Matthew 26 — Kamba (MBIVILIA ŨVOO MŨSEO)

1Yesũ amina kũmanyĩsya maũndũ asu onthe, nĩwameie amanyĩw'a make atĩĩ,

2“O tondũ mwĩsĩ, ĩtina wa mĩthenya ĩlĩ nĩkũkwĩthĩwa na Mboka ya Vasaka. Mũthenya o ũsu, Mwana wa Mũndũ akanenganwe kwa amaitha make na makamwamba ngelany'onĩ.”

3Ĩvindanĩ yĩu, athembi anene na atumĩa nĩmoombanĩie nyũmba kwa Mũthembi ũla Mũnene weetawa Kaiava.

4Nĩmasamie vamwe ũndũ matonya kũmũkwata Yesũ kwa ũseleke na kũmũtw'ĩĩa kũawa.

5Ĩndĩ nĩmaneenanisye masya atĩĩ, “Tũikeke ũu mũthenya wa mboka andũ maikese kũkĩlya ituu.”

6Ĩvinda yĩmwe Yesũ nĩwaendie Mbethani mũsyĩ kwa Simioni, ũla na vu ĩtina wawaĩte mangũ.

7Aendee na kũathĩw'a, mũndũ mũka ũmwe nĩwookie vala ũĩ akuĩte sũva waseũvĩtw'e na ĩvia yĩtawa alambasita, wusĩe mauta me mũuke mũseo na ma mbesa mbingĩ amwĩtĩkĩsya mũtwe.

8Yĩla amanyĩw'a make moonie ũu, nĩmathatie mũno na makũlany'a atĩĩ, “Yu wanango ũũ w'onthe nĩ wa kĩ?

9Mauta aa meĩ matewa mbesa mbingĩ mũno na mbesa isu iinengwa ngya!”

10Yesũ nĩwamanyie ũndũ mekwasya na kwoou amea atĩĩ, “Mwĩthĩnĩsya mũndũ mũka ũũ kĩ? Ambĩka nesa mũno.

11Mũkekalaa na ngya mavinda onthe, ĩndĩ nyie ndyĩkalaa nenyu mavinda onthe.

12Mũndũ mũka ũũ etĩkĩsya mwĩĩ wakwa mauta aa awũmbany'e kwondũ wa mathiko makwa.

13Nĩmũtavya w'o, kũndũ kw'onthe ĩũlũ wa nthĩ kũla Ũvoo Mũseo ũkatavanw'a, o naw'o ũndũ ũũ mũndũ mũka ũũ weeka, ũkawetawa nĩ kana andũ mamũlilikanae.”

14Ĩtina wa ũu, ũmwe wa ala amanyĩw'a ĩkũmi na elĩ, ũla weetawa Yutasi Ĩsikalioti, nĩwaendie kwa athembi anene,

15amea atĩĩ, “Mwĩnenga kyaũ nathoosya Yesũ kũla mũĩ?” Namo mamũtalĩĩla mbesa sya silĩva mĩongo ĩtatũ mamũnenga.

16Nĩvo ĩndĩ kuma vau Yutasi wambĩĩie kũmantha mwanya mũseo wa kũmũthoosya Yesũ kũla maĩ.

17Mũthenyanĩ wa mbee wa Mboka ya Mũkate ũte Mbota, amanyĩw'a ma Yesũ nĩmaendie vala ũĩ mamũkũlya atĩĩ, “Wĩenda tũkaũseũvĩsye Mboka ya Vasaka va?”

18Nake amea atĩĩ, “Endai mũsyĩnĩ mũnene wa Yelũsalemu kwa mũndũ mũna mũkamwĩe mũmanyĩsya easya ũũ, ‘Ĩvinda yakwa nĩyĩthengeeie; nĩũka kũĩĩa Vasaka mũsyĩ kwaku nĩ na amanyĩw'a makwa.’ ”

19Amanyĩw'a nĩmeekie o ũndũ Yesũ wameĩte na maseũvya Mboka ya Vasaka.

20Kwavika wĩoo, Yesũ na amanyĩw'a make me ĩkũmi na elĩ nĩmekalile nthĩ maathĩw'e.

21Maendee na kũathĩw'a, Yesũ nĩwameie atĩĩ, “Ekai nĩmũtavye, ũmwe wenyu nũkũnthoosya kũla kwĩ amaitha makwa.”

22Amanyĩw'a nĩmeewie woo mũno na mambĩĩa kũmũkũlya ũmwe kwa ũmwe atĩĩ, “Mwĩai nokwĩthĩwa ne inyie?”

