2 Samuel 8

Khmer 2014 (អាល់គីតាប)

← Chapter 7 Jump to: Chapter 9 →

1ក្រោយមក ស្តេចទតវាយឈ្នះជន‌ជាតិភីលី‌ស្ទីន ហើយបង្ក្រាបពួកគេ ព្រមទាំងដកអំណាចពីពួកគេ លែងឲ្យត្រួត‌ត្រាលើតំបន់នោះទៀតផង។

2ស្តេចទតក៏វាយឈ្នះជន‌ជាតិម៉ូអាប់ដែរ គាត់បង្ខំឲ្យពួកគេដេកនៅដី ហើយរាប់យកចំនួនពីរភាគបីយកទៅសម្លាប់ និងទុកមួយភាគបីឲ្យនៅរស់។ ជន‌ជាតិម៉ូអាប់ក៏ធ្លាក់ខ្លួនចំណុះស្តេចទត ហើយត្រូវជូនសួយ‌សារ‌អាករផង។

3ស្តេចទតវាយឈ្នះស្តេចហាដា‌រេស៊ើរ ជាបុត្ររបស់ស្តេចរេ‌ហូប និងជាស្តេចស្រុកសូ‌បា ក្នុងពេលដែលស្តេចហាដា‌រេស៊ើរ កំពុងតែទៅកាន់កាប់តំបន់ទន្លេអឺ‌ប្រាតឡើងវិញ។

4ស្តេចទតចាប់បានទ័ពសេះរបស់ស្តេចហាដា‌រេស៊ើរ ចំនួនមួយពាន់ប្រាំពីររយនាក់ និងកង‌ពលថ្មើរជើងចំនួនពីរម៉ឺននាក់។ គាត់បានយកសេះមួយរយក្បាលទុក ក្រៅពីនោះគាត់កាត់សរសៃកែងជើងទាំងអស់។

5ពេលនោះ ជន‌ជាតិស៊ីរី នៅក្រុងដា‌ម៉ាស់ លើកគ្នាមកជួយស្តេចហាដា‌រេស៊ើរ ជាស្តេចស្រុកសូបា ស្តេចទតក៏វាយឈ្នះពួកគេ ហើយសម្លាប់អស់ចំនួនពីរម៉ឺនពីរពាន់នាក់។

6ស្តេចទតបានដាក់ទេសា‌ភិបាល ឲ្យត្រួត‌ត្រាលើស្រុកស៊ីរី ជន‌ជាតិស៊ីរីក៏ធ្លាក់ខ្លួនចំណុះគាត់ ហើយត្រូវជូនសួយ‌សារ‌អាករផង។ អុលឡោះ‌តាអាឡា ប្រទានឲ្យស្តេចទតមានជ័យ‌ជំនះ នៅគ្រប់កន្លែងដែលគាត់ទៅ។

7ស្តេចទតរឹបអូសខែលមាស ពីពួកបរិវាររបស់ស្តេចហាដា‌រេស៊ើរ ហើយនាំយកមកក្រុងយេរូ‌សាឡឹម។

8ស្តេចទតក៏រឹបអូសយកលង្ហិនយ៉ាងច្រើនសន្ធឹកសន្ធាប់ ពីក្រុងបេ‌ថាស និងក្រុងបេរ៉ូ‌ថាយ ដែលជាក្រុងរបស់ស្តេចហាដា‌រេស៊ើរ។

9កាលស្តេចថូអ៊ី ជាស្តេចក្រុងហា‌ម៉ាត់ជ្រាបថា ស្តេចទតបានវាយឈ្នះកង‌ទ័ពទាំងមូលរបស់ស្តេចហាដា‌រេស៊ើរ

10ស្តេចថូអ៊ីក៏ចាត់សម្តេចយ៉ូ‌រ៉ាម ជាកូនឲ្យចូលមកជួបស្តេចទត និងអបអរសាទរចំពោះជ័យ‌ជំនះលើស្តេចហាដា‌រេស៊ើរ ព្រោះស្តេចថូអ៊ី ធ្វើសឹកសង្គ្រាមជាមួយស្តេចហាដា‌រេស៊ើរដែរ។ សម្តេចយ៉ូ‌រ៉ាមនាំយកវត្ថុធ្វើអំពីមាស ប្រាក់ និងលង្ហិនមកជូនស្តេចទត។

11ស្តេចទតយកវត្ថុទាំងនោះទៅជូន អុលឡោះ‌តាអាឡា ដូចជាមាស ប្រាក់ យកបានពីប្រជា‌ជាតិទាំងប៉ុន្មាន ដែលគាត់វាយឈ្នះដែរ

12គឺជន‌ជាតិស៊ីរី ជន‌ជាតិម៉ូអាប់ ជន‌ជាតិអាំម៉ូន ជន‌ជាតិភីលី‌ស្ទីន និងជន‌ជាតិអាម៉ា‌ឡេក។ ស្តេចទតក៏យកជយ‌ភ័ណ្ឌដែលរឹបអូសបានពីស្តេចហាដា‌រេស៊ើរ ជាបុត្ររបស់ស្តេចរេ‌ហូប ស្តេចស្រុកសូបា ទៅជូនអុលឡោះ‌តាអាឡាដែរ។

13ពេលស្តេចទតវិលមកពីច្បាំងឈ្នះជន‌ជាតិស៊ីរីវិញ គាត់ប្រហារជន‌ជាតិអេដុម អស់មួយម៉ឺនប្រាំបីពាន់នាក់ នៅជ្រលងភ្នំអំបិល ដែលធ្វើឲ្យកិត្តិ‌នាមរបស់គាត់រឹតតែល្បី‌ល្បាញថែមទៀត។

14ស្តេចទតបានដាក់ទេសា‌ភិបាលឲ្យត្រួត‌ត្រាលើស្រុកអេដុមទាំងមូល ហើយជន‌ជាតិអេដុមក៏ធ្លាក់ខ្លួនចំណុះគាត់។ អុលឡោះ‌តាអាឡា ប្រទានឲ្យគាត់មានជ័យ‌ជំនះនៅគ្រប់កន្លែងដែលគាត់ទៅ។

15ស្តេចទតគ្រប់‌គ្រងលើស្រុកអ៊ីស្រ‌អែលទាំងមូល គាត់គ្រប់‌គ្រងលើប្រជា‌រាស្ត្រដោយសុចរិត និងយុត្តិធម៌។

16លោកយ៉ូអាប់ កូនរបស់អ្នកស្រីសេរូ‌យ៉ា មានមុខ‌ងារជាមេបញ្ជាការកង‌ទ័ព។ លោកយេហូ‌សាផាត កូនរបស់លោកអហ៊ី‌លូដ ជាអ្នកនាំពាក្យរបស់ទត។

17លោកសា‌ដុក ជាកូនរបស់លោកអហ៊ី‌ទូប និងលោកអហ៊ី‌មាឡេក ជាកូនរបស់លោកអបៀ‌ថើរ មានមុខ‌ងារជាអ៊ីមុាំ។

18លោកសេរ៉ា‌យ៉ា ជាលេខា‌ធិការរបស់ស្តេច។ លោកបេណា‌យ៉ា ជាកូនរបស់លោកយេហូ‌យ៉ាដា ជាមេបញ្ជាការលើក្រុមកេរេ‌ធីម និងក្រុមពេរេ‌ធីម។ រីឯបុត្រាទាំងប៉ុន្មានរបស់ស្តេចទត មានមុខ‌ងារជាអ៊ីមុាំ។

← Chapter 7 Jump to: Chapter 9 →