Song of Solomon 8

Luganda (BIBU1) (BIBULIYA ENTUKUVU)

← Chapter 7 Jump to:

1Singa nno wali mwannyinaze, eyayonka amabeere ga nnyabo. Bwe nandikusanze wabweru nandikunywegedde nga tewali n'omu ansunga.

2Nandikukutte ne nkutwala mu nnyumba ya nnyabo; eyo eyanjigiriza. Nandikuwadde evviini ey'akawoowo onywe, omubisi gw'amakomamawanga gange.

3Kkono we wansi w'omutwe gwange, ddyo we ampambaatidde.

4Bawala ba Yeruzaalemu, mbalayiza: temutaataaganya yadde okuzuukusa omwagalwa, okutuusa w'anaayagalira.

5Ani oyo ayambuka ng'ava mu ddungu nga yeesigamye muganzi we? Wansi w'omupeera we nakusisimulira; awo nnyoko we yakufunira munda, awo eyakuzaala we yalumirwa olubuto lwo.

6Nnyambala ng'akabonero ku mutima gwo, ng'akabonero ku mukono gwo; kubanga okwagala kwa maanyi ng'olumbe; obuggya tebuddirira okufaanana amagombe. Okwaka kwakwo, kwaka kwa muliro, kwaka kwa muliro ogubengeya.

7Amazzi amangi tegalizikiza kwagala n'emigga tegirikubuutikira; omuntu ne bw'aliwaayo byonna by'alina awaka, afune okwagala, alinyoomebwa bunyoomwebwa.

8Tulina mwannyinaffe omuto, tannasuna mabeere. Kiki kye tunaakolera mwannyinaffe lw'aliba atuuse okwogerezebwa?

9Bw'aba kisenge, tujja kukizimbako eminaala egya ffeeza; bw'aba omulyango, tujja kuguwagika n'embaawo ez'entolookyo.

10Ndi kisenge amabeere gange gali nga minaala; bwe ntyo bwe nfuuse mu maaso ge, ndi ng'aleeta emirembe.

11Solomoni yalina ennimiro mu Baali-Amoni; yagikwasa abakuumi: buli omu aleete sekeli za ffeeza lukumi olw'ebibala byamu.

12Ennnimiro yange ey'emizabbibu yange ku bwange; sekeli lukumi ziizo, Solomoni, n'ebikumi bibiri ez'abakuuma ebibala byamu.

13Ayi asula mu nnimiro, bannange bakutegereza; leka mpulire ku ddoboozi lyo.

14Muganzi wange, dduka; faanana ng'ennangaazi, oba ng'akaweewo akato, ku nsozi ezijjudde obuwoowo.

← Chapter 7 Jump to: