ala mamũumanĩaa na mũivoyea ala mamũumangaa.
29
Mũndũ akũkũna ĩtau yĩmwe, mũthyũũĩe yĩla yĩngĩ o nayo. Mũndũ akũvena ĩkoti yaku, ndũkamũsiĩĩe ayosa sati yaku o nayo.
30
Mũndũ akũvoya kĩndũ mũnenge, na mũndũ akũvena syĩndũ syaku ndũkamwĩe nĩakũtũngĩe.
31
Kwoou ĩkaai andũ ala angĩ ũndũ mwenda mo mamwĩkae.
32
“Ethĩwa mũkamenda o andũ ala mamwendete, mwĩ na ũseo mwaũ? O namo avĩtany'a tyo mendete andũ ala mamendete?
33
Na ethĩwa mwĩkaa nesa o andũ ala mamwĩkaa nesa, mwĩ na ũseo mwaũ? O namo avĩtany'a tyo mekaa oou?
34
Na ethĩwa mũkovethasya o andũ ala mũkwĩkwatya kana makamũĩva, mwĩ na ũseo mwaũ? O namo avĩtany'a tyo makovethasya avĩtany'a angĩ mematũngĩa o kĩthimo kĩu?
35
Kwoou inyw'ĩ mendei amaitha menyu, mũmekae nesa, na kũmakovethasya mũtekwĩkwatya kana makamũĩva. Nĩvo ĩndĩ ĩtuvi yenyu yĩkethĩwa yĩ ĩnene, na mũkeethĩwa mwĩ syana sya Ũla wĩ Ĩũlũ Mũno. Nũndũ we e ĩnee kwa andũ mate mũvea na kwa andũ athũku.
36
Ĩthĩwai na tei, o tondũ Ĩthe wenyu wĩ tei.
37
“Mũikasilĩle andũ ala angĩ, nenyu mũikasilĩlwa nĩ Ngai; mũikatw'ĩĩe andũ ala angĩ ũthũku, nenyu mũikatw'ĩĩwa ũthũku nĩ Ngai; ekeai andũ ala angĩ, nenyu mũkaekewa nĩ Ngai.
38
Nengai andũ kĩla mekwenda, nenyu mũkanengwa nĩ Ngai. Ĩĩ, mũkakwata mokonĩ menyu kĩthimo kyusũu, kĩlate, kĩthingithangye, o na kĩkwĩtĩkanga. Nĩkwĩthĩwa o ũndũ mwĩkaa andũ ala angĩ, now'o o nake wĩmwĩka.”
39
Yesũ nĩwasyokie amatavya ngelekany'o ĩno: “Kĩlalinda nĩkĩtonya kũtongoesya kĩngĩ? Aiee! Syelĩ ikavalũka ĩimanĩ.
40
Mũmanyĩw'a ti mũnene kwĩ mũmanyĩsya wake, ĩndĩ mũmanyĩw'a o na wĩva ũla wamina kĩmanyĩsyo ekalaa ta mũmanyĩsya wake.
41
“Nĩkĩ ũkwona kaũvavathĩ ke ithonĩ ya mũnyanyau, na ndũkwona kĩting'ĩ kĩla kĩ ithonĩ yaku?
42
Ũtonya ata kwĩa mũnyanyau, ‘Mũnyanyawa, eka ngumye kaũvavathĩ ke ithonĩ yaku,’ na ndũkwona kĩting'ĩ kĩla kĩ ithonĩ yaku? We mũndũ wa mĩseũvyo! Amba kumya kĩting'ĩ kĩu kĩ ithonĩ yaku, na ĩndĩ nũkwĩthĩwa ũtonya kwona nesa na kumya kaũvavathĩ ithonĩ ya mũnyanyau.
43
“Mũtĩ mũseo ndũsyaa ũsyao mũthũku, na mũtĩ mũthũku ndũsyaa ũsyao mũseo.
44
Kĩla mũtĩ ũmanyĩkaa ũndũ ũilyĩ kwĩsĩla ũsyaonĩ wa w'o. Ndũtonya kũtw'a makũyũ kĩkondunĩ kana ũkatw'a nzavivũ kĩthiianĩ.
45
Mũndũ mũseo aumasya maũndũ maseo ala me ngoonĩ yake, nake mũndũ mũthũku aumasya maũndũ mathũku ala me ngoonĩ yake. Nũndũ mũndũ aneenaa maũndũ ala mausũĩte ngoonĩ yake.
46
“Mũtindĩaa kũmbĩta, ‘Mwĩai, Mwĩai,’ nĩkĩ na mũyĩkaa ũndũ nĩmũtavasya?
47
Nĩngũmwony'a ũndũ mũndũ ũla wũkaa kwakwa, akethukĩĩsya momanyĩsyo makwa na kwĩka ũndũ mekwasya ũilyĩ:
48
Ailyĩ mũndũ ũmwe waakaa nyũmba, ũla wenzie mũsingi mũliku, na ambĩĩa kũwaka kuma ĩvianĩ. Ũsĩ nĩwausũie kĩw'ũ kyakĩla na kyathi kyakima ĩla nyũmba, ĩndĩ kĩyaamĩthingithya nĩkwĩthĩwa yaakĩtwe nesa.
49
Ĩndĩ nake mũndũ ũla wĩthukĩĩasya momanyĩsyo makwa na ailea kwĩka ũndũ mekwasya, ailyĩ mũndũ ũmwe ũla waakie nyũmba ĩte mũsingi. Yĩla ũsĩ wakĩlile na kĩw'ũ kyathi kyakima ĩla nyũmba, yavalũkile o vau kwa vau na yaanangĩka vyũ!”
← Chapter 5
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 7 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24