1 Chronicles 11 — Khmer 2014 (អាល់គីតាប)

1ប្រជា‌ជនអ៊ីស្រ‌អែលទាំងមូលប្រមូលគ្នាមកជួបស្តេចទត នៅក្រុងហេប្រូនជម្រាបថា៖ «យើងខ្ញុំទាំងអស់គ្នាជាសាច់សាលោហិតរបស់ស្តេចដែរ។

2កាលពីមុននៅពេលដែលស្តេចសូលគ្រងរាជ្យលើយើងខ្ញុំ ស្តេចទតធ្លាប់ដឹកនាំកង‌ទ័ពអ៊ីស្រ‌អែលចេញទៅធ្វើសឹក ហើយ អុលឡោះ‌តាអាឡា ជាម្ចាស់របស់ស្តេចទត មានបន្ទូលមកកាន់គាត់ថា “អ្នកនឹងគ្រប់‌គ្រងលើជន‌ជាតិអ៊ីស្រ‌អែល ជាប្រជា‌រាស្ត្ររបស់យើង អ្នកនឹងដឹកនាំពួកគេ”»។

3ដូច្នេះអះលី‌ជំអះទាំងអស់របស់ជន‌ជាតិអ៊ីស្រ‌អែលចូលមកជួបស្តេចទត នៅក្រុងហេប្រូន។ ស្តេចទតបានចងសម្ពន្ធ‌មេត្រីជាមួយអះលី‌ជំអះទាំងនោះ នៅក្រុងហេប្រូន នៅចំពោះ អុលឡោះ‌តាអាឡា រួចហើយពួកគេបានចាក់ប្រេងតែង‌តាំងទត ជាស្តេចរបស់ប្រជា‌រាស្ត្រអ៊ីស្រ‌អែល ស្របតាមបន្ទូលដែល អុលឡោះ‌តាអាឡា បានថ្លែងទុកតាមរយៈណាពីសាំយូ‌អែល។

4ស្តេចទត និងកង‌ទ័ពអ៊ីស្រ‌អែលទាំងមូល នាំគ្នាចេញទៅវាយយកក្រុងយេរូ‌សាឡឹម គឺក្រុងយេប៊ូស។ ពីមុនជន‌ជាតិយេប៊ូស ជាម្ចាស់ស្រុករស់នៅក្រុងនោះ។

5អ្នកក្រុងយេប៊ូសពោលមកកាន់ស្តេចទតថា៖ «អ្នកឯងចូលក្នុងក្រុងរបស់យើងមិនបានទេ»។ ប៉ុន្តែ ស្តេចទតវាយយកបានបន្ទាយនៅភ្នំស៊ីយ៉ូន ដែលក្រោយមកហៅថា “បុរីស្តេចទត”។

6ស្តេចទតបានប្រាប់ថា៖ «ប្រសិនបើអ្នកណាម្នាក់វាយឈ្នះពួកយេប៊ូសមុនគេ អ្នកនោះនឹងបានធ្វើជាមេ‌ទ័ព និងមេដឹកនាំ»។ លោកយ៉ូអាប់ជាកូនរបស់អ្នកស្រីសេរូ‌យ៉ាចេញទៅវាយមុនគេ ហើយបានទទួលតំណែងជាមេ‌ទ័ព។

7ស្តេចទតនៅក្នុងបន្ទាយនោះហេតុនេះគេក៏ហៅថា «បុរីស្តេចទត»។

8បន្ទាប់មកស្តេចពង្រីកទី‌ក្រុងចាប់តាំងពីមីឡូ រហូតដល់ជាយក្រុង។ លោកយ៉ូអាប់បានជួសជុលកន្លែងផ្សេងទៀតនៅក្នុងទី‌ក្រុង។

9ស្តេចទតមានអំណាចកាន់តែខ្លាំងឡើងៗ ដ្បិត អុលឡោះ‌តាអាឡា ជាម្ចាស់នៃពិភពទាំងមូលនៅជាមួយ។

10នេះជាបញ្ជីរាយនាមនាយទាហានដ៏អង់‌អាចរបស់ស្តេចទត គឺអស់អ្នកដែលបានជួយជ្រោមជ្រែងឲ្យស្តេច ទទួលរាជសម្បត្តិលើស្រុកអ៊ីស្រ‌អែលទាំងមូល ហើយឲ្យស្តេចបានសោយរាជ្យ ស្របតាមបន្ទូលរបស់ អុលឡោះ‌តាអាឡា ស្តីអំពីជន‌ជាតិអ៊ីស្រ‌អែល។

11ពួកទាហានដ៏អង់‌អាចរបស់ស្តេចទត មានរាយនាមតាមចំនួនរបស់ពួកគេដូចតទៅ: លោកយ៉ាសុ‌បៀម ជាកូនរបស់លោកហាក់‌មុនី លោកជាប្រមុខលើមេបញ្ជាការសាម‌សិបនាក់។ គឺលោកហើយដែលបានប្រើលំពែង ម្លាប់ខ្មាំងអស់បីរយនាក់ក្នុងពេលតែមួយ។

12បន្ទាប់មកមានលោកអេ‌ឡា‌សារ ជាកូនរបស់លោកដូដូរ ជាពូជ‌ពង្សរបស់លោកអហូ‌អា។ លោកជានាយទាហានម្នាក់ក្នុងចំណោមនាយទាហានដ៏អង់‌អាចទាំងបី។

13លោកបាននៅជាប់ជាមួយស្តេចទត នៅផាស់‌ដាំ‌មីម ក្នុងគ្រាដែលជន‌ជាតិភីលី‌ស្ទីនលើកទ័ពមកច្បាំង។ នៅទីនោះមានដីស្រែមួយកន្លែង ពេញដោយស្រូវ ហើយកង‌ទ័ពអ៊ីស្រ‌អែលបានបាក់ទ័ពរត់នៅមុខជន‌ជាតិភីលី‌ស្ទីន។

14ពេលនោះលោកអេ‌ឡា‌សារ និងទាហានរបស់គាត់ ឈរនៅកណ្តាលចម្ការនោះ ហើយវាយប្រហារជន‌ជាតិភីលី‌ស្ទីន ដណ្តើមយកបានចម្ការនោះមកវិញ។ អុលឡោះ‌តាអាឡា ប្រោសប្រទានជ័យ‌ជំនះដ៏ធំធេង។

15ថ្ងៃមួយនាយទាហានបីនាក់ ក្នុងចំណោមនាយទាហានទាំងសាម‌សិបនាក់ បាននាំគ្នាចូលជួបស្តេចទត ក្នុងល្អាងភ្នំអាឌូ‌ឡាម នៅពេលដែលទាហានភីលី‌ស្ទីនបោះទ័ពនៅជ្រលងភ្នំរេ‌ផែម។

16ពេលនោះ ស្តេចទតនៅក្នុងជំរកដ៏រឹង‌មាំមួយ។ កង‌ទ័ពភីលី‌ស្ទីនមួយក្រុមក៏ឈរជើងនៅភូមិបេថ្លេ‌ហិមដែរ។

17ស្តេចទតស្រេកទឹក គាត់ក៏សួរថា៖ «តើនរណាអាចដងទឹកពីអណ្តូងនៅមាត់ទ្វារភូមិបេថ្លេ‌ហិម យកមកឲ្យយើងបាន?»។

18នាយទាហានទាំងបីនាក់នាំគ្នាសំរុកចូលទៅក្នុងទីតាំងទ័ពពួកភីលី‌ស្ទីន ហើយដងទឹកពីអណ្តូងនៅមាត់ទ្វារភូមិបេថ្លេ‌ហិម យកមកជូនស្តេចទត ប៉ុន្តែ គាត់មិនព្រមពិសាទេ គាត់យកទឹកនោះទៅច្រួចលើដីជូន អុលឡោះ‌តាអាឡា ។

