Song of Solomon 2

Luganda (BIBU1) (BIBULIYA ENTUKUVU)

← Chapter 1 Jump to: Chapter 3 →

1Nze rooza ey'e Saroni, era eddanga ery'omu biwonvu.

2Ng'eddanga mu matovu, ne kabiite wange bw'ali mu bawalajjana.

3Ng'eppeera mu miti gy'omu kibira, ne muganzi wange bw'ali mu basajja banne. Ntudde mu kisiikirize kye nga ndi musanyufu; ekibala kye kiwoomera akamwa kange.

4Annyingizza mu kisenge ky'embaga, okwagala ye bendera gy'ampaniseeko.

5Munzizeemu otwanyi n'emizabbibu emiwotose; munvubirize n'amapeera, kubanga ndwadde okwagala.

6Kkono we wansi w'omutwe gwange, ddyo we ampambaatidde.

7Bawala ba Yeruzaalemu, mbalayiza n'ennangaazi n'obusirabo obw'ettale: temutaataaganya yadde okuzuukusa omwagalwa, okutuusa w'anaayagalira.

8Mpulira eddoboozi ly'omwagalwa wange. Laba wuuyo ajja. Yeebuukiza ku nsozi, acoppacoppa ku busozi.

9Omwagala ali ng'ennangaazi, oba akaweewo. Wuuyo, ayimiridde emabega w'ekisenge kyaffe, alengera mu madirisa, alingiriza mu bumooli.

10Omwagala ayogera n'aŋŋamba nti: “Situka, muganzi wange, omulungi wange ojje.

11Laba, obw'empewo buyise, enkuba ekedde, egenze.

12Ebimuli birabise ku nsi, obudde obw'okuyimba butuuse; eddoboozi ly'ejjiba liwulikise mu nsi yaffe.

13Emikunyu gitaddeko entontogolo ezisooka, n'emizabbibu egimulisa gitadde akawoowo kaagyo. Situka, ojje, omwagalwa; mulungi wange, gira ojje.”

14Ejjiba lyange, mu mpampagama z'enjazi, mu mikwesese gy'omu nsozi, njoleka amaaso go; leka mpulire ku ddoboozi lyo; kubanga eddoboozi lyo ppoomerevu n'amaaso go mabalagavu.

15Mutukwatire ebibe, ebibe ebito ebyonoona emizabbibu, kubanga emizabbibu gyaffe gimulisa.

16Omwagalwa wange, nange ndi wuwe; alundira amagana ge mu malanga.

17Okutuusa ng'olunaku lweyezeewo, n'ebisiikirize nga bibuzeewo, komawo, omwagalwa; faanana ng'ennangaazi, oba akaweewo ku nsozi za Beteri.

← Chapter 1 Jump to: Chapter 3 →