Acts 27

Kurukh NT 2025

1একাবাকি আর এমান কোহা ডোংগানু নানারকি ইতালিনু কাঃনা খাতরী ঠিকা নান্‌জার, আবাকী পাউলুস আউর আসঘী সাংগে আরু কায়েক’ঝান জেহেলনু আটকারকা আলারিন জেহেলতা অরোত তেলেংগারঘী প্রাধান মাহাতোসঘী ক্ষেক্ষানু সোপচার চিচ্চার। আসঘী নামে মান্‌জা জুলিয়াস আউর আস অরোত রোম সম্রাটেসঘী তেলেংগারঘী প্রাধান মাহাতো রাঃচাস।

2খোঃখা এম আদ্রামুত্তীয় ঘাটতা অন্টা কোহা ডোংগানু আর্গারকি কালা লাক্কাম। একা কোহা ডোংগা এশিয়াঘী দোশরা দোশরা ঘাটনু কাঃনা খাতরী সাপড়ারকিম রাঃচা আউর ম্যাসিডোনিয়া প্রাদেশঘী থেসালোনীকিয় শাহারতা আরিষ্টার্খাস এমহায় সাংগে রাঃচাস।

3খোঃখা উল্লা এমহায় কোহা ডোংগা কালারকি সিদোননু ইজ্জা আউর জুলিয়াস পাউলুস সাংগে বেশ দাওলে চাইল বাইল নান্‌জাস আউর আসিন তাংহায় সাংগুয়ারির হেদ্দে কালারকি আরঘী সাংগে ভেট নানাগে সায় চিচ্চাস। যেনু তাংহা সাংগুয়ারির আসিন দারকারি সান্‌জগি গুটঠিন চিইয়া অংগোনার।

4আদিঘী খোঃখা আসতেক ফির কোহা ডোংগা আম্বিয়ার আউর তাকা এমহায় বিড়দো পাক্ষে রাঃচা খানে এম সাইপ্রাস দ্বীপঘী একা তারা তাকা মাল রাঃচা আঃ পাক্ষে কালা হেলেরকাম।

5খোঃখা এম কিলিকিয়া আউর পাম্ফুলিয়া প্রাদেশঘী মুন্দভারে একা সামুদার রাঃচা আদিন কাট্টারকি লুকিয়া প্রাদেশঘী মুরা শাহারনু হাজির মান্‌জেকাম।

6আবাকী তেলেংগারঘী প্রাধান মাহাতোস আসান অন্টা আলেকজান্দ্রিয়া কোহা ডোংগা এরা অংগিয়াস আদ ইতালিনু কালা লাগিয়া, খানে আস এমান আঃ কোহা ডোংগানু আর্গাচাস।

7ঢের উল্লা এমহায় কোহা ডোংগা ধীরে ধীরে কালারকি ঢের তাপলিকনু ক্লীদাস শাহারঘী হেদ্দে আর্সিয়া। মুন্দা তাকা এমান আগুয়ারারকি কালা মাল চিচ্চা, আবাকী এম তাকাঘী বিড়দো তারা ক্রীট দ্বীপঘী পান্‌জরা পান্‌জরা সালমোনী কাট্টিকাম কেরকাম।

8খোঃখা ঢের তাপলিক নানারকি সামুদারঘী কান্টা তারতিক কালারকি এম “দাওলে আড্ডা” নামে অন্টা আড্ডানু আর্সিকাম। আদিঘী হেদ্দেম রাঃচা লাসেরা শাহার।

9এন্নেনু এমহায় ঢের উল্লা কাট্টিয়া কেরা। আবাকী আর উপাস উল্লা কাট্টিয়াকি হারদাম পাইয়া উল্লা আর্সিয়া বার্চা আউর এমহায় কোহা ডোংগানু নানারকি কাঃনাহু ঢের বিপাদ মান্‌জা কেরা। ইদি খাতরী পাউলুস কোহা ডোংগান্তা আলারিন হুশিয়ার নান্না খাতরী বাঃচাস,