19ស្តេចទតមានប្រសាសន៍ថា៖ «អុលឡោះអើយខ្ញុំគ្មានសិទ្ធិទទួលទានទឹកនេះទេ ព្រោះទឹកនេះដូចជាឈាមរបស់ទាហាន ដែលបានប្រថុយជីវិតទៅដងយកមកដែរ!»។ ដូច្នេះគាត់បដិ‌សេធមិនព្រមពិសាទឹកនោះទេ ព្រោះពួកទាហានបានប្រថុយជីវិតទៅដងយកមក។ នេះហើយជាស្នាដៃដែលទាហានដ៏ខ្លាំងពូកែទាំងបីនាក់បានប្រព្រឹត្ត។

20លោកអប៊ី‌សាយ ជាប្អូនរបស់លោកយ៉ូអាប់ និងជាប្រមុខលើមេ‌ទ័ពបីនាក់។ គាត់បានប្រើលំពែងសម្លាប់ខ្មាំងសត្រូវអស់បីរយនាក់។ គាត់មានឈ្មោះល្បីជាងគេ ក្នុងចំណោមមេ‌ទ័ពទាំងបីនាក់។

21គាត់ទទួលកិត្តិ‌យសច្រើនជាងគេ ក្នុងចំណោមមេ‌ទ័ពទាំងបី។ គាត់មាននាទីជាប្រមុខលើក្រុមមេ‌ទ័ពទាំងបី ប៉ុន្តែ គាត់ពុំរាប់បញ្ចូលក្នុងក្រុមមេ‌ទ័ពបីនាក់នោះឡើយ។

22លោកបេណា‌យ៉ាជាអ្នកស្រុកកាប‌សៀល ជាកូនរបស់លោកយេហូ‌យ៉ាដា និងជាចៅរបស់ទាហានដ៏អង់‌អាចមួយនាក់។ គាត់បានបញ្ចេញស្នាដៃថ្មីយ៉ាងច្រើន។ គឺគាត់ហើយដែលបានវាយពួកក្លាហានពីរនាក់នៅស្រុកម៉ូអាប់ ព្រមទាំងចុះទៅក្នុងរណ្តៅ ដើម្បីសម្លាប់សត្វសិង្ហមួយ នៅថ្ងៃដែលមានទឹកកកធ្លាក់។

23គាត់ក៏បានសម្លាប់ជន‌ជាតិអេស៊ីបម្នាក់ ដែលមានកំពស់ប្រាំហត្ថ និងប្រដាប់ដោយលំពែងមួយយ៉ាងធំ ដូចជាឈើកីតម្បាញ។ គាត់ទៅប្រយុទ្ធនឹងគេ ដោយមានតែដំបងមួយប៉ុណ្ណោះ គាត់ដណ្តើមយកលំពែងពីដៃអ្នកនេះបាន ហើយចាក់សម្លាប់នឹងលំពែងនោះទៅ។

24នេះហើយជាស្នាដៃរបស់លោកបេណា‌យ៉ា ជាកូនរបស់លោកយេហូ‌យ៉ាដាដែលធ្វើឲ្យគាត់មានកេរ្តិ៍ឈ្មោះល្បី ក្នុងក្រុមមេ‌ទ័ពទាំងបីនាក់។

25ក្នុងចំណោមមេបញ្ជាការទាំងសាម‌សិបនាក់ គាត់ទទួលកិត្តិ‌យសច្រើនជាងគេ ប៉ុន្តែ គាត់ពុំរាប់បញ្ចូលក្នុងក្រុមមេ‌ទ័ពបីនាក់នោះឡើយ។ ស្តេចទតបានតែង‌តាំងគាត់ជាមេបញ្ជាការកងអង្គរក្ស។

26វីរ‌បុរសដ៏អង់‌អាចឯទៀតៗមាន: លោកអេសា‌អែលជាប្អូនរបស់លោកយ៉ូអាប់ លោកអែល‌ហា‌ណានជាកូនរបស់លោកដូដូរ អ្នកភូមិបេថ្លេ‌ហិម

