1 Samuel 12

Khmer (ព្រះគម្ពីរបរិសុទ្ធកែសម្រួល ២០១៦)

← Chapter 11 Jump to: Chapter 13 →

1លោកសាំយូ‌អែលបានប្រាប់ដល់ពួកអ៊ីស្រា‌អែលទាំងអស់គ្នាថា៖ «ខ្ញុំបានស្តាប់គ្រប់សេចក្ដីដែលអ្នករាល់គ្នាបានសូមដល់ខ្ញុំហើយ ខ្ញុំបានតាំងឲ្យមានស្តេចលើអ្នករាល់គ្នា។

2ពីឥឡូវនេះទៅ ស្តេចនឹងដឹកនាំអ្នករាល់គ្នា ឯខ្ញុំចាស់ហើយ សក់ខ្ញុំក៏ស្កូវ ប៉ុន្តែ មានកូនរបស់ខ្ញុំនៅជា‌មួយអ្នករាល់គ្នាដែរ ខ្ញុំបាននាំមុខអ្នករាល់គ្នាតាំងតែពីក្មេងមករហូតដល់ថ្ងៃនេះ។

3ខ្ញុំនៅទីនេះស្រាប់ ចូរធ្វើបន្ទាល់ទាស់នឹងខ្ញុំនៅចំពោះព្រះ‌យេហូវ៉ា និងនៅមុខអ្នកដែលព្រះ‌អង្គបានចាក់ប្រេងតាំងឲ្យនេះចុះ ថាតើខ្ញុំបានយកគោរបស់អ្នកណា? តើខ្ញុំបានយកលារបស់អ្នកណា? តើខ្ញុំបានបំភាន់អ្នកណា? តើខ្ញុំបានសង្កត់‌សង្កិនអ្នកណា? ឬតើខ្ញុំបានទទួលសំណូកពីដៃអ្នកណាដើម្បីបំបិទភ្នែកខ្ញុំ? សូមធ្វើបន្ទាល់ទាស់នឹងខ្ញុំចុះ ខ្ញុំនឹងសងគេវិញ»។

4ពួកគេឆ្លើយថា៖ «លោកមិនដែលបំភាន់បំបាត់ ឬសង្កត់‌សង្កិនយើងខ្ញុំឡើយ ក៏មិនដែលទទួលសំណូកពីដៃអ្នកណាដែរ»។

5រួចលោកមានប្រ‌សាសន៍ថា៖ «នៅថ្ងៃនេះ ព្រះ‌យេហូវ៉ាជាបន្ទាល់ទាស់នឹងអ្នករាល់គ្នាហើយ ឯអ្នកដែលព្រះ‌អង្គបានចាក់ប្រេងតាំង ក៏ជាទីបន្ទាល់ដែរថា អ្នករាល់គ្នាមិនបានឃើញមានអ្វីនៅក្នុងដៃខ្ញុំសោះឡើយ» នោះគេទទួលថា៖ «ព្រះ‌អង្គជាទីបន្ទាល់មែនហើយ»។

6លោកសាំយូ‌អែលមានប្រសាសន៍ទៅកាន់ប្រជាជនថា៖ «ព្រះ‌យេហូវ៉ាជាស្មរបន្ទាល់ដែលបានតែងតាំងលោកម៉ូសេ និងលោកអើរ៉ុន ហើយបាននាំបុព្វ‌បុរសអ្នករាល់គ្នាចេញពីស្រុកអេស៊ីព្ទ ។

7ដូច្នេះ ឥឡូវនេះ ចូរឈរស្ងៀម ដើម្បីឲ្យខ្ញុំបានរំឭកអ្នករាល់គ្នាបន្តិច នៅចំពោះព្រះ‌យេហូវ៉ា ពីគ្រប់ទាំងអំពើសុចរិត ដែលព្រះ‌អង្គបានធ្វើដល់អ្នករាល់គ្នា និងបុព្វ‌បុរសអ្នករាល់គ្នា។

8គឺកាលយ៉ាកុបបានចូលទៅនៅស្រុកអេស៊ីព្ទ និងបុព្វ‌បុរសរបស់អ្នករាល់គ្នាបានអំពាវ‌នាវដល់ព្រះ‌យេហូវ៉ា ព្រះ‌អង្គក៏ចាត់លោកម៉ូសេ និងលោកអើរ៉ុនឲ្យទៅនាំបុព្វ‌បុរសអ្នករាល់គ្នាចេញពីស្រុកអេស៊ីព្ទមក ព្រមទាំងឲ្យគេមានទីលំ‌នៅនៅទីនេះ។

