bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Kamba
/
Kamba (MBIVILIA ŨVOO MŨSEO)
/
Matthew 13
Matthew 13
Kamba (MBIVILIA ŨVOO MŨSEO)
← Chapter 12
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 14 →
1
Mũthenya o ũsu, Yesũ nĩwaumie nyũmbanĩ ĩsu athi ekala nthĩ ũtee wa ĩia.
2
Ĩkomano yĩla yamũthyũlũlũkĩte yaĩ ĩnene mũno na kwoou ookĩla alika ĩsiwanĩ na ekala nthĩ vo, namo andũ onthe maũngama ũtee wa ĩia.
3
Nĩwamatavisye maũndũ maingĩ aitũmĩa ngelekany'o. Nĩwameie atĩĩ, “Mũĩmi ũmwe nĩwaendie kũvuĩa mbeũ.
4
Akĩvuĩa, mbeke imwe nĩsyavalũkile nzĩanĩ, na nyũnyi syooka na syaiya.
5
Ingĩ nĩsyavalũkile mavianĩ. O mĩtũkĩ nĩsyameie nũndũ iyavw'ĩkĩtwe nĩ mũthanga mwingĩ.
6
Yĩla syũa yaaie, nĩsyavovie na syooma, nĩkwĩthĩwa mĩi yasyo ndyaĩ mĩliku.
7
Mbeke ingĩ nĩsyavalũkile mĩw'anĩ na syamea, na yĩla mĩw'a yathongooie na yeana, yainyita.
8
Ĩndĩ mbeke ingĩ nĩsyavalũkile mũthanganĩ mũseo na syasyaa ũsyao mwingĩ: Imwe mbeke ĩana, ingĩ mĩongo thanthatũ, na ingĩ mĩongo ĩtatũ.”
9
Yesũ aiminũkĩlya nĩwameie atĩĩ, “Ũla wĩ kũtũ, nĩew'e.”
10
Nĩvo ĩndĩ amanyĩw'a mamũthengeeie Yesũ mamũkũlya atĩĩ, “Nĩkĩ ũtũmĩaa ngelekany'o yĩla ũũneena na andũ?”
11
Yesũ amasũngĩa amea atĩĩ, “Inyw'ĩ nĩmũnengetwe kũmanya syĩmbithĩ sya ũsumbĩ wa ĩtu, ĩndĩ mo mainengetwe.
12
Nũndũ mũndũ ũla wĩ na kĩndũ, akongeleelwa nĩ kana aingĩvĩwe, ĩndĩ ũla ũte na kĩndũ, o na kala kanini wĩ nako, akavenwa.
13
Nĩneena namo na ngelekany'o nũndũ nĩmekũsisya ĩndĩ maikwona, na nĩmekwĩthukĩĩsya ĩndĩ maikwĩw'a kana kũelewa.
14
Kwoou wathani wa Ĩsaia nĩwĩanĩĩw'e kwoo ũla waasya: ‘Mũkatindĩaa kwĩthukĩĩsya ĩndĩ mũikaelewa, na mũkatindĩaa kũketeea, ĩndĩ mũikona.
15
Nũndũ ilĩko sya andũ aa nĩ ngomu, na matũ moo mayĩw'a kĩndũ, na nĩmavingĩte metho moo. Kethĩwa ti ũu, no mone na metho moo, na makew'a na matũ moo, na makaelewa ilĩkonĩ syoo, na mainzyokea nyie Ngai, nakwa ngĩmavosya.’
16
“Ngalĩkonĩ ĩla yenyu, inyw'ĩ mwĩ aathime, nũndũ metho menyu nĩmekwona na matũ menyu nĩmekwĩw'a.
17
Nĩmũtavya w'o, athani aingĩ na andũ angĩ aingĩ aseo methonĩ ma Ngai, nĩmendaa mũno kwona kĩla inyw'ĩ mwene, ĩndĩ mayaakyona, na nĩmendaa kwĩw'a kĩla inyw'ĩ mũkwĩw'a, ĩndĩ mayaakĩw'a.
18
“Ĩthukĩĩsyei ĩndĩ ũelesyo wa ngelekany'o ya mũĩmi.
19
Andũ ala mew'aa ndeto ĩũlũ wa ũsumbĩ wa Ngai ĩndĩ mailea kũelewa, mavw'ana mbeke ila syavalũkile nzĩanĩ. Ũla Mũthũku nĩwũkaa na kũvulya kĩla kĩvandĩtwe ngoonĩ syoo.
