Song of Solomon 2

Kalenjin Bible (BUKUIT NE TILIL)

← Chapter 1 Jump to: Chapter 3 →

1A taptetab Saron, A u taptetab atebwosiek.

2A u taptet ne mi kwenutab katok, U noto chamanennyu eng’ tibik.

3U ketitab logoek eng’ ketikab timin, U noto chamanennyu eng’ murenik. Kiatebe uruennyi eng’ boiboiyet ne o, Ak ki anyiny logoekyik ye kiachamjami.

4Kimutwa anyo gotab igorta, Ak ki chamnyet songoliennyi ne kiiuurena.

5Igimitena logoek che saiyotin, igoigoena logoek: Amu amiani agobo emostab chamnyet.

6Tiie metinnyu eunnyi ne bo katam, Imurena eunnyi ne bo tai.

7Kayosiewok, ee tibikab Jerusalem, Eng’ cheptirgichik ak kenyelok che kotoy, Ale, Amat otwa, anan ong’eet chamnyet, Agoi kocham.

8Ogas, tugetab chamanennyu! Ogeero, nyonei, Kotorombenonu eng’ tulonok, Kotwalonu eng’ tulonok che mengechen.

9U chamanennyu cheptirgichet anan aruetab teweretiot: Ogeero, tonone inatunnyo komosin. Iitu inendet eng’ tirisiok, Iborugei eng’ tirisiet ne regerat.

10King’alal chamanennyu kolenja, Ng’eet chamanennyu, nenyu ne kararan, ak inyo kebe.

11Keero, kagosiirto kaititiet, Kagomoen, kakwa ropta;

12Yiestos taptok eng’ emet; Kagoit betusiekab tiendo, Kigasei tugetab cheptuget eng’ emennyo;

13Igochin mogoiywet logoekyik che tuonen korurio, Ak yiestos taptokab ketikab sabibuk, Ng’uu ne nyamdut. Ng’eet, chamanennyu, nenyu ne kararan, ak inyo kebe.

14Ee cheptugennyu, imi ole kibetak eng’ ruandet, eng’ ole ung’at eng’ ye kitogostoe, Ingageer togeng’ung’, ngagas tugeng’ung’; Amu anyiny tugeng’ung’, ak ko kararan togeng’ung’.

15Namwech lelwek, lelwek che mengechen, che ng’emei mbarenikab sabibuk; Amu kayiesio taptokab mbarenikyok che bo sabibuk.

16Nenyu chamanennyu, ak a nenyi: Iyagi kechirekyik eng’ oldab taptok.

17Agoi kogaititit, ak kobetyo uronok, Weege, chamanennyu, ak iige cheptirgichet anan teweretiot Eng’ tulonokab Beter.

← Chapter 1 Jump to: Chapter 3 →