9ប៉ុន្តែ គេបានភ្លេចព្រះ‌យេហូវ៉ាជាព្រះនៃគេចោល ព្រះ‌អង្គបានលក់គេទៅក្នុងកណ្ដាប់ដៃរបស់ស៊ី‌សេរ៉ា ជាមេ‌ទ័ពក្រុងហា‌សោរ ហើយទៅក្នុងកណ្ដាប់ដៃនៃពួកភីលី‌ស្ទីន និងទៅក្នុងកណ្ដាប់ដៃនៃស្តេចសាសន៍ម៉ូអាប់ ដែលបានមកច្បាំងនឹងគេ

10គេក៏អំពាវ‌នាវដល់ព្រះ‌យេហូវ៉ាថា "យើងខ្ញុំបានធ្វើបាបហើយ ដ្បិតយើងខ្ញុំបានបោះ‌បង់ព្រះ‌យេហូវ៉ាចោល បែរទៅគោរពប្រតិ‌បត្តិដល់ព្រះបាល និងរូបព្រះទាំងប៉ុន្មាន តែឥឡូវនេះ សូមព្រះ‌អង្គជួយឲ្យយើងខ្ញុំរួចពីកណ្ដាប់ដៃខ្មាំងសត្រូវរបស់យើងខ្ញុំចុះ នោះយើងខ្ញុំនឹងគោរពប្រតិ‌បត្តិដល់ព្រះ‌អង្គវិញ"

11ព្រះ‌យេហូវ៉ាបានចាត់យេរូ-បាល បេដាន យែបថា និងសាំយូ‌អែលមករំដោះអ្នករាល់គ្នា ឲ្យរួចពីកណ្ដាប់ដៃខ្មាំងសត្រូវរបស់អ្នករាល់គ្នា ដែលនៅជុំ‌វិញទៅ នោះអ្នករាល់គ្នាក៏បាននៅដោយសុខ‌សាន្ត‌ត្រាណ។

12តែកាលបានឃើញណា‌ហាស ជាស្តេចនៃពួកកូនចៅអាំម៉ូន មកទាស់នឹងអ្នករាល់គ្នា នោះអ្នករាល់គ្នាបានសូមដល់ខ្ញុំថា "ទេ ត្រូវឲ្យមានស្តេចសោយ‌រាជ្យលើយើងរាល់គ្នាដែរ" តែគឺព្រះ‌យេហូវ៉ា ជាព្រះនៃអ្នករាល់គ្នា ដែលជាស្តេចលើអ្នករាល់គ្នា។

13ដូច្នេះ ស្តេចនេះហើយ ដែលអ្នករាល់គ្នាបានរើស ហើយបានសូមនោះ មើល៍ ព្រះ‌យេហូវ៉ាបានតាំងស្តេចឲ្យសោយ‌រាជ្យលើអ្នករាល់គ្នាហើយ។

14ប្រសិន‌បើអ្នករាល់គ្នាកោតខ្លាច ហើយគោរពប្រតិ‌បត្តិដល់ព្រះ‌យេហូវ៉ា ព្រមទាំងស្ដាប់តាមព្រះ‌បន្ទូលរបស់ព្រះ‌អង្គ ឥតទាស់ទទឹងនឹងបញ្ញត្តិណាមួយ ទាំងខ្លួនអ្នករាល់គ្នា និងស្តេចដែលសោយ‌រាជ្យលើអ្នករាល់គ្នា នឹងដើរតាមព្រះ‌យេហូវ៉ាជាព្រះនៃអ្នក នោះបានល្អហើយ។

15ប៉ុន្តែ បើអ្នករាល់គ្នាមិនព្រមស្តាប់តាមព្រះ‌យេហូវ៉ាទេ គឺទាស់ទទឹងនឹងបញ្ញត្តិរបស់ព្រះ‌អង្គវិញ នោះព្រះ‌ហស្តនៃព្រះ‌យេហូវ៉ានឹងបានទាស់នឹងអ្នករាល់គ្នា ដូចជាបានទាស់នឹងបុព្វ‌បុរសរបស់អ្នករាល់គ្នាដែរ។

16ដូច្នេះ ចូរអ្នករាល់គ្នាឈរនឹងនៅ ចាំមើលការដ៏ធំ ដែលព្រះ‌យេហូវ៉ានឹងធ្វើនៅចំពោះភ្នែកអ្នករាល់គ្នាចុះ។

