Song of Solomon 7

Luganda (BIBU1) (BIBULIYA ENTUKUVU)

← Chapter 6 Jump to: Chapter 8 →

1Komawo, komawo, ayi muwala w'e Sulammi; komawo, komawo, tukutunuulire. Lwaki mutunuulira omuwala w'e Sulammi, ng'azina wakati w'ennyiriri ebbiri ez'abayimbi?

2Ebigere byo nga biwoomera mu ngatto, ayi muwala w'omukungu! Ebiseera ku kisambi kyo biri ng'amagemu, agaakolebwa omuweesi omukugu.

3Ekkundi lyo liri ng'olutiba olwawundibwa obulungi, omutabula vviini ntabule. Olubuto lwo luli ng'entuumu y'eŋŋano ebugiriziddwa ebimuli by'amalanga.

4Amabeere go abiri gali ng'obuweewo obubiri, ng'obwana bw'ennangaazi obulongo.

5Ensingo yo eri ng'omunaala ogw'essanga; amaaso go gali ng'ebidiba by'e Kesuboni ku mulyango Baati-Rabbimu. Ennyindo yo eri ng'omunaala gwa Lebanoni ogutunuulidde Damasiko.

6Omutwe gwo gukutereddeko nga Karumeli, n'enviiri z'omutwe gwo za kakobe omukwafu; emivumbo gyagyo gisikiriza kabaka.

7Ng'oli mulungi, ng'osanyusa, ayi omwagalwa, essanyu lyange!

8Oli musoobolokofu ng'olukindu; amabeere go gali ng'ebirimba byakwo.

9Nagamba nti: “Nzija kuwalampa olukindu, nkwate ku mpirivuma zaalwo.” Amabeere go gabeere ng'ebirimba by'emizabbibu, n'akawoowo k'omukka gwo, ng'amapeera, n'akamwako, ng'evviini ennungi obulala.

10Evviini ekkirire eri omwagalwa wange; ekkirire mpola mu mimwa ne ku mannyo.

11Kati muganzi wange, ndi wuwe, nze gw'ayaayaanira.

12Jjangu, muganzi wange, tulage mu nnimiro, tusule mu byalo.

13Ku makya tukeere mu nnimiro y'emizabbibu, tulabe oba emizabbibu gitojjedde, oba ebimuli byagyo bisansudde, oba amakomamawanga gamulisizza; eyo gye nnaakuweera okwagala kwange.

14Nakati avaako akawoowo; ebibala byonna ebirungi biri ku miryango gyaffe, ebiggya n'ebikadde, bye nakuterekera, ayi muganzi wange.

← Chapter 6 Jump to: Chapter 8 →