Zechariah 6

Khmer 2014 (អាល់គីតាប)

← Chapter 5 Jump to: Chapter 7 →

1ខ្ញុំក្រឡេកមើលទៅសាជាថ្មី ខ្ញុំនិមិត្តឃើញរទេះបួន ចេញពីចន្លោះភ្នំលង្ហិនពីរ។

2រទេះទីមួយទឹមដោយសេះសម្បុរក្រហម រទេះទីពីរទឹមដោយសេះសម្បុរខ្មៅ

3រទេះទីបីទឹមដោយសេះសម្បុរស ហើយរទេះទីបួនទឹមដោយសេះសម្បុរពព្លាក់ ពណ៌ត្នោត។

4ខ្ញុំក៏សួរម៉ាឡា‌អ៊ីកាត់ដែលសន្ទនាជាមួយខ្ញុំថា៖ «លោកម្ចាស់រទេះសេះទាំងនេះមានន័យដូចម្ដេចដែរ?»។

5ម៉ាឡា‌អ៊ីកាត់តបមកវិញថា៖ «រទេះសេះទាំងបួនជាខ្យល់ពីទិសទាំងបួន បក់ចេញមកពីកន្លែងដែលអុលឡោះ‌តាអាឡាជាម្ចាស់នៃផែនដីទាំងមូលនៅ»។

6សេះសម្បុរខ្មៅអូសរទេះចេញទៅកាន់ស្រុកខាងជើង សេះសម្បុរសចេញមកតាមក្រោយ។ សេះសម្បុរពព្លាក់ចេញទៅស្រុកខាងត្បូង។

7សេះសម្បុរត្នោតចេញមក ហើយសុំធ្វើដំណើរឆ្លងកាត់ផែនដី។ អុលឡោះ‌តាអាឡាប្រាប់ថា: ចូរធ្វើដំណើរឆ្លងកាត់ផែនដីចុះ! រទេះសេះនោះក៏ធ្វើដំណើរឆ្លងកាត់ផែនដី។

8ទ្រង់ហៅខ្ញុំប្រាប់ថា៖ «មើល! រទេះសេះដែលធ្វើដំណើរទៅស្រុកខាងជើង នឹងនាំរសរបស់យើងឲ្យទៅសណ្ឋិតនៅស្រុកនោះ»។

9អុលឡោះ‌តាអាឡា មានបន្ទូលមកខ្ញុំ ដូចតទៅ៖

10«ថ្ងៃនេះ ចូរទៅផ្ទះរបស់យ៉ូសៀសជាកូនរបស់សេផា‌នា ទទួលយកជំនូនរបស់ប្រជា‌ជនដែលជាប់ជាឈ្លើយ ពីដៃរបស់ហែល‌ដាយ ថូប៊ី‌យ៉ា និងយេដា‌យ៉ា ដែលមកពីស្រុកបាប៊ី‌ឡូន។

11ចូរយកប្រាក់ និងមាស ទៅសិតធ្វើជាមកុដ បំពាក់ឲ្យមូស្ទីយេសួរ ជាកូនរបស់យូសា‌ដាក។

12ចូរប្រាប់គាត់ថា អុលឡោះ‌តាអាឡា ជាម្ចាស់នៃពិភពទាំងមូលមានបន្ទូលដូចតទៅ: “បុរសម្នាក់ឈ្មោះពន្លក គាត់នៅទីណា អ្វីៗទាំងអស់នឹងលូតលាស់ឡើងនៅទីនោះ។ គាត់នឹងសង់ម៉ាស្ជិទរបស់ អុលឡោះ‌តាអាឡា ។

13គឺគាត់នោះហើយដែលនឹងសង់ម៉ាស្ជិទ របស់ អុលឡោះ‌តាអាឡា ។ គាត់នឹងពាក់គ្រឿងឥស្សរិយ‌យស ដ៏ថ្កុំ‌ថ្កើងរុង‌រឿង គាត់អង្គុយគ្រងរាជ្យលើបល្ល័ង្ករបស់គាត់។ អ៊ីមុាំមួយនាក់អង្គុយលើបល្ល័ង្កមួយទៀត ហើយអ្នកទាំងពីរមានទំនាក់‌ទំនង យ៉ាងជិត‌ស្និទ្ធជាមួយគ្នា។

14មកុដទាំងនេះត្រូវទុកនៅក្នុងម៉ាស្ជិទរបស់ អុលឡោះ‌តាអាឡា ដើម្បីរំលឹកដល់ហែល‌ដាយ ថូប៊ី‌យ៉ា និងយេដា‌យ៉ា ព្រមទាំងហេន ជាកូនរបស់សេផា‌នា។

15អស់អ្នកដែលបែក‌ខ្ញែកទៅស្រុកឆ្ងាយនឹងនាំគ្នាវិលមកវិញ ដើម្បីបំពេញការ‌ងារសង់ម៉ាស្ជិទរបស់ អុលឡោះ‌តាអាឡា ”។ ពេលនោះ អ្នករាល់គ្នានឹងទទួលស្គាល់ថា អុលឡោះ‌តាអាឡា ជាម្ចាស់នៃពិភពទាំងមូលពិតជាចាត់ខ្ញុំឲ្យមករកអ្នករាល់គ្នាមែន។ ហេតុ‌ការណ៍នេះនឹងសម្រេចជារូបរាង ប្រសិនបើអ្នករាល់គ្នាធ្វើតាមបន្ទូលរបស់ អុលឡោះ‌តាអាឡា ជាម្ចាស់របស់អ្នករាល់គ្នាដោយចិត្តស្មោះ»។

← Chapter 5 Jump to: Chapter 7 →

Recommended Reading

Commentary Zechariah Commentaries → Devotional Zechariah Devotional Guide → Get This Bible Khmer (អាល់គីតាប) Study Bible →