23Yesũ amasũngĩa amea atĩĩ, “Ũla ũkũnthoosya nĩ mũndũ ũkũvokanĩa nakwa ĩsaaninĩ yĩmwe.

24Kwa w'o Mwana wa Mũndũ ekw'a o kwĩanana na ũndũ Maandĩko Matheu maĩtye, ĩndĩ kyeva nĩ kwa mũndũ ũsu ũkamũthoosya Mwana wa Mũndũ kwa amaitha! Nĩ kavaa kethĩwa mũndũ ũsu ndaasyawa!”

25Yutasi ũla weetĩkĩlile kũmũthoosya Yesũ kwa amaitha amũkũlya atĩĩ, “Mũmanyĩsya, no kwĩthĩwa ne inyie?” Yesũ amũsũngĩa amwĩa atĩĩ, “We nĩwaneena.”

26O maendee na kũathĩw'a, Yesũ nĩwoosie mũkate na atũnga mũvea kwa Ngai; nĩwaũtilangile na aũnenga amanyĩw'a make ayasya atĩĩ, “Kwatai mũye; ũũ nĩ mwĩĩ wakwa.”

27O ta ũu nĩwoosie kĩkombe kĩ ndivai na atũnga mũvea kwa Ngai; nĩwanengie amanyĩw'a make ayasya atĩĩ, “Nyw'ai inyw'onthe kuma kĩkombenĩ kĩĩ.

28Ĩĩ nĩ nthakame yakwa ya ũtianĩo mweũ, ĩla ĩkwĩtĩkw'a kwondũ wa andũ onthe nĩ kana matonye kũekewa naĩ syoo.

29Na ekai nĩmũtavye, kuma yu ndikanyw'a ndivai ĩno ĩngĩ, kũvika mũthenya ũla nganyw'a ndivai nzaũ nĩ nenyu ũsumbĩnĩ wa Ĩthe wakwa.”

30Nĩvo ĩndĩ mainie wathi na maumaala mathi Kĩĩmanĩ kya Mĩthata.

31Yesũ nĩweeie amanyĩw'a make atĩĩ, “Ũtukũ ũũ inyw'onthe nĩmũũndia mũthi nũndũ wa kĩla kĩkwĩkĩka kwakwa, nĩkwĩthĩwa nĩkũandĩkĩtwe Maandĩkonĩ Matheu: ‘Ngai akooaa mũĩthi na malondu makanyaĩĩkĩa kĩthekanĩ.’

32Ĩndĩ ĩtina wa kũthayũũka kwakwa, ngaenda mũkambĩthĩae mbikie Kalilii.”

33Vetelo amwĩa Yesũ atĩĩ, “O na ethĩwa ala angĩ nĩmeũkũtia mathi nũndũ wa kĩla kĩkwĩkĩka kwaku, nyie ndikakũtia o na ĩndĩĩ.”

34Nake Yesũ amwĩa atĩĩ, “Nĩkũtavya w'o, ũtukũ ũũ nzamba ĩtanamba kwasya, nũũkaĩa katatũ wasye ndũmbĩsĩ.”

35Ĩndĩ Vetelo amwĩa atĩĩ, “O na ethĩwa no nginya nĩkw'e vamwe naku, ndiasya kana ndikwĩsĩ.” Amanyĩw'a ala angĩ onthe nĩmaisye oou.

36Nĩvo ĩndĩ Yesũ waendie e na amanyĩw'a make vandũ vetawa Ngethisemani na amea atĩĩ, “Ĩkalai vaa nambe kũthi vaya mbeange ngavoye.”

37Nĩwaendanisye na Vetelo na ala ana elĩ ma Nzevetii. Nĩwakwatiwe nĩ kyeva kingĩ na kĩũũyũ,

38na kwoou amea atĩĩ, “Nĩna kyeva kingĩ mũno ngoonĩ yakwa o na kĩĩw'a kũmbũaa; ĩkalai vaa na mũyĩkala mũsalukĩtye vamwe nakwa.”

39Yesũ nĩwaendangie mbee vanini, na akoma nthĩ na ĩvu na avoya ayasya atĩĩ, “Asa wakwa, ethĩwa nĩvatonyeka, mbetangĩe kĩkombe kĩĩ kya mathĩna! Ĩndĩ ndũkeke ũndũ ngwenda nyie, ĩka ũndũ ũkwenda we.”