27លោកសាំម៉ូតអ្នកស្រុកហារ៉ូ លោកហេលេសអ្នកស្រុកពេឡូន

28លោកអ៊ីរ៉ាជាកូនរបស់លោកអ៊ីក‌កែស អ្នកក្រុងត្កូអា លោកអបៀ‌ស៊ើរអ្នកស្រុកអានា‌ថោត

29លោកស៊ីបា‌កាយអ្នកស្រុកហ៊ូសាយ លោកអ៊ីឡាយអ្នកស្រុកអហូ‌អា

30លោកម៉ាហា‌រាយអ្នកស្រុកនេថូ‌ផា លោកហេលែបជាកូនរបស់លោកបាណា អ្នកស្រុកនេថូ‌ផា

31លោកអ៊ីតាយជាកូនរបស់លោករីបាយ អ្នកក្រុងគីបៀន ក្នុងកុល‌សម្ព័ន្ធពុន‌យ៉ាម៉ីន លោកបេណា‌យ៉ាអ្នកស្រុកពីរ៉ា‌ថូន

32លោកហ៊ូរ៉ាយអ្នកស្រុកណា‌ហាលេ-កាអាស លោកអបៀល អ្នកស្រុកអើរ៉ា‌បា

33លោកអាស‌ម៉ាវេតអ្នកស្រុកបាហ៊ូ‌រីម លោកអេលី‌យ៉ាបា អ្នកស្រុកស្អា‌ឡាប៊ីន

34លោកហាសេមអ្នកស្រុកគីសូន លោកយ៉ូណា‌ថាន ជាកូនរបស់លោកសាកេអ្នកស្រុកហារ៉ា‌រី

35លោកអហ៊ី‌យ៉ាមជាកូនរបស់លោកសាកើរអ្នកស្រុកហារ៉ា‌រី លោកអេលី‌ផាលជាកូនរបស់លោកអើរ

36លោកហេភើរ អ្នកស្រុកមេកេ‌រ៉ា លោកអហ៊ីយ៉ាអ្នកស្រុកពេឡូន

37លោកហែស្រូអ្នកស្រុកកើមែល លោកណារ៉ាយជាកូនរបស់លោកអែស‌បាយ

38លោកយ៉ូ‌អែលជាប្អូនរបស់ណាថាន លោកមីបហាជាកូនរបស់លោកហាគ្រី

39លោកសេលេកជាជន‌ជាតិអាំម៉ូន លោកណាហា‌រ៉ាយអ្នកក្រុងបេរ៉ូត ជាអ្នកកាន់គ្រឿងសស្ត្រា‌វុធរបស់លោកយ៉ូអាប់ ជាកូនរបស់អ្នកស្រីសេរូ‌យ៉ា

40លោកអ៊ីរ៉ាអ្នកស្រុកយេធើរ លោកការេបអ្នកស្រុកយេធើរ

41លោកអ៊ូរីជាជន‌ជាតិហេត លោកសាបាដ ជាកូនរបស់លោកអឡាយ

42លោកអឌី‌ណាជាកូនរបស់លោកស៊ីសា ជាមេដឹកនាំម្នាក់ក្នុងកុល‌សម្ព័ន្ធរូបេន ដែលមានទាហានសាម‌សិបនាក់នៅជាមួយ

43លោកហាណាន ជាកូនរបស់លោកម៉ាកា លោកយ៉ូសា‌ផាតអ្នកស្រុកមីត‌នី

44លោកអ៊ូស៊ី‌យ៉ាអ្នកស្រុកអាស‌ថារ៉ូត លោកសាម៉ា និងលោកយេហ៊ី‌អែលអ្នកស្រុកអារ៉ូ‌អ៊ើរ

45លោកយេឌី‌អែលជាកូនរបស់លោកស៊ីមរី ព្រមទាំងលោកយ៉ូហាជាប្អូន ដែលជាអ្នកស្រុកធីសា

46លោកអេលាសអ្នកស្រុកម៉ាហា‌វីម លោកយេរី‌បាយ និងលោកយ៉ូសា‌វា ជាកូនរបស់លោកអែល‌ណាម លោកយីតម៉ាជាជន‌ជាតិម៉ូអាប់

47លោកអេលាល លោកអូបេដ និងលោកយ៉ាសៀស អ្នកស្រុកមេសូ‌បាយ៉ា។