10“এরা, এন এরা অংগা লাগদান যে, নামহায় ই কাঃনা ডাহারেনু ঢের তাপলিক আউর ক্ষতি মানো, আদ খিলা কোহা ডোংগা আউর মালপাতিঘী মাল মানো, এন্নে কা কোহা ডোংগান্তা হোর্মা আলারঘী জীয়াঘীহু ক্ষতি মানো।”

11মুন্দা তেলেংগারঘী প্রাধান মাহাতোস পাউলুসঘী কাত্থান মাল মেনারকি কোহা ডোংগা চালাবাউুস আউর কোহা ডোংগান্তা মালিকেসঘী কাত্থান বিশুয়াস নান্‌জাস।

12আউর আঃ সামুদার ঘাটনু পাইয়া কাড়তানা লেখা আন্নে মোকা মাল রাঃচা, খানে আসতা ঢের আলার আসতেক কালাগে শালহা নান্‌জার, আর আশরা নানা লাগিয়ার যেনু ফইনিসনু আর্সারকি পাইয়া উল্লা কাড়তা অংগোনার। ফইনিস দাক্ষিনে পাছিমে আউর উত্তার পাছিম তারা মুখামুখি অন্টা দাওলে আড্ডা রাঃচা।

13খোঃখা একাবাকি ধীরে ধীরে দাক্ষিনে তাকা তাঘরা হেল্লেরা, আবাকী আর ইয়াদ নান্‌জার যে আর একাসে বেদ্দিকা রাঃচার আন্নেম মান্‌জা। ইদি খাতরী আর কোহা ডোংগাঘী নোংগোরান চোওদাচারকি ক্রীট দ্বীপঘী কান্টা তারতিক কালা হেল্লেরার।

14মুন্দা ঢের চাড়েম আঃ দ্বীপতি উরাকুলো নামে জোরসে অন্টা ঝাড় তাকা আরাম্ভ মান্‌জা আউর আঃ ঝাড় তাকা কোহা ডোংগাঘী মাইয়া বারারকি খাতরা।

15আঃ ঝাড় তাকা খাতরী এম আগুয়ারকি কালা পোলকাম, খানে একান্নু তাঘরা লাগি আন্নুম এমহায় কোহা ডোংগান ভাসারারকি কালা চিচ্চিকাম।

16খোঃখা এম কৌদা নামে অন্টা সান্নি দ্বীপঘী একা তারা তাকা মাল রাঃচা, আদিঘী অছোর অছোর কালারকি ঢের তাপলিকনু সান্নি ডোংগান এমহায় ক্ষেক্ষানু অন্দরকাম।

17আবাকী আলার ডোংগান কোহা ডোংগানু নাতকারকি চোদচার আউর পাগহা তারু কোহা ডোংগাঘী খোলান ঢের জোরসে খুটারকি উইয়ার। সুর্তী নামে সামুদারঘী চরনু কোহা ডোংগাদ আটকারা অংগি ই এল্চেনানু পাল গুটঠিন এত্তারকি কোহা ডোংগান আন্নেম তাকানু কালা চিচ্চার।

18ঝাড় তাকা এন্নেসে বারা লাগিয়া যে, এমহায় কোহা ডোংগা ঢের নুকরা হেল্লেরা, খোঃখা উল্লা আলার কোহা ডোংগান্তা অত্থা অত্থা মালপাতিন আম্মেনু লেবড়া হেল্লেরার।

19তিশরা উল্লা আর আরঘী তামহা ক্ষেক্ষা তারু কোহা ডোংগান্তী থোরে সান্‌জগিন লেবড়িয়ার চিচ্চার।

20ঢের উল্লা ধারারকি বিইড়ী বা বিনকো এন্দরাহু মাল এত্থেরা আউর বেশ্যেম ঝাড় তাঘেরতেম রাঃচা। বাছেরনাঘী লেখা হুর্মি আশরান এম আম্বিকাম চিচ্চিকাম।