40Nĩwasyokie vala ve ala amanyĩw'a atatũ na amethĩa makomete. Nĩwakũlilye Vetelo atĩĩ, “Kwoou inyw'ĩ mũyĩkala mũsalukĩtye vamwe nakwa o na vandũ va ĩsaa yĩmwe?

41Ĩkalai mũsalukĩtye na mũivoya mũikalike matatwanĩ. Nĩmũkwenda kwĩka ũla waĩlu ĩndĩ mwĩ onzu.”

42Yesũ nĩwaendie ĩngĩ na avoya ayasya atĩĩ, “Asa wakwa, ethĩwa kĩkombe kĩĩ kya mathĩna kĩimbĩtũka ndakĩnyw'ĩte, eka kwenda kwaku kwĩkwe.”

43Nĩwasyokie ĩngĩ vala ve ala amanyĩw'a, na amethĩa o makomete nũndũ maĩ na too mwingĩ.

44Nĩwamatiie ĩngĩ athi na avoya ĩvinda ya katatũ kwa kũtũngĩlĩĩla o ĩla mboya.

45Nĩvo ĩndĩ wasyokie vala ve ala amanyĩw'a na amakũlya atĩĩ, “O nayu nomũkomete na kũthũmũa? Aaya, saa nĩwavika wa Mwana wa Mũndũ kũnenganwe ũtonyinĩ wa andũ athũku.

46Ũkĩlai tũthi; mũndũ ũla ũkũnthoosya kwa amaitha makwa nĩwavika.”

47Yesũ o aendee na kũneena, Yutasi, ũmwe wa ala amanyĩw'a ĩkũmi na elĩ nĩwavikie. Ookanisye na andũ angĩ aingĩ mũno makuĩte mbyũ na nzũma, matũmĩtwe nĩ athembi anene na atumĩa.

48Yutasi ũla wamũthooisye Yesũ, nĩwamatavĩtye akamea atĩĩ, “Mũndũ ũla ngũthi kũkethya na ngethi ya wendo, mũndũ nĩwe ũsu; mũkwatei.”

49Yutasi nĩwaendie ĩmwe kwa ĩmwe vala ve Yesũ na amwĩa atĩĩ, “Ũvoo waku Mũmanyĩsya,” na ĩndĩ amũkethya na ngethi ya wendo.

50Yesũ amũsũngĩa amwĩa atĩĩ, “Mũnyanyawa, katĩĩa kwĩka ũndũ ũla wakũete.” Nĩvo ĩndĩ andũ asu mamũkwatie Yesũ mamũlũmya.

51Ũmwe wa ala maĩ na Yesũ nĩwakũie ũvyũ wake, na atema mũthũkũmi wa Mũthembi Mũnene amũtila kũtũ.

52Nĩvo ĩndĩ Yesũ wamwĩie atĩĩ, “Tũngĩa ũvyũ waku vala wĩthĩawa. Mũndũ ũla wũkitaa na ũvyũ esaa kũawa na ũvyũ.

53Nowĩsĩ kana nĩ ndonya kũkũlya Asa wakwa ũtethyo, na oyu aindũmĩa nguthu mbee wa ĩkũmi na ilĩ sya alaĩka mandetee?

54Ĩndĩ namo Maandĩko Matheu meĩsaa kwĩanĩa ata, ala maĩtye kana ũndũ ũũ no nginya wĩkĩke?”

55Nĩvo ĩndĩ weeie yĩla ĩkomano ya andũ atĩĩ, “Mwooka kũngwata mũkuĩte mbyũ na nzũma ko nĩ kĩng'endilĩ? Kĩla mũthenya nĩnatindaa nĩilyĩ nthĩ Ĩkalũnĩ ngĩmanyĩsya na mũyaangwata!

56Ĩndĩ maũndũ aa onthe meekĩka nĩ kana meanĩsye kĩla kĩandĩkĩtwe nĩ athani nthĩnĩ wa Maandĩko Matheu.” Nĩvo ĩndĩ amanyĩw'a onthe masembie mamũtia.

57Andũ ala mamũkwatie Yesũ nĩmamũtwaie nyũmba kwa Kaiava Mũthembi Mũnene, navo nĩvo amanyĩsya ma Mĩao na atumĩa moombanĩĩte.

58Vetelo nĩwamumĩte Yesũ ĩtina ĩndĩ e kũasa, mũvaka mavika kĩwanzanĩ kĩla kĩ nza wa nyũmba ya Mũthembi ũsu Mũnene. Nĩwekalile nthĩ vau nza vamwe na asikalĩ nĩ kana one kĩla kĩkwĩkĩka.

