Song of Solomon 6

Kalenjin Bible (BUKUIT NE TILIL)

← Chapter 5 Jump to: Chapter 7 →

1Kawa ano chameneng’ung’, Ee inye ne i kararan isiir tibik tugul? Kamasta kwo ano chamaneng’ung’, Si kobiit kecheng’ inendet koboten?

2Kachorjigei chamanennyu mbarennyi, mbarenikab tuguk che ng’uu ne anyiny, Kwo koamis eng’ mbarenik, ak koyum taptok.

3A bo chamanennyu, ak ko nenyu chamanennyu: Iyagisiei eng’ ole mi taptok.

4Ee chamanennyu, i kararan kot, ko u Tirsa, I kararan ko u Jerusalem, I ne imuisei ko u luget ne tinyei songolik.

5Keer olin, Amu kagotertera konyeguk, U sumeeguk akwetab ng’ororek, Che ruitos eng’ tegeiyatab Gilead.

6U keleguk akwetab kechirek, Che bunu ole kiune; Ne tinyei age tugul saramek, Ama mi agot agenge eng’ ichek ne kimee aruet.

7U togeng’ung’ kebebertab logoiyat ne birir Ne tuchei sumeeguk.

8Mitei osotik tamanwogik lo che bo laitoriat, ak chebaigeinik tamanwogik sisiit, Koboto bergeinik che maiitoksei.

9Agenge cheptugennyu, nenyu ne libwob; Ne kigii inegei; Chamat inendet eng’ kamet. Kigeer tibik inendet, ak koguure ne iberurot; Ee, kiilos inendet osotikab laitoriat, ak chebaigeinik.

10Ng’o ne tobendoi ko u karonet, Ne kararan ko u arawet, Ne iluu ko u asista, Ne imuisei ko u luget ne tinye songolik?

11Kiachorjige mbaretab logoek che u njuguk, Si kobiit ageer ketik che ing’atos che bo atebwet, Ageer ngo kayiesio ketikab sabibuk, Ak ageer ngo kayiesio logoek che biriren.

12Kingo tom anai, komutwa muguleldanyu Anyo kwenutab karisiekab bikyuk che eechen.

13Weeguge, weeguge, ee Jepsulamindet; Weeguge, weeguge, si kegeerin. Kalya si omach ogeer Jepsulamindet, Ko u ye ogeere urerietab Maanaim?

← Chapter 5 Jump to: Chapter 7 →