Song of Solomon 8

Kalenjin Bible (BUKUIT NE TILIL)

← Chapter 7 Jump to:

1Kita kaigai nda kii u werit ne kitupche, Ne kichuchun kinetab kamennyu! Nda anyorjinin sang’ ang’ututin; Ee, ama mi chi ne sasa.

2Ta kamutin iwe gotab kamennyu, Ne imuchi koneta; Ta kanagin divaik che kigiburukto nyamdutik, Che bo beekab logoekyuk che biriren.

3Ta katiie metinnyu eunnyi ne bo katam, Ta kaimurena eunnyi ne bo tai.

4Kayosiewok, ee tibikab Jerusalem, Ale, Amat otwa, anan ong’eet chamnyet, Agoi kocham.

5Ng’o ni togosu eng’ ong’atet, Ne tiiegei chamanennyi? Kiang’eetin eng’ kelutab ketitab logoek: Ole kiame moet komet komachei kosichin, Kimi yoto koamei moet si kosichin.

6Indea muguleldang’ung’ ko u ng’okset, ko u ng’okset eng’ eung’ung’: Amu kim chamnyet ko u meet; Korom ng’et konda ko u kererit: Lalei ko u ye lalei mat, Liblibenet ne korom ne bo Jehovah.

7Maimuchi beek che chang’ kotis chamnyet, Ama imaluuchi maranosiek: Ngot kogoito chito tugukyik tugul che bo gonnyi agobo chamnyet, Kesasei mising’ kot.

8Kitinye chepto ne ming’in ne kitupche, Ne tom kogun kinet: Kiitoi nee cheptanyo Ye tun kait ye kibwanune koito?

9Ngot ko inatut inendet, Keteechei baragunnyi irimet ne bo feda: Ak ngot ko kereiywotab kurget, Keng’ote inendet baoinikab taragonik.

10A inatut, ak ko u kinaikyuk teeksosiekyik che koen: Kiaegu anyun eng’ inendet ne u ne kinyor kalyet.

11Kitinyei Solomon mbaretab sabibuk eng’ Baal-hamon; Kiimanakyi mbaranato bo sabibuk ribik; Kinyoljin chi tugul koib fedaisiek elfut che bo logoekyik.

12Mbarennyu ne bo sabibuk, ne nenyu, ko mi tainnyu: Ee Solomon, inyoru elfunoto, Ak nyoru bogol aeng’ icheget che ribei logoekyik.

13Inye ne imenye mbarenik, Epchin it choronok kuting’ung’: Kona agas kutinato.

14Chakte, chamanennyu, Kergeitu ak cheptirgichet anan aruetab teweretiot Eng’ tulonokab tuguk che ng’uu ne anyiny.

← Chapter 7 Jump to: