Matthew 27 — Kamba (MBIVILIA ŨVOO MŨSEO)

1Kwakya kĩoko tene, athembi anene onthe na atumĩa nĩmamũsamĩie Yesũ ũndũ meũmũtw'ĩĩa kũawa.

2Nĩmamwovie moko na mamũtwaa, mamũnengane kwa Vilato ũla waĩ ngavana.

3Yĩla Yutasi ũla wamũthooisye Yesũ wamanyie kana Yesũ atw'ĩka nũvĩtĩtye, na aĩlĩtwe nĩ kũawa, nĩweelilile kwondũ wa naĩ yake, na atũngĩa athembi anene na atumĩa ila mbesa sya silĩva mĩongo ĩtatũ.

4Nĩwameie atĩĩ, “Nyie nĩnĩkie naĩ kũthoosya mũndũ ũte na ĩvĩtyo oawe!” Ĩndĩ namo mamwĩa atĩĩ, “Yu wĩtũtavya kyaũ? Ũsu kote thĩna waku!”

5Yutasi nĩwekisye mbesa isu Ĩkalũnĩ nthĩnĩ na aumaala athi eesũsya.

6Athembi anene nĩmoosanisye mbesa isu na masya atĩĩ, “Nũndũ ii nĩ mbesa sya nthakame, ti waĩlu kũsyĩkĩa kĩnandũnĩ kya Ĩkalũ.”

7Kwoou meetĩkĩlana onthe, mathooa kĩsesi kya mũmbi wa mbisũ kĩthĩwe vandũ va kũthikaa aeni.

8Nĩkyo kĩtumi kĩsesi kĩu o na kũvika ũmũnthĩ kĩtawa Kĩsesi kya Nthakame.

9Kwa nzĩa ĩsu, ũu weanĩsya kĩla kyaneenetwe nĩ mwathani Yelemia akasya atĩĩ, “Nĩmoosie ila mbesa sya silĩva mĩongo ĩtatũ, nasyo nĩsyo mbesa ila andũ ma Ĩsilaeli meetĩkĩlanĩte tasyo thooa wa mũndũ,

10na maitũmĩa kũthooa kĩsesi kya mũmbi wa mbisũ, o ũndũ Mwĩai wambĩaĩĩte.”

11Yesũ nĩwaũngamie mbee wa ngavana, nake amũkũlya atĩĩ, “We nue mũsumbĩ wa Ayuti?” Yesũ amũsũngĩa amwĩa, “We nĩwaneena.”

12Yĩla athembi anene na atumĩa mambĩĩie kũmũsikata, Yesũ ndaasũngĩa ũndũ.

13Nĩvo ĩndĩ Vilato wamwĩie atĩĩ, “We no ũkwĩw'a maũndũ asu maũsikatĩte namo ũndũ maingĩvĩte?”

14Ĩndĩ Yesũ ndaasũngĩa ũndũ o na ũmwe, na kwa kĩtumi kĩu ngavana aseng'a mũno.

15Kĩla ĩvinda ya Mboka ya Vasaka, ngavana aĩ na kĩmanyĩo kya kũthasya mwovwa ũmwe o ũla andũ meetya.

16Ĩvindanĩ yĩu vaĩ mwovwa ũmwe weesĩkĩwe kwa kũthũka weetawa Valava.

17Kwoou yĩla andũ moombanie, Vilato nĩwamakũlilye atĩĩ, “Mwĩenda nĩmũthaĩsye ũũ? Nĩ Valava kana nĩ Yesũ ũla wĩtawa Klĩsto?”

18Amakũlilye ũu nũndũ nĩweesĩ kana atongoi ma Ayuti mamũnenganie Yesũ kwake nũndũ wa kĩwĩu.

19Kĩtumi kĩngĩ nũndũ yĩla Vilato wailyĩ nthĩ ethukĩĩsye ĩkoani yĩu, mũka wake nĩwatũmanĩte vala ũĩ akamwĩa atĩĩ, “Ndũkatate kwĩthĩwa na ũndũ na mũndũ ũsu ũte na ĩvĩtyo, nũndũ ũtukũ ũũ ũvĩtie nĩĩ na ndoto ĩnthĩnisye mũno ĩũlũ wake.”

20Athembi anene na atumĩa nĩmathing'ĩĩisye andũ metye Valava, na mayasya Yesũ nĩ oawe.

21O ĩngĩ ngavana nĩwakũlilye andũ atĩĩ, “Mwĩenda nĩmũthaĩsye ũũ katĩ wa andũ aa me elĩ?” Namo mamwĩa atĩĩ, “Valava!”