21আর হোর্মার ঢের উল্লান্তী বেগার অনা মোঃখাম রাঃচার, খানে পাউলুস আরঘী মাঝিনু ইজ্জাসকি বাঃচাস, “মেনা, এংহায় কাত্থান মেনারকি ক্রীট দ্বীপনু কোহা ডোংগান উইনা নিমহায় দারকার রাঃচা। আদি হলে ইন্না ই বিপাদ আউর ক্ষতিঘী ক্ষেক্ষান্তী বাছরোর পাকেন।

22মুন্দা আক্কুন নিমহায় খাতরী এংহায় ই শালহা, নিম সাহাস নানা, কারনে নিমহায় নেখায়হু জীয়াঘী একাম ক্ষতি মাল মানো, খিলা কোহা ডোংগাঘী মানো।

23কারনে এন একা ধার্মেসঘী আল আউর নেখায় সেওয়া নান্দান, আঃ ধার্মেসঘী অরোত দুতাস কাট্টিকা মাঃখা এংহায় হেদ্দে ইজ্জাসকি বাঃচাস,

24‘পাউলুস, আম্বকে এল্চা, নিংগান কইসোরেসঘী মুন্দভারে ইজআগে লাগ্গো। আউর মেনা, নে নিংহায় সাংগে ই কোহা ডোংগানু কালা লাগনার, ধার্মেস দায়া নানারকি আরঘী হোর্মারঘী জীয়ান নিংগাগে দান নান্‌জাস।’

25ইদি খাতরী নিম কায়ানু সাহাস নানা। কারনে ধার্মেসঘী মাইয়া এংহায় ই বিশুয়াস রাঃয়ী যে, এংহায় হেদ্দে একাসে বাঃনা মান্‌জা, ঠিকা আন্নেম মানো।

26মুন্দা নাম একা দ্বীপঘী মাইয়া কালারকি খাতরোত।”

27এন্নেম এম আদ্রিয়া সামুদারঘী মাইতেক চালেরতে চালেরতে চোদদো মাঃখা হাজির মান্‌জা, হারদাম মাঝি মাঃখা আবাকী কোহা ডোংগান্তা চালাবাউুর আনদাজ নান্‌জার যে, আর একাম অন্টা ডিপ্পা আড্ডা হেদ্দে বার্চার।

28আদিঘী খোঃখা আর আসতা আম্মেঘী গাড়হান নাপারকি এরিয়ার যে, অনশো বিশ ফুট গাড়হা। ইদিঘী অংগুর খোঃখাম আর ফির নাপারকি এরিয়ার যে, আসতা আম্মে নব্বই ফুট গাড়হা।

29আবাকী আর এল্চারকি পাখনানু বাঝড়ারো বাঃআরকি কোহা ডোংগাঘী খোঃখা তারা চাইর’ঠু নোংগোর লিভড়িয়ার চিচ্চার আউর উল্লান্তা বিল্লি খাতরী বিন্তী নানা হেল্লেরার।

30আউর কোহা ডোংগান্তা চালাবাউুর ভোংগারকি কাঃনা খাতরী কোহা ডোংগাঘী আগু তারতিক নোংগোরঠুন লেভেরনা ভান নানারকি সান্নি ডোংগান সামুদারনু এত্তাচার চিচ্চার।

31ইদি খাতরী পাউলুস তেলেংগারঘী প্রাধান মাহাতোসিন আউর তেলেংগারিন বাঃচাস, “ই কোহা ডোংগা চালাবাউুর কোহা ডোংগানু মাল রাঃচার হলে নিম বাছরা পোল্লোর।”

32আবাকী তেলেংগার সান্নি ডোংগান্তা পাগহান খান্ডিয়ারকি আদিন আম্মেনু খাতরা চিচ্চার।

33পাইরি মানারকি বারা লাগি আবাকী পাউলুস হোর্মারিন থোরেটা অন্না মোখনা খাতরী গোহরারারকি বাঃচাস, “ইন্না চোদদো উল্লা মান্‌জা, নিম বেগার অনা মোঃখাম রাঃদার, এন্দরা মানো মাল মানো আদিন সোচারকি আউর আক্কুন গুটি এন্দরাহু মাল অন্ডোকার মোক্ককার।

34ইদি খাতরী এন আক্কুন নিমান অন্না মোখনা খাতরী গোহরারা লাগদান। উজ্জারকি রাঃনা খাতরী নিমহায় থোরেটা অন্না মোখনা দারকার। এরকে, নিমহায় কুক্কুন্তা অন্টা চুটটিহু মাল খাতরো।”

35ই কাত্থান বাঃআরকি পাউলুস আসমা হোচ্চাস আউর হোর্মারঘী মুন্দভারেম ধার্মেসিন ধানিয়াবাদ চিচ্চাস আউর আদিন টুকরা নানারকি আরগে মোঃখাগে চিচ্চাস।

36আবাকী হোর্মার সাহাস ক্ষাক্ষিয়ার আউর তামিম মোঃখা হেল্লেরার।

37এম হোর্মাম মিলরারকি আঃ কোহা ডোংগানু মোট দু’শো ছিয়াত্তর’ঝান রাচ্কাম।

38হোর্মার কুল উড়দারকি মোখকা খোঃখা কোহা ডোংগান্তা ভার কামতানা খাতরী আর হুর্মি গোহম গুটঠিন সামুদারনু লিভড়িয়ার চিচ্চার।

39পাইরি মান্‌জা খানে আর আঃ আড্ডান চিনহা পোল্লার। মুন্দা এন্নে অন্টা সান্নি উপসামুদার এরা অংগিয়ার এগদাঘী কান্টা বালু তারু ভার্তি রাঃচা। যদি অংগোনার, হলে আঃ কিনারাঘী মাইয়া ডোংগান চোওদোর চিওর।

40ইদি খাতরী আর কোহা ডোংগান্তা নোংগোর গুটঠিঘী পাগহান খান্ডিয়ারকি সামুদারনু আম্বিয়ার চিচ্চার আউর হালঘী খুটুচ্কা পাগহা গুটঠিন খুল্লিয়ার চিচ্চার। ইদিঘী খোঃখা তাকাঘী মুন্দভারে আর পালান লাগাবাঃচার চিচ্চার আউর কোহা ডোংগা কান্টানু আগুয়ারারকি বালুচর তারা কালা হেল্লেরা।

41মুন্দা কোহা ডোংগাঘী মুন্দভারেটা একাম অন্টা আড্ডানু কেরাকি লাগ্গিয়া আউর চাড়েম চাড়েম উক্কিয়া কেরা আউর চালেরনাঘী সাওয়াং এবসেরা কেরা। আর ঢেউঘী লাওনা খাতরী কোহা ডোংগাঘী খোঃখা তারান্তা অংশ টুকরা টুকরা মানারকি এসরা হেল্লেরা।

42আবাকী তেলেংগার জেহেলনু আটকারকা আলারিন পিটনা খাতরী পারিকল্পনা নান্‌জার, যেনু আরঘী মাঝিন্তী নেকিম অগারকি ভোংগা পোলনার।

43মুন্দা তেলেংগারঘী প্রাধান মাহাতোস পাউলুসঘী জীয়ান বাছাবাঃগে বিদ্দিকা রাঃচাস বাঃআরকি আরিন তামহায় চাহানা লেখা নালাখ নানাগে মাল চিচ্চাস। আউর ই হুকুম চিচ্চাস, নে অগা অংগোনার, আর যেনু আগুম কোহা ডোংগান্তী ডেগারকি ডিপ্পানু কাঃনার।

44আউর কোহা ডোংগানু বাছেরকা হোর্মার যেনু কাঠ বা দোশরা এন্দরাদিম ধারারকি ডিপ্পানু কাঃনার। এন্নেনু হোর্মার দাওলেসে ডিপ্পানু কেরারকি বাছরার।

← Chapter 26 Jump to: Chapter 28 →