bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Kamba
/
Kamba (MBIVILIA ŨVOO MŨSEO)
/
Luke 5
Luke 5
Kamba (MBIVILIA ŨVOO MŨSEO)
← Chapter 4
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 6 →
1
Mũthenya ũmwe Yesũ nĩwaũngeme ũtee wa Ĩia ya Ngenesaleti, na andũ aingĩ mũno nĩmavivinyanĩaa vala ũĩ methukĩĩsye ndeto ya Ngai.
2
Nĩwoonie masiwa elĩ maiĩtwe ũtee wa ĩia, na atei ma makũyũ mamatiĩte makathi kũthambya itei syoo.
3
Yesũ nĩwalikile ĩsiwanĩ yĩmwe yamo, nayo yaĩ ya Simioni, na amũkũlya ayĩtwaange kĩw'ũnĩ vanini kuma ũtee wa ĩia. Nĩwekalile nthĩ na amanyĩsya andũ e ĩsiwanĩ yĩu.
4
Amina kũneena nĩwamwĩie Simioni atĩĩ, “Twaa ĩsiwa kĩw'ũnĩ vala valiku, na mũilikya itei syenyu mũkwatye makũyũ.”
5
Simioni amũsũngĩa amwĩa atĩĩ, “Mwĩai, tũteie makũyũ ũtukũ w'onthe na tũinakwatya kĩndũ! Ĩndĩ nũndũ nĩwasya ũu nĩngũlikya itei kĩw'ũnĩ.”
6
Yĩla meekie ũu, nĩmakwatisye makũyũ maingĩ mũno kũvikĩa itei syoo syeew'a kũtw'ĩka.
7
Kwoou mamokĩlĩlya moko atei ala angĩ maĩ ngwatanĩo namo me ĩsiwanĩ yĩngĩ moke kũmatetheesya. Nĩmookie na mausũsya masiwa asu elĩ na makũyũ, kũvikĩa masiwa asu mambĩĩa kwenda kũlika kĩw'ũnĩ.
8
Yĩla Vetelo woonie ũndũ ũsu, nĩwatulilye ndu mbee wa Yesũ na amwĩa atĩĩ, “Mwĩai uma vaa nĩĩ nũndũ nyie nĩ mũvĩtany'a.”
9
Simioni na ala angĩ waĩ namo nĩmaseng'iw'e mũno nũndũ wa wingĩ wa makũyũ ala makwatisye.
10
O namo Yakovo na Yoana ana ma Nzevetii, ala maĩ ngwatanĩo na Simioni maseng'ie oou. Yesũ nĩweeie Simioni atĩĩ, “Eka kũkĩa, kuma yu ũkakwatasya andũ.”
11
Mamina kũtwaa masiwa moo ũtee wa ĩia, nĩmatiie syĩndũ syonthe na mamũatĩĩa Yesũ.
12
Ĩvinda yĩmwe Yesũ e ndũanĩ ĩmwe ya kũu, nĩvookie mũndũ ũmwe waĩ mũwau mangũ mũno. Mũndũ ũsu amwona Yesũ, nĩwakomie nthĩ na ĩvu na amwĩsũva aimwĩa atĩĩ, “Mwĩai, ethĩwa nũkwenda nũtonya kũmbosya ngathea.”
13
Yesũ nĩwatambũũkisye kw'oko amũkwata na amwĩa atĩĩ, “Ĩĩ, nĩngwenda. Ĩthĩwa mũtheu!” Vau kwa vau nĩwavoiw'e ũwau ũsu vyũ.
14
Nĩvo ĩndĩ Yesũ wamwĩie atĩĩ, “Ndũkatavye mũndũ o na ũmwe ũndũ ũũ. Ĩndĩ ũkeyonany'e kwa mũthembi aĩkĩĩthye kana wĩ mũvou, na ũyumya nthembo kwĩanana na Mĩao ya Mwose nĩ kana kĩla mũndũ amanye wĩ mũvou.”
15
Ĩndĩ ũvoo ĩũlũ wa Yesũ nĩwanyaĩĩkie mũno kũndũ kwingĩ, na andũ aingĩ nĩmoombanaa nĩ kana mamwĩthukĩĩsye na maivow'a mowau moo.
16
Ĩndĩ Yesũ no wamatiaa akathi vandũ vate andũ akavoye.
17
Mũthenya ũmwe Yesũ aendee kũmanyĩsya andũ, Avalisi amwe na amanyĩsya ma Mĩao nĩmailyĩ nthĩ o vau, namo maumĩte kĩla ndũa yĩ Kalilii na Yutia, o na kuma Yelũsalemu. Vinya wa Mwĩai wa kũvosya waĩ vamwe nake.
18
Nĩvo ĩndĩ aũme amwe mookie makuĩte na ũkomo mũndũ waĩ na mamutha monzu. Nĩmatatie kũmũlikya nyũmba mamwie mbee wa Yesũ,
19
ĩndĩ mayaaona kamwanya mamũlikĩlya, nũndũ wa mũvivinyano wa andũ. Kwoou nĩmamũkuie malĩsa kĩalanĩ ĩũlũ, na makĩthasya veethĩwa ĩima. Nĩvo ĩndĩ mamũtheelelye vau e ũkomonĩ mamwia mbee wa Yesũ katĩkatĩ wa andũ.
