Song of Solomon 1

Luganda (BIBU1) (BIBULIYA ENTUKUVU)

Jump to: Chapter 2 →

1Oluyimba Ssemayimba olwa Solomoni.

2Singa nno annywegedde n'okunywegera kw'akamwa ke! Kubanga okwagala kwo kulungi n'okusinga evviini.

3Emizigo gyo nga gijjudde obuloosa! Erinnya lyo liri ng'omuzigo oguyiiyiddwa; abawalajjana kyebava bakwagala.

4Nsika, nkugoberere, tudduke; kabaka annyingizza mu bisenge bye. Ka tusagambize, tusanyukire mu ggwe; tujja kugulumiza okwagala kwo okutusingira n'evviini; batuufu abo abakwagala.

5Ndi muddugavu, kyokka ndi mubalagavu, mmwe bawala ba Yeruzaalemu, nga weema z'e Kedari, ng'entimbe za Solomoni.

6Tontunuulira otyo olw'obuddugavu bwange, kubanga enjuba yanzirugaza. Batabani ba nnyabo bannyiigira, ne bampa gwa kukuuma mizabbibu, naye omuzabbibu ogwange nagugayaalirira.

7Ndagirira, ayi omwoyo gwange gwe gwagala, gy'oliisiza endiga zo, ne gy'oziwummuliza mu ttuntu, nneme kutangatanga kumpi n'amagana ga mikwano gyo.

8Oba tomanyi, ayi nalulungi mu bakazi, fuluma ogoberere ebisinde by'amagana, olundire obubuzi bwo obuluusi okumpi ne weema z'abalunzi.

9Ayi kabiite wange, onfaananira embalaasi enkazi mu bigaali bya Faraawo,

10Amatama go ganyume olw'empeta z'oku matu, n'ensingo yo olw'ebibira by'amayinja ag'omuwendo.

11Tunaakukolera empeta ez'oku matu eza zaabu, wamu n'enkwanzi eza ffeeza.

12Kabaka bwe yali agalaamiridde ku mmeeza ye, kalifuuwa wange n'ata akawoowo ke.

13Muganzi wange ambeerera ng'akasawo ka mirra akasula wakati w'amabeere gange.

14Muganzi wange ambeerera ng'ekirimba kya kinna okuva mu mizabbibu gy'e Engedi.

15Ng'oli mulungi kabiite wange! Oli mulungi wamma! Amaaso go, jjiba.

16Naawe muganzi wange, ng'oli mulungi! Mazima osikiriza. Ekitanda kyaffe kiringa akasaawe k'omuddo.

17Emirabba gy'ennyumba yaffe gya ntolookyo, eŋŋanzikizo za sipulaasi.

Jump to: Chapter 2 →