Matthew 18

Kamba (MBIVILIA ŨVOO MŨSEO)

← Chapter 17 Jump to: Chapter 19 →

1Ĩvindanĩ o yĩu amanyĩw'a nĩmaendie vala ve Yesũ mamũkũlya atĩĩ, “Nũũ ũla ũkethĩwa e mũnene ũsumbĩnĩ wa ĩtu?”

2Yesũ nĩweetie kana kanini akaũngamya mbee woo,

3na amea atĩĩ, “Nĩmũtavya w'o, mwaema kwĩnyivya mwĩkale ta syana nini, mũikalika nongi ũsumbĩnĩ wa ĩtu.

4Ũla wĩnyivasya akekala ta kana kaa, akeethĩwa e mũnene ũsumbĩnĩ wa ĩtu.

5Ũndũ ũngĩ, ũla ũthokasya o na kana ta kaa kwondũ wakwa, ethĩawa anthokya.

6“Ethĩwa ve mũndũ ũkatuma ũmwe wa aa anini mambĩtĩkĩlaa aluluutĩka, aĩlĩtwe nĩ kwoveewa ĩvia ĩnene ngingo na ayĩkw'a ũkanganĩ vala valiku mũno.

7Nĩ kyeva kũũ nthĩ kwĩthĩwa kwĩ syĩndũ ituma andũ maluluutĩka! Nasyo syĩndũ isu no nginya ikethĩwa vo, ĩndĩ kyeva nĩ kwa mũndũ ũla ũkatuma mũndũ ũngĩ aluluutĩka!

8“Ethĩwa kw'oko kwaku kana kũũ kwaku kũkatuma ũluluutĩka, kũtile ũkwĩkye ĩtheka! Nĩ kavaa kũlika thayũnĩ ũtathela wĩ na kĩmuthu kya kw'oko kana kya kũũ, kũte kwĩthĩwa na moko elĩ na maũũ elĩ na ũyĩkw'a mwakinĩ wa tene na tene.

9Ethĩwa itho yaku yĩkatuma ũluluutĩka, yĩthong'olye ũyĩkye ĩtheka! Nĩ kavaa kũlika thayũnĩ ũtathela wĩ na nthongo, kũte kwĩthĩwa na metho elĩ na ũyĩkw'a ĩianĩ ya mwaki.

10“Sisyai mũikavũthye ũmwe wa aa anini, nũndũ nyie nĩmũtavya kana alaĩka ala mamasũvĩaa nĩmamũvikĩaa Ĩthe wakwa ũla wĩ ĩtunĩ. [

11Mwana wa Mũndũ ookie kũtangĩĩa andũ ala au.]

12“Kwa sũanĩai, mũndũ e na malondu ĩana, na yĩmwe yĩyaa, ekaa ata? Nũtiaa ala mĩongo kenda na kenda o maendee na kũya, na aithi akamanthe yĩu yau.

13Ayona, nĩmũtavya w'o, nũtanaw'a mũno nĩyo kũthonoka ũndũ ũtanaw'a nĩ ala mĩongo kenda na kenda matanaa.

14O ta ũu, Ĩthe wakwa ũla wĩ ĩtunĩ ndendaa ũmwe wa aa anini ayaa.

15“Ethĩwa mwana-a-asa nũkũvĩtĩsye, enda ũmwĩkalye nthĩ ũmũtavye ĩvĩtyo yake mwĩ vandũ mwĩ o elĩ. Akwĩthukĩĩsya, wĩĩthĩwa wamũtũngĩĩa.

16Ĩndĩ aema ũkwĩthukĩĩsya, enda wĩte mũndũ ũngĩ ũmwe kana elĩ mũendany'e, nĩ kana wĩanĩsye ũndũ Maandĩko Matheu mawetete makasya, ‘Kĩla kĩũneenewa kĩĩkĩĩthw'e nĩ ũkũsĩ wa andũ elĩ kana atatũ.’

17Aema kwĩthukĩĩsya asu, enda ũtavye ĩkanisa ũndũ ũsu. Ĩndĩ aema kwĩthukĩĩsya ĩkanisa, mwose ta mũndũ-wa-mbaĩ-ingĩ, kana ta mumĩthya wa koti.

18“Nĩmũtavya w'o, ũndũ o na wĩva ũla mũkova kũũ ĩũlũ wa nthĩ, ũkoovwa ĩtunĩ; na ũndũ o na wĩva ũla mũkathasya kũũ ĩũlũ wa nthĩ, ũkathaw'a ĩtunĩ.