17តើនេះមិនមែនជារដូវចម្រូតស្រូវភោជ្ជ‌សាលីទេឬ? តែខ្ញុំនឹងអំពាវ‌នាវដល់ព្រះ‌យេហូវ៉ា ឲ្យព្រះ‌អង្គបានធ្វើឲ្យមានផ្គរ‌លាន់ និងទឹកភ្លៀងមក នោះអ្នករាល់គ្នានឹងដឹង ហើយឃើញជាក់ថា ទោសរបស់អ្នករាល់គ្នាជាធ្ងន់ក្រៃ‌លែង នៅព្រះ‌នេត្រព្រះ‌យេហូវ៉ា ដោយបានសូមស្តេច ឲ្យសោយ‌រាជ្យលើអ្នករាល់គ្នានេះ»។

18នោះសាំយូ‌អែលក៏អំពាវ‌នាវដល់ព្រះ‌យេហូវ៉ា ហើយព្រះ‌អង្គធ្វើឲ្យមានផ្គរ‌លាន់ និងទឹកភ្លៀងធ្លាក់ចុះមកនៅថ្ងៃនោះ ដូច្នេះ ប្រជាជនក៏កោតខ្លាចដល់ព្រះ‌យេហូវ៉ា និងសាំយូ‌អែលជាខ្លាំង។

19ប្រជាជនក៏សូមដល់សាំយូ‌អែលថា៖ «សូមឲ្យលោកមេត្តាអង្វរដល់ព្រះ‌យេហូវ៉ាជាព្រះនៃលោក ឲ្យយើងខ្ញុំផង ដើម្បីកុំឲ្យយើងខ្ញុំត្រូវស្លាប់ឡើយ ដ្បិតយើងខ្ញុំបានបន្ថែមការអាក្រក់នេះ ក្នុងអំពើបាបរបស់យើងខ្ញុំទាំងប៉ុន្មានហើយ ដោយបានសូមស្តេចសម្រាប់យើងខ្ញុំនេះ»។

20លោកសាំយូ‌អែលឆ្លើយថា៖ «កុំខ្លាចឡើយ អ្នករាល់គ្នាបានប្រព្រឹត្តការអាក្រក់ទាំងនេះមែន ប៉ុន្តែ កុំឲ្យតែបែរចេញពីព្រះ‌យេហូវ៉ាទៀត គឺត្រូវគោរពបម្រើព្រះ‌យេហូវ៉ាឲ្យអស់ពីចិត្ត។

21កុំឲ្យបែរចេញឡើយ ដ្បិតយ៉ាងនោះ អ្នករាល់គ្នានឹងវង្វេងទៅតាមការឥតអំពើ ដែលគ្មានប្រ‌យោជន៍ ជាការដែលមិនចេះជួយឲ្យរួចផង សុទ្ធតែជាការឥតអំពើទាំងអស់។

22ដ្បិតព្រះ‌យេហូវ៉ាមិនបោះ‌បង់ចោលប្រជា‌រាស្ត្រព្រះ‌អង្គឡើយ ដោយព្រោះព្រះ‌អង្គយល់ដល់ព្រះ‌នាមព្រះ‌អង្គដ៏ជាធំ ព្រោះព្រះ‌យេហូវ៉ាបានសព្វព្រះ‌ហឫ‌ទ័យនឹងយកអ្នករាល់គ្នាធ្វើជាប្រជា‌រាស្ត្ររបស់ព្រះ‌អង្គ។

23មួយទៀត ចំណែកខ្លួនខ្ញុំវិញ សូមកុំឲ្យខ្ញុំធ្វើបាបចំពោះព្រះ‌យេហូវ៉ា ដោយលែងអធិស្ឋានសម្រាប់អ្នករាល់គ្នាឡើយ គឺខ្ញុំនឹងបង្ហាត់បង្រៀនដល់អ្នករាល់គ្នា ឲ្យបានចេះប្រព្រឹត្តតាមផ្លូវល្អ ហើយទៀងត្រង់វិញ។

24សូមអ្នករាល់គ្នាបានកោតខ្លាចព្រះ‌យេហូវ៉ា ហើយគោរពប្រតិ‌បត្តិដល់ព្រះ‌អង្គ ដោយស្មោះត្រង់អស់អំពីចិត្តប៉ុណ្ណោះ ដ្បិតចូរពិចា‌រណាមើលការដ៏ធំធេង ដែលព្រះ‌អង្គបានប្រោសដល់អ្នករាល់គ្នា។

25ប៉ុន្តែ ប្រសិន‌បើអ្នករាល់គ្នាចេះតែប្រព្រឹត្តអាក្រក់ទៀត នោះអ្នករាល់គ្នា ព្រមទាំងស្តេចរបស់អ្នករាល់គ្នា នឹងត្រូវរោយ‌រៀវវិនាសទៅទាំងអស់គ្នាវិញ គ្រានោះ ស្ដេចសូលសោយ‌រាជ្យបានមួយឆ្នាំហើយ»។

← Chapter 11 Jump to: Chapter 13 →