59Athembi anene na andũ ala angĩ ma nzama nĩmamanthaa andũ matonya kũneena ũkũsĩ wa ũvũngũ ĩũlũ wa Yesũ nĩ kana mamũtw'ĩĩe kũawa,

60ĩndĩ mayaaona ũmwe o na kau andũ aingĩ nĩmeeyumĩlilye maumya ũkũsĩ wa ũvũngũ ĩũlũ wa Yesũ. Mũthya andũ elĩ nĩmaumĩlile,

61na masya atĩĩ, “Mũndũ ũũ anaisye, ‘Nĩndonya kwananga Ĩkalũ ya Ngai na ngĩyaka ĩngĩ na mĩthenya ĩtatũ.’ ”

62Nĩvo ĩndĩ Mũthembi Mũnene waũngamie na amũkũlya Yesũ atĩĩ, “We ndwĩ na ũndũ ũsũngĩa? Wĩĩw'a andũ aa mayasya ata ĩũlũ waku?”

63Ĩndĩ Yesũ avindya, na Mũthembi Mũnene amwĩa atĩĩ, “Tũtavye kwa kwĩvĩta ĩsyĩtwanĩ ya Ngai ũla wĩ thayũ: We nue Klĩsto, Mwana wa Ngai?”

64Yesũ amũsũngĩa amwĩa atĩĩ, “We nĩwaneena. Ĩndĩ ekai nĩmũtavye, kuma yu kũthi na mbee, mũkamwona Mwana wa Mũndũ ailyĩ nthĩ ngalĩko ya kw'oko kwa aũme kwa Ũla wĩ Ũtonyi, na ayũka kũũ nthĩ e mathweonĩ ma ĩtu.”

65Yĩla Mũthembi Mũnene weewie ũu, nĩwatembũangie ngũa syake nĩ woo na asya atĩĩ, “Nĩwamũuma Ngai! Twĩ na vata ũngĩ mwaũ wa ngũsĩ? Inyw'ĩ nĩmweew'a ayĩuma Ngai.

66Kwoou mwĩtw'a ata?” Namo mamũsũngĩa mamwĩa atĩĩ, “Nũvĩtĩtye na aĩlĩtwe nĩ kũawa.”

67Nĩvo ĩndĩ mamũtw'ĩlangile mata ũthyũ na mamũkũna, na amwe nĩmamũmalĩkasya

68na kũmwĩa atĩĩ, “Tondũ nue Klĩsto, kwa tũtavye nũũ ũla waũkũna.”

69Ĩvindanĩ yĩu Vetelo ailyĩ nthĩ kĩwanzanĩ nza. Mwĩĩtu mũthũkũmi nĩwookie vala ũĩ amwĩa atĩĩ, “We ũnaĩ na Yesũ ũla wumĩte Kalilii.”

70Ĩndĩ Vetelo akaĩa mbee wa andũ onthe asya atĩĩ, “Ndyĩsĩ ũndũ ũkwasya,”

71na akwata nzĩa athi mũvĩanĩ wa kũlika vau kĩwanzanĩ. Mwĩĩtu ũngĩ mũthũkũmi nĩwamwonie na eea andũ ala maĩ vau atĩĩ, “Mũndũ ũũ anaĩ na Yesũ ũla wumĩte ndũanĩ ya Nasaleti.”

72Vetelo nĩwakaĩie ĩngĩ kwa kwĩvĩta asya atĩĩ, “Ndimwĩsĩ mũndũ ũsu.”

73Ĩtina wa kavinda kanini, ala andũ maũngeme vakuvĩ nĩmamũthengeeie mamwĩa atĩĩ, “Kwa w'o we wĩ ũmwe wa andũ asu ma Yesũ, nũndũ o na mũneenele waku nũkwonany'a vala wumĩte.”

74Nĩvo ĩndĩ Vetelo wambĩĩie kwĩyĩumanĩa na kwĩvĩta ayasya atĩĩ, “Nyie ndimwĩsĩ mũndũ ũsu!” Na o vau kwa vau nzamba yasya.

75Vetelo nĩwalilikanile ũndũ Yesũ wamũtavĩtye akamwĩa atĩĩ, “Nzamba ĩtanamba kwasya, nũũkaĩa katatũ wasye ndũmbĩsĩ.” Kwoou Vetelo nĩwaumaalile nza na aĩa mũno e na woo mwingĩ.