Song of Solomon 5

Luganda (BIBU1) (BIBULIYA ENTUKUVU)

← Chapter 4 Jump to: Chapter 6 →

1Nzize mu nnimiro yange, mwannyinaze, omugole wange, nkungudde mirra yange n'obuwoowo bwange; ndidde ekisassalala n'omubisi; nywedde evviini n'amata gange. Mulye, mikwano, munywe; munywe mwekkye, mmwe abaagalana.

2Neebaka, naye omutima gwange nga gutunula. Wulira muganzi wange akonkona: “Nzigulirawo, mwannyinaze, muganzi wange, ejjiba lyange, omulungi ggero. Omutwe gwange gujjudde omusulo, n'emivumbo gy'enviiri zange, ssuulwe w'ekiro.”

3Neeyambudde dda omunagiro gwange, ate nziremu nnyambale? Nanaabye dda ebigere byange, ate nziremu mbiddugaze?

4Muganzi wange yayisa omukono mu kituli ky'omunyolo, n'ankubaganya amameeme.

5Ne nsituka nzigulirewo muganzi wange; emikono gyange ne gitonnyolokosa mirra n'engalo ne zikulukusa mirra ku musa gw'omunyolo.

6Naggulirawo muganzi wange, naye muganzi wange yali agenze ng'abuzeewo. Omutima ne gunzirika, kubanga yali agenze. Nanoonya, naye saamuzuula, Nakowoola, naye teyannyanukula.

7Abakuumi bansanga nga balawuna mu kibuga; bankuba ne bampulubaza, ne bantwalako omunagiro gwange, abakuumi ba bbugwe abo.

8Ayi bawala ba Yeruzaalemu, mbalayiza, bwe muzuula muganzi wange, munaamugamba ki? Mumugambe nti: “Ndwadde okwagala.”

9Omwagalwa wo asinza ki abaagalwa abalala, ayi gwe nalulungi mu bakazi bonna? Omwagalwa wo asinza ki abaagalwa abalala, olyoke otulayize bw'otyo?

10Muganzi wange atemagana ate mumyufu, asooloobye ku nkumi.

11Omutwe gwe, zaabu omukuŋŋunte okuzaama, emivumbo gy'enviiri ze gya mayengo, middugavu nga nnamuŋŋoona.

12Amaaso ge gali ng'amayiba ku mwala gw'amazzi, aganaaziddwa n'amata, masengeke ng'amayinja ag'omuwendo.

13Amatama ge gali ng'akalimiro k'ebyakaloosa, akawunya akawoowo. Emimwa gye, malanga, gitonnyolokoka mirra.

14Emikono gye giri nga zaabu omukulungule, omusengekeddwa amayinja g'e Tarusisi. Olubuto lwe lwakolebwa mu ssanga okubikkiddwa n'obuyinja bwa saffiro.

15Amagulu ge, mpagi za maabo, ensimbe mu ntobo eza zaabu omukuŋŋunte. Endabika ye eri nga Lebanoni, mulondobe ng'entolookyo.

16Akamwa ke kawoomerevu, yenna mulungi ggero. Bw'atyo bw'ali muganzi wange, ye oyo mukwano gwange, mmwe bawala ba Yeruzaalemu.

← Chapter 4 Jump to: Chapter 6 →