20
Yesũ oona ũndũ me na mũĩkĩĩo wingĩvĩte, nĩweeie mũndũ ũsu waĩ na ũwau wa kwaa mamutha atĩĩ, “Mũnyanyawa, nĩwaekewa naĩ syaku!”
21
Nĩvo ĩndĩ ala amanyĩsya ma Mĩao na Avalisi mambĩlĩĩlye kwĩkũlya atĩĩ, “We mũndũ ũũ nũũ ũkũneena ndeto sya kũmũuma Ngai? Vai mũndũ ũtonya kũekea andũ naĩ syoo ate o Ngai!”
22
Yesũ nĩwamanyie ũndũ meũsũanĩa na amakũlya atĩĩ, “Mwĩsũanĩa maũndũ ma mũthemba ũsu ngoonĩ syenyu nĩkĩ?
23
Nĩ ũndũ wĩva ũla wĩ laisi: Nĩ kwasya, ‘Nĩwaekewa naĩ syaku,’ kana nĩ kwasya, ‘Ũkĩla ũthi?’
24
Nĩngũmwony'a yu kana Mwana wa Mũndũ e na ũkũmũ kũũ nthĩ wa kũekea andũ naĩ syoo!” Kwoou nĩweeie mũndũ ũsu waĩ na mamutha monzu atĩĩ, “Ũkĩla! Osa ũkomo waku na ũyĩnũka.”
25
Mũndũ ũsu nĩwookĩlile na mĩtũkĩ andũ onthe mene, oosa ũkomo wake na enũka aimũkumya Ngai.
26
Andũ nĩmaseng'ie mũno, na me na w'ĩa mamũkumya Ngai mayasya atĩĩ, “Nĩtwoona maũndũ ma kũseng'ya ũmũnthĩ!”
27
Ĩtina wa ũu, Yesũ nĩwaumaalile na oona mumĩthya ũmwe wa koti weetawa Livai, ailyĩ ovisinĩ wa kumĩthĩsya koti. Yesũ nĩwamwĩie atĩĩ, “Ngatĩĩa.”
28
Nake ookĩla, atia syĩndũ syonthe na amũatĩĩa.
29
Nĩvo ĩndĩ Livai weethĩiwe na mboka nene mũsyĩ kwake aseũvĩsye Yesũ, na vaĩ nguthu nene ya aumĩthya ma koti na andũ angĩ maĩsaa nake.
30
Avalisi amwe na amanyĩsya ma Mĩao ala maĩ ma nguthu yoo, nĩmanyungunyĩisye kũla kwĩ amanyĩw'a ma Yesũ mayasya atĩĩ, “Nĩkĩ mũkũĩsanĩa na kũnyusanĩa na aumĩthya ma koti na eki ma naĩ?”
31
Yesũ amasũngĩa amea atĩĩ, “Andũ mate awau mai na vata wa ndakĩtalĩ; ala me na vata wake no ala awau.
32
Nyie ndyaaũka kwĩta andũ ala alũngalu, ĩndĩ nookie kwĩta avĩtany'a melile kwondũ wa naĩ syoo.”
33
Nĩvo ĩndĩ andũ amwe mamwĩie Yesũ atĩĩ, “Amanyĩw'a ma Yoana o vamwe na amanyĩw'a ma Avalisi nĩmatĩĩaa kũya mavinda kwa mavinda na kũvoya, ĩndĩ mo aa maku mayĩsaa kũeka kũya na kũnyw'a.”
34
Yesũ nĩwamakũlilye atĩĩ, “Inyw'ĩ nĩmũtonya kwĩa anyanyae ma mũtwaani nĩmatĩĩe kũya yĩla wĩ o vamwe namo?
35
Ĩndĩ ĩvinda nĩyũkĩte yĩla mũtwaani wĩvetangwa vala maĩ; ĩvindanĩ yĩu makatĩĩa kũya.”
36
Yesũ nĩwasyokie amatavya ngelekany'o ĩno: “Vai mũndũ ũtilaa kĩlaka ngũanĩ nzaũ akakĩtumĩĩa ngũanĩ ngũũ; akeka ũu, ethĩwa atembũa ngũa ĩsu nzaũ na kĩlaka kĩu kyaumw'a vo kĩyosana na ĩsu ngũũ.
37
O ta ũu vai mũndũ wĩkĩaa ndivai nzaũ ikuunĩ ngũũ; akeka ũu ndivai ĩsu nzaũ no yatũe ikuu isu na ĩyĩtĩka, nasyo ikuu iyanangĩka.
38
Kwoou no nginya ndivai nzaũ yĩkĩwe ikuunĩ nzaũ!
39
O na vai mũndũ ĩtina wa kũnyw'a ndivai ngũũ wendaa kũnyw'a ndivai nzaũ, ĩndĩ aasya, ‘Ĩla ngũũ nĩyo nzeo.’ ”
← Chapter 4
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 6 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24