Song of Solomon 6

Luganda (BIBU1) (BIBULIYA ENTUKUVU)

← Chapter 5 Jump to: Chapter 7 →

1Muganzi wo agenze wa, ayi nalulungi mu bakazi bonna? Muganzi wo yakutte liri wa, tumukunoonyezeeko?

2Muganzi wange akkiridde mu nnimiro ye, mu kalimiro k'ebyakaloosa, alundire mu nnimiro, akuŋŋaanye amalanga.

3Muganzi wange ndi wuwe, naye wange, oyo alundira mu malanga.

4Oli mubalagavu, kabiite wange, oli nga Tiruza, oli mulungi nga Yeruzaalemu, otiisa ng'eggye eritaze.

5Nzigyako amaaso go, kubanga gantengeza. Enviiri zo ziri ng'eggana ly'embuzi nga zikkirira okuva e Gileyaadi.

6Amannyo go gali ng'eggana ly'endiga nga zambuka okuva okunaaba, buli emu ezaala nnongo, mu zo temuli efiisa mwana.

7Amatama go mu katimba, gali ng'ebiwayi by'ekkomamawanga.

8Bakaakabaka bandiba nkaaga, abasebeyi kinaana, n'abawala embeerera sibabalika,

9naye ejjiba lyange, omulungi ggero, teri amufaanana; omwana omu yekka owa nnyina, omuganzi ew'oyo eyamuzaala. Abawala baamulaba ne bamutenda omukisa; bakaakabaka n'abasebeyi ne bamutendereza.

10Ani ono avaayo nga mmambya, omubalagavu ng'omwezi atangalijja ng'enjuba atiisa ng'eggye eritaze?

11Naserengeta mu nnimiro y'ebinyeebwa, ndabe ebibaze mu biwonvu, ndabe oba emizabbibu gitojjedde, n'amakomamawanga nga gamulisizza.

12Nali sinnekkaanya, ebirowoozo byange ne binsikambulayo, ne binteeka mu bigaali by'abantu bange.

← Chapter 5 Jump to: Chapter 7 →