19“Nĩngũmũtavya ũndũ ũngĩ: Ĩvinda o na yĩva yĩla elĩ menyu kũũ ĩũlũ wa nthĩ makew'ana mavoye ĩũlũ wa ũndũ o na wĩva, ũndũ ũsu ũkeanĩw'a kwoo nĩ Ĩthe wakwa ũla wĩ ĩtunĩ.

20Nĩkwĩthĩwa, vala elĩ kana atatũ makombana kwondũ wa ĩsyĩtwa yakwa, o nakwa ngeethĩwa vo katĩ woo.”

21Nĩvo ĩndĩ Vetelo wookĩlile amũkũlya Yesũ atĩĩ, “Mwĩai, ethĩwa mwana-a-asa atindĩaa kũmbĩka naĩ, naĩlĩte kũmũekea mavinda meana ata? Nĩ mavinda mũonza?”

22Yesũ amũsũngĩa amwĩa atĩĩ, “Aiee, ti mavinda o mũonza, ĩndĩ nĩ mĩongo mũonza kũndũ mũonza.

23Namũtavya ũu nĩkwĩthĩwa ũsumbĩ wa ĩtu no ũvw'ananw'e na mũsumbĩ ũmwe ũla waendie kũsisya thiĩ ũla wataĩte kĩla ũmwe wa athũkũmi make.

24Yĩla wambĩlĩĩlye ũndũ ũsu, nĩwaeteiwe mũthũkũmi ũmwe waĩ na thiĩ nake wa mbesa sya talendi ngili ĩkũmi.

25Mũthũkũmi ũsu ndaĩ na mbesa isu ũndũ ũĩva mũsumbĩ. Kwoou mũsumbĩ aumya mwĩao mũthũkũmi ũsu, vamwe na mũka na syana syake mathoow'e ta ngombo. O ta ũu, nĩwaisye syĩndũ syonthe ila mũthũkũmi ũsu waĩ nasyo nithoow'e, na ĩndĩ mbesa isu iitũmĩwa kũĩva thiĩ ũsu.

26Mũthũkũmi ũsu nĩwatulilye ndu mbee wa mũsumbĩ na amwĩsũva ayasya atĩĩ, ‘Mbũmĩĩsye oou, na nĩngũkũĩva kyonthe kĩla ũndaĩte.’

27Mũsumbĩ nĩwamwĩw'ĩie tei, na kwoou amũekea thiĩ wake w'onthe na amũeka athi.

28“Mũthũkũmi ũsu aendete, nĩwakomanie na ũmwe wa athũkũmi ala angĩ weethĩawa namo, nake aĩ na thiĩ wake wa ndinalĩ ĩana. Nĩwamũkwatie mĩmeo amwita amwĩĩte, ‘Ndĩve oyu mbesa ila ngũtaĩte!’

29Mũthũkũmi ũsu waĩ na thiĩ wa ndinalĩ ĩana, nĩwatulilye ndu na amwĩsũva ayasya atĩĩ, ‘Mbũmĩĩsye oou, na nĩngũkũĩva!’

30Mũthũkũmi ũsu ndaamwĩthukĩĩsya, ĩndĩ amũtwaa oovwa yela kũvikĩa yĩla wĩĩva thiĩ ũsu w'onthe.

31“Yĩla athũkũmi ala angĩ moonie ũndũ kweekĩka, nĩmeewie woo mũno na mathi matavya mũsumbĩ ũvoo ũsu.

32Nĩvo ĩndĩ mũsumbĩ weetie mũthũkũmi ũsu wamũekeie thiĩ wake amwĩa atĩĩ, ‘We wĩ mũndũ mũthũku mũno! Ngũekeie thiĩ waku w'onthe nũndũ nũmbĩsũvie.

33We ndwĩĩaĩlĩte kũmwĩw'ĩa tei mũthũkũmi ũla ũngĩ o ũndũ nyie ngwĩw'ĩie tei?’

34Mũsumbĩ nĩweewie woo mũno na anengane mũthũkũmi ũsu ekw'e yela, na aithĩnw'a kũvikĩa yĩla wĩĩva thiĩ wake w'onthe.

35Ũu now'o Ĩthe wakwa ũla wĩ ĩtunĩ ũkekana na kĩla ũmwe wenyu, aema kũmũekea mwana-a-ĩthe kuma ngoonĩ.”

← Chapter 17 Jump to: Chapter 19 →

Recommended Reading

Commentary Matthew Commentaries → Devotional Matthew Devotional Guide → Get This Bible Kamba (MBIVILIA ŨVOO MŨSEO) Study Bible →