Song of Solomon 7

Kalenjin Bible (BUKUIT NE TILIL)

← Chapter 6 Jump to: Chapter 8 →

1Kororon ne tia kelyeguk komi kweonik, ee cheptab bounindet! U kubesaiguk che mugulen, koik che kororon, Boisietab musogindet ne ng’om.

2U mugeng’ung’ tabet ne mugul, Ne mararjin divaik che burugotin: U moeng’ung’ karurugutietab nganok Ne kigiyieme taptok.

3U kinaiguk tuwai arek aeng’ che bo chemnyogoset Che u saramekab cheptirgichet.

4U kaating’ung’ teekset ne koi ne bo kelekab belek; U konyeguk tamboinik che mi Hesbon, ole negite ormarichetab Bat-rabim; U sereng’ung’ teekset ne koi ne bo Lebanon Ne tokyingei Damasko.

5U meting’ung’ Karmel, Ak arusen ne birir sumeeguk; Luulei sumekyik laitoriat.

6I kararan ne tia ak ko i chamat, Ee chamnyet, ne iboiboisie!

7U tononanito-ng’ung’et tiret, Ak u kinaiguk logoek.

8Kiamwa ale, Alanye tiret, Aname temenikyik: Ingoigei kinaiguk logoekab sabibuk, Ak ingoigei ng’uunetab kabuseng’ung’, logoek;

9Ak ingoigei kuting’ung’ divaik che miachen mising’, Che rektoi komie eng’ chamanennyu, Che igimiti kutuswekab che ruitos.

10A bo chamanennyu, Ak tokyinagei magennyi.

11Nyo anyun chamanennyu, kebe mbar; Ngemeng’ote nganasok che mengechen.

12Ngemusyi mbarenikab logoekab sabibuk; Ngegeer ngo kagong’atyo ketikab sabibuk, ak koyiesio taptokyik, Ngo kogoyiesio taptokab logoek che biriren: Agonin chamnyennyu eng’ oloto.

13Ng’uu ne anyiny tuguk che u labotik, Ak mi seremusiekyok logoek alak tugul che kororon, che leelach ak che bo keny, Che kiagonorun, ee chamanennyu.

← Chapter 6 Jump to: Chapter 8 →