22Vilato amakũlya atĩĩ, “Nake Yesũ ũla wĩtawa Klĩsto nĩĩkana nake ata?” Onthe mamũsũngĩa mamwĩa, “Nĩambwe!”

23Vilato amakũlya atĩĩ, “Nĩkĩ? Ekĩte ĩvĩtyo yaũ?” Ĩndĩ malonzanĩĩlya mũno mbee mayasya atĩĩ, “Nĩambwe!”

24Yĩla Vilato woonie kana aendee na kũneena o mana, ĩndĩ no ituu ikwenda kũkĩla, nĩwoosie kĩw'ũ athamba moko e mbee wa andũ na asya atĩĩ, “Nyie ndi vo nthĩnĩ wa kũaa mũndũ ũũ; ũsu nĩ thĩna wenyu!”

25Namo andũ onthe mamũsũngĩa mamwĩa atĩĩ, “Kĩkw'ũ kyake nĩkĩthĩwe ĩũlũ waitũ na syana sitũ.”

26Nĩvo ĩndĩ Vilato wamathaĩisye Valava, na ĩndĩ amũnengane Yesũ akũnwe ivoko na kwambwa ngelany'onĩ.

27Asikalĩ ma ngavana nĩmamũtwaie Yesũ mamũlikya nyũmbanĩ nene ya ngavana, na meeta nguthu yonthe ya asikalĩ mamũthyũlũlũka.

28Nĩmamumisye ngũa syake na mamwĩkĩa ngũa ndune.

29Nĩvo ĩndĩ maseũvisye ngovia maitũmĩa tũũvonge twĩ mĩw'a mamwĩkĩa, na mamũkwatĩthya ndata kw'okonĩ kwake kwa aũme. Nĩmatulilye ndu mbee wake ta meũmũthaitha na mamũthekeea maimwĩa atĩĩ, “Ũvoo waku Mũsumbĩ wa Ayuti!”

30Nĩvo ĩndĩ mamũtw'ĩlangile mata na moosa ĩla ndata mamũkũna nayo mũtwe.

31Mamina kũmũthekeea, nĩmamumisye ĩla ngũa ndune na mamwĩkĩa ngũa ila syake. Vau ĩndĩ nĩmamumaalũkilye mamũtwaa makamwambe.

32Me nzĩanĩ nĩmakomanie na mũndũ ũmwe kuma Kũlene wĩtawa Simioni. Asikalĩ nĩmamũkuĩthisye Yesũ ngelany'o.

33Nĩmavikie vandũ vetawa Ngolongotha, ĩla ũalyũlo wayo nĩ, “Vandũ va Kĩng'ala.”

34Vau nĩmamũnengie Yesũ ndivai ĩvulanĩtw'e na nyongo, ĩndĩ ĩtina wa kũmĩsama alea kũmĩnyw'a.

35Asikalĩ nĩmamwambie ngelany'onĩ na maana ngũa syake kwa kũkũna kula, nĩ kana mamanye ngũa ĩla kĩla ũmwe ũkwosa.

36Ĩtina wa ũu nĩmekalile nthĩ vau mamũsunge.

37Vau ngelany'onĩ, ĩũlũ wa mũtwe wake nĩmaathĩĩie kĩvwaũ kĩandĩkĩtwe kĩla Yesũ wasikatĩĩtwe: “ŨŨ NĨWE YESŨ MŨSUMBĨ WA AYUTI.”

38O ta ũu, asikalĩ nĩmambie ing'endilĩ ilĩ vamwe na Yesũ; kĩmwe ngalĩko ya kw'oko kwake kwa aũme, na kĩla kĩngĩ ngalĩko ya kw'oko kwake kwa aka.

39Andũ ala mavĩtĩlaa vau nĩmathingithangasya mĩtwe yoo na kũtavya Yesũ syuo nthũku maimwĩa atĩĩ,

40“Ũnaasya nũtonya kwananga Ĩkalũ na ũiyaka ĩngĩ na mĩthenya ĩtatũ, ĩtangĩĩe yu! Ethĩwa nue Mwana wa Ngai, theea wume ngelany'onĩ!”

41O namo athembi anene me na amanyĩsya ma Mĩao na atumĩa nĩmamũthekeeie Yesũ mayasya atĩĩ,

42“Anatangĩĩaa andũ angĩ, ĩndĩ we mwene ndatonya kwĩtangĩĩa! Nengĩ newe Mũsumbĩ wa Ĩsilaeli! Ndathee yu kuma ngelany'onĩ na nĩtũũmwĩtĩkĩla!

43Nũmũĩkĩĩaa Ngai na kwasya we nĩ Mwana wa Ngai; ekai yu twone kana Ngai nũkũmũvonokya!”