20
Nasyo mbeke ila syavalũkile mavianĩ, nĩ andũ ala mew'aa ĩla ndeto na maimyosa o mĩtũkĩ na ũtanu;
21
ĩndĩ ti ndiku mathayũnĩ moo na ndĩkalaa ĩvinda ĩasa. Kwoou yĩla thĩna kana ũnyamao wooka nũndũ wa ĩla ndeto, o mĩtũkĩ nĩmekasya ngoo na kũmĩtia.
22
Mbeke ila syavalũkile mĩw'anĩ nĩ andũ ala mew'aa ndeto, ĩndĩ kwĩmakĩa kwoo na kwenda ũthwii kũinyita ndeto ĩsu na mailea kwĩthĩwa na ũsyao.
23
Nasyo mbeke ila syavalũkile mũthanganĩ mũseo, nĩ andũ ala mew'aa ndeto na kũmĩelewa. Nĩmethĩawa na ũsyao mũseo: Amwe kũndũ ĩana, angĩ kũndũ mĩongo thanthatũ, na angĩ kũndũ mĩongo ĩtatũ.”
24
Yesũ nĩwatavisye andũ ngelekany'o ĩngĩ amea atĩĩ, “Ũsumbĩ wa ĩtu no ũvw'ananw'e na mũndũ ũmwe ũla wavũĩie mbeũ nzeo ya nganũ mũũndanĩ wake.
25
Ĩndĩ andũ onthe makomete, mũmaitha wake nĩwookie na avuĩa ĩthaa ĩla nganũnĩ na athi.
26
Yĩla nganũ yameie na yaumya iia, nĩvo ĩndĩ nayo ĩthaa yamanyĩkie.
27
Athũkũmi ma mwene mũũnda nĩmaendie vala ũĩ mamwĩa atĩĩ, ‘Mũnene, mbona wavuĩie mbeũ nzeo mũũndanĩ waku, ĩthaa yĩnaumie va?’
28
Nake amasũngĩa amea atĩĩ, ‘Yavuĩiwe nĩ mũmaitha.’ Namo mamũkũlya, ‘Na nũkwenda tũthi tũkayĩkũange?’
29
Amea, ‘Aiee, mũikayĩkũange mũikese kũyĩkũanĩsya na nganũ.
30
Ekai syelĩ syĩane vamwe nginya ĩvinda ya ngetha. Ĩvindanĩ yĩu, ngatavya akethi nĩmambe ũkũa ĩthaa, mayũmbe mavumbu na maiyĩvĩvya, na ĩndĩ mayũmbany'a nganũ mamĩkĩe ĩkũmbĩnĩ yakwa.’ ”
31
Yesũ nĩwatavisye andũ ngelekany'o ĩngĩ amea atĩĩ, “Ũsumbĩ wa ĩtu no ũvw'ananw'e na mũndũ ũmwe ũla woosie mbeũ ĩla niini vyũ amĩvanda mũũndanĩ wake.
32
O na kau mbeũ ĩsu nĩyo niini vyũ kwĩ mbeũ ila ingĩ, yamea nĩnenevaa ĩkatw'ĩka mũtĩ mũnene kwĩ mĩmea ĩla ĩngĩ yĩ mũũndanĩ, o na nyũnyi ikokaa kwaka ndala mbongenĩ syaw'o.”
33
O ĩngĩ nĩwamatavisye ngelekany'o ĩngĩ amea atĩĩ, “Ũsumbĩ wa ĩtu no ũvw'ananw'e na mũndũ mũka ũmwe ũla woosie mũtu wa maleve elĩ na nyusu awũindanĩsya na mbota na w'onthe waimba.”
34
Yesũ atavisye andũ maũndũ asu onthe aitũmĩa ngelekany'o. Kwa w'o vai ũndũ waamatavya ateũtũmĩa ngelekany'o.
35
Eekie ũu nĩ kana eanĩsye kĩla Ngai waneenete kwĩsĩla kwa mwathani akasya: “Nganeena namo na ngelekany'o; ngamavuanĩsya maũndũ mataamanyĩka kuma nthĩ yoombwa.”
36
Yesũ nĩwataanĩisye na ĩkomano na asyoka nyũmba e na amanyĩw'a make. Me vau nyũmba, amanyĩw'a make nĩmamũthengeeie mamwĩa atĩĩ, “Tũelesye ĩla ngelekany'o ya ĩthaa yavuĩiwe nganũnĩ.”
37
Nake amasũngĩa amea atĩĩ, “Mũndũ ũsu wavuĩie mbeũ nzeo nĩ Mwana wa Mũndũ.
