1 Kings 2

Lugbara (E’yo Siza Alatararu Munguniri BIBLIA)

← Chapter 1 Jump to: Chapter 3 →

1Ewu Daudini ngazu drazuri ka eca ogogo, eri azi mvi erini Sulemani tia kini,

2Ma nga mu geri ’ba dria nyakua ’diyini muzurisi. ’Dini mi ovu okporu ani, mi ’ye ekile agupile,

3mi mba azita Yehova Mungu minirini ma ta, acizu geri eriniria e’yo erini azile ’diyi ma ta mbazu, azita erini pie, e’yo eti nzeza erini pie, ekile yini sile azita Musani ma aliarile, e’yo mini ma nga ca drilebaru e’yo dria mini ’yelerisi, azini pari dria mini mi ojazuria beni;

4’dini Yehova ma edre e’yo erini ’yole ma e’yosiri ani, kini, Anzi mini ka geri yini ma ta mba, acizu ma drilia e’yo adarusi asi driasi azini orindi driasi, ka’dini, eri ’yo ra, ’ba mini ngani ece rizu oguna opini Israeliniri ma dria ku.

5Mi ni indi e’yo Yoabu Zeruiya mvini ’yele ma vuri, adaru erini ’yele ’ba iri asikari ongulumuru dri cepi ’diyi driri. Ru yini Abineri Neri mvi’i azini Amasa Yeteri mvi’i. Eri o’di yi ra, ari ombaniri adazu ewu asi anzurunisi. ’Dini eri ’ba ari ombaniri enyi i opiliari ma ruaa, azini enyiriko i ma paari ma alia.

6E’yo ’disi mi ’ye ekile ondua minirile, mi fe dri erini ozoforo beri ma si va ’bile drataniri ma alia asi anzuru be ku.

7Te mi ’ba asi ndriza anzi Barizilai ’ba Gileadiarini ’diyi vu, mi fe yi ma ovu ’ba nyaka nyapi mesa mini ma tia ’diyi ma eselia; a’disiku yi ’ye ndra ma vu asi ndrizasi ’dini, ewu mani apazu adripi mini Abisalomu ma e’yosirisi.

8Te mi ne, Simei Gera mvi’i, suruti Benyaminini, engapi Bahurimuari ovu mi be, tri ndra ma otrita onzikanyarusi ewu mani muzu Mahanaimuarisi; te eri ka ndra esi va dri fuzu ma be Yoridani tia, ma so ndra oyo eri tia Yehova rusi, kini, Ma ngani mi li seisi ku.

9E’yo ’disi mi ku di e’yo ’bakokoru eri ma dria ku, a’disiku mi ovu ’ba onduaru; mi nga e’yo ecole ’yele eri vuri ni ra, te mi nga dri erini ozoforo beri ji va ’bile drataniria ari be.

10Te Daudi ko o’du a’bi erini ’diyi be tualu, sa eri aku Daudinia.

11Ewu Daudini opi nyazu Israeli, ma drilia ovu eli kali su; eri nya opi Hebironia eli aziri, azini eri nya opi Yerusalemua eli kali na drini na.

12Te Sulemani ri oguna i ati Daudiniri ma dria; opi nyaza eriniri so pa okporu tu.

13Te Adoniya Hagiti mvi eca Bati-seba Sulemani andri vu. Te oku nderi ’yo ra, Mi emu asi anzuru be ya? Eri omvi e’yo kini, E, asi anzu be.

14’Yo vini kini, Ma ovu e’yo be ’yozu mi tia. Te eri omvi tinia kini, Mi ’yo.

15Eri ’yo ra, Mi ni ra, opi nyaza ovu ndra mani, azini Israeli dria ’ba ndra mile ma vu ma ima nya opi ma’i; te opi nyaza oja i ra ovuzu ma adripiniru, a’disiku Yehova fe ndra eri dri.

16Curu’do ma matu ’ba mi vu e’yo alusi; mi nde ma ku. Eri ’yo eri tia, Mi ’yo.

17Te eri omvi e’yo eri tia, Ma matu ’ba mi vu, mi ’yo opi Sulemani tia-a’disiku eri ngani mi nde e’yosi ku-eri ma fe ma dri Abisagi ’ba Sunamuni ovuzu oku maniru.

18Te Batiseba omvi e’yo, Onyiru, ma nga e’yo mini ’yo opi tia.

19E’yo ’disi Bati-seba mu opi Sulemani vu e’yo Adