Song of Solomon 4

Kalenjin Bible (BUKUIT NE TILIL)

← Chapter 3 Jump to: Chapter 5 →

1Keero, i kararan chamanennyu; keero, i kararan; U konyeguk che bo cheptugenik, che katuch sumeeguk: U sumeeguk akwetab ng’ororek, Che ruitos eng’ tegeiyatab tulwetab Gilead.

2U keleguk akwetab kechirek che kagetil kororikwak, Che bunu ole kiune; Ne tinyei age tugul saramek, Ama mi agot agenge eng’ ichek ne kimee aruet.

3U kuting’ung’ borowet ne birir, Ak kororon ng’aleguk: U togeng’ung’ logoiyat ne birir Ne tuchei sumeeguk.

4U kaating’ung’ teekset ne koi ne bo Daudi ne kigiteekyi karikab luget, Ole kigartate long’onik che mengechen elfut, Long’onik tugul che bo bik che kimen.

5U kinaiguk tuwai arek aeng’ che bo chemnyogoset, che u saramekab cheptirgichet, Che agete kwenutab taptok.

6Agoi kogaititit, ak kobetyo uronok, Awendi tulwet ne mi tuguk che u igomoik, Ak tulwet ne ming’in ne bo tuguk che nyamdut.

7I kararan kot, chamanennyu; Ametinye tisia.

8Murerennyu, nyo kebe tuwai eng’ Lebanon, Kebe tuwai eng’ Lebanon: Tobende eng’ tulwet barak ne bo Amana, Eng’ tulwet barak ne bo Senir ak Hermon, Eng’ kebenonikab ng’etunyik, Eng’ tulonokab cheblangok.

9Kecheer muguleldanyu, chepkamennyu, murerennyu; Kecheer muguleldanyu eng’ kondang’ung’, Eng’ sirimdo agenge ne bo kaating’ung’.

10Kararan ne tia chamnyeng’ung’, chepkamennyu, murerennyu! Siirei mising’ chamnyeng’ung’ divaik! Ak siirei ne tia ng’uunetab mwaniguk, tuguk tugul che ng’uu ne anyiny!

11Ee murerennyu, saitoi ng’aleguk ko u kumiat: Mi ng’elyeptang’ung’ kumik ak chego: U siptab ngoroiguk ng’uunet ne anyiny ne bo Lebanon.

12Mbaret ne ng’otat chepkamennyu, murerennyu; Kondab beek ne ng’otat kondametutab beek ne kiging’och.

13Mbaretab logoek che biriren ketiguk, che tinyei logoek che kororon mising’; Biribirinik ak ketik che bo nyamdiutik,

14Ketit ne bo nyamdutik ak karkom, Kalamus ak kinamon, koboto ketik tugul che bo tuguk che nyamdut; Tuguk che u igomoik, ak ahalot, koboto tuguk tugul che ng’uu ne anyiny mising’.

15I kondametutab beekab mbarenik, Keringetab beek che soptos, Ak kererusiek che rootei che bunu Lebanon.

16Ng’eet, ee usonetab murot ne bo katam; ak inyo inye usonetab murot ne bo tai; Ousyi mbarennyu, si kobiit komuch kong’uu nyamdutikyik. Ingonyo chamanennyu mbarennyu, Ak koam logoekyik che kororon mising’.

← Chapter 3 Jump to: Chapter 5 →