44O ta ũu, ing'endilĩ ila syambĩtwe vamwe na Yesũ o nasyo nĩsyamũtavasya syuo nthũku sya mũthemba o ũsu.

45Kuma saa sita kũvika saa kenda sya mũthenya, nthĩ ĩsu yonthe nĩyameisye kĩvindu.

46Saa kenda syavika, Yesũ nĩwakayie na wasya mũnene ayasya atĩĩ, “Eli, Eli, lama savakathani?” Ũalyũlo wayo nĩ, “Ngai wakwa, Ngai wakwa, ũndekee kĩ?”

47Andũ amwe maũngyĩ vau vakuvĩ meew'a ũu nĩmaisye atĩĩ, “Mũndũ ũũ eĩta Eliya!”

48Ũmwe woo nĩwasembie o kwa mĩtũkĩ, oosa kasivonzi akainda ndivainĩ ngaatu, na akatonyeesya mũtĩnĩ, amũnengeleelya Yesũ aviviite.

49Andũ ala angĩ namo masya atĩĩ, “Kwa ekai tweteele twone kana Eliya nũkũka amũtangĩĩe!”

50Yesũ nĩwakayie ĩngĩ na wasya mũnene na akw'a.

51Kavindanĩ o kau kĩtambaa kĩla kyatilanĩtye Ĩkalũ nĩkyatembũkanĩle katĩ kuma ĩũlũ kũvika nthĩ. O ta ũu nĩkweethĩiwe na kĩtetemo kya nthĩ, na mavia manene maatũkanga.

52Mbũa o nasyo nĩsyavingũkangie, na mĩĩ ya andũ aingĩ ma Ngai ala makw'ĩte yasyũkw'a.

53Andũ asu nĩmaumie mbũanĩ, na ĩtina wa kũthayũũka kwa Yesũ mathi malika Yelũsalemu, na mooneka nĩ andũ aingĩ.

54Yĩla mũnene wa asikalĩ ĩana vamwe na asikalĩ ala maĩ nake maisunga Yesũ meewie kĩtetemo kĩu kya nthĩ, na moona maũndũ onthe ala meekĩka, nĩmakwatiwe nĩ w'ĩa mwingĩ na masya atĩĩ, “Kwa w'o, ũũ eĩ Mwana wa Ngai!”

55O ta ũu, vaĩ aka aingĩ vau masyaĩĩsye me kũasa, namo mookanĩtye na Yesũ kuma Kalilii makĩmũtethasya mavatanĩ make.

56Katĩ wamo vaĩ Meli Makitalene, na Meli inyia wa Yakovo na Yose, o vamwe na mũka wa Nzevetii.

57Syũa yĩ vakuvĩ kũthũa, mũndũ ũmwe mũthwii weetawa Yosevu kuma Alimathea, ũla o nake waĩ mũmanyĩw'a wa Yesũ,

58nĩwaendie vala ve Vilato na amũkũlya amwĩtĩkĩlye athi akavete mwĩĩ wa Yesũ. Vilato nĩwaumisye mwĩao Yosevu anengwe mwĩĩ ũsu.

59Kwoou Yosevu athi atheesya mwĩĩ wa Yesũ kuma ngelany'onĩ, aũlinga na suka ĩtumĩtwe na ndii nzeo ndũmu,

60na aũthika mbũanĩ yake waĩ o anamyasie ĩvianĩ mĩtũkĩ. Nĩwavingilitilye ĩvia ĩnene akunĩka mũomo wa mbũa ĩsu nayo na athi.

61Meli Makitalene na Meli ũla ũngĩ mailyĩ nthĩ vau masyaĩtye mbũanĩ ĩsu.

62Ũnĩ ũsu, naw'o nĩ mũthenya wa Savato, athembi anene na Avalisi nĩmaendie makamwone Vilato

63na mamwĩa atĩĩ, “Mũnene, nĩtũlilikene kana mũkengani ũsu yĩla ũnaĩ thayũ nĩwaneenie asya atĩĩ, ‘Ĩtina wa mĩthenya ĩtatũ ngathayũũka.’

64Kwoou ĩyĩae mbũa ĩkasungwe kũvika mũthenya wa katatũ, amanyĩw'a ma Yesũ maikese kũka moye mwĩĩ wake na maitavya andũ mamee nũthayũũkie kuma kwa akw'ũ. Ũkengani ũũ nũtonya kwĩthĩwa wĩ mũthũku kũte ũla wa mbee.”

65Vilato amea atĩĩ, “Osai asikalĩ na mũithi mũkalũlũmĩĩlye mbũa ĩsu ũndũ mũtonya.”

66Kwoou mathi na mamĩlũlũmĩĩlya kwa kũthingĩĩa yĩla ĩvia na matia asikalĩ mamĩsunge.