38
Mũũnda ũsu nĩ kũũ nthĩ. Mbeũ ĩla nzeo, nĩ andũ ala metĩkĩlĩte Ũvoo wa ũsumbĩ. Ĩthaa nayo nĩ andũ ala masumbĩkĩtwe nĩ Ũla Mũthũku,
39
nake nĩwe ũla mũmaitha wa kĩima wavuĩie ĩthaa. Ĩvinda ya ngetha nĩ mũthenya wa mũminũkĩlyo, na akethi nĩ alaĩka.
40
O tondũ ĩthaa yũmbanaw'a na kũvĩvw'a, now'o kũkethĩwa mũthenya wa mũminũkĩlyo.
41
Mwana wa Mũndũ nũkatũma alaĩka make makombany'e kuma ũsumbĩnĩ wake, andũ onthe ala mekaa naĩ kana kũtuma andũ angĩ meka naĩ.
42
Makamekya ĩianĩ ya mwaki vala vakethĩwa kũĩa na kũvevetany'a maeo.
43
Nĩvo ĩndĩ namo andũ ala alũngalu makatisa ta syũa me ũsumbĩnĩ wa Ĩthe woo. Ũla wĩ kũtũ nĩew'e.
44
“Ũsumbĩ wa ĩtu no ũvw'ananw'e na mũndũ ũmwe ũla woonie kĩndũ kya thooa mũnene kĩvithĩtwe vandũ kĩthekanĩ. Nĩwakĩvithĩĩie, na e na ũtanu mũnene, athi athoosya syĩndũ syonthe ila waĩ nasyo, na athooa kĩtheka kĩu.
45
“O ĩngĩ, ũsumbĩ wa ĩtu no ũvw'ananw'e na mũmanthi ũmwe mũnene ũla waendie kũmantha mavia ma thooa mũnene.
46
Yĩla woonie yĩmwe ĩseo mũno, nĩwaendie na athoosya syĩndũ syonthe ila waĩ nasyo na ayĩthooa.
47
“O ĩngĩ, ũsumbĩ wa ĩtu no ũvw'ananw'e na atei amwe ma makũyũ, ala malikilye kĩtei kyoo ĩianĩ na kyakwatya makũyũ ma kĩla mũthemba.
48
Kyamina kusũa, nĩmakĩkusisye makyumya ũtee, na mekala nthĩ mambĩĩa kũnyuvany'a ala maseo mekĩĩte ikavũnĩ, na ala mathũku mekĩtye ĩtheka.
49
Ũu nĩw'o kũkethĩwa kũilyĩ ĩvindanĩ ya mũminũkĩlyo. Alaĩka ma Ngai nĩmakoka mavathany'e andũ ala athũku na ala aseo methonĩ ma Ngai.
50
Alaĩka makekya ala athũku ĩianĩ ya mwaki vala vakethĩwa kũĩa na kũvevetany'a maeo.”
51
Nĩvo ĩndĩ Yesũ wakũlilye amanyĩw'a make atĩĩ, “Nĩmwaelewa nĩ maũndũ asu onthe?” Namo mamwĩa atĩĩ, “Ĩĩ, nĩtwaelewa.”
52
Yesũ nĩwameie atĩĩ, “Kĩla mũmanyĩsya wa Mĩao ũla watw'ĩka mũmanyĩw'a nthĩnĩ wa ũsumbĩ wa ĩtu, ailyĩ mwene wa mũsyĩ ũla wumaalasya mĩio yake ĩla mĩkũũ na ĩla myeũ kuma vala wiaa mĩio yake.”
53
Yesũ amina kũneena na ngelekany'o isu, nĩwaumie vau athi
54
ndũanĩ yake ya mũsyĩ. Nĩwamanyĩisye kũu nyũmbanĩ ya Ayuti ya kũthaithĩa na kũmbanĩa, na onthe ala mamwĩthukĩĩisye maseng'a mũno na makũlany'a atĩĩ, “Mũndũ ũũ aumĩtye ũĩ ũũ na ũtonyi wa kwĩka syama ii va?
55
Ũũ we tyo mwana wa ũla vundi wa mbwaũ, na inyia wake tyo Meli, na ana-a-inyia make tyo tũmesĩ, na no Yakovo na Yosevu, Simioni na Yutasi?
56
O na eĩtu-a-inyia make tũyĩkalaa o namo kũũ? Aumĩtye va ĩndĩ maũndũ aa onthe?
57
Kwondũ wa ũu nĩmamũleile Yesũ.” Ĩndĩ Yesũ amea atĩĩ, “Mwathani nũnengawe ndaĩa kĩla vandũ, ate o ndũanĩ yake na andũnĩ ma nyũmba yake.”
58
Ndaaĩka syama mbingĩ kũu nũndũ andũ asu mayaamũĩkĩĩa.
← Chapter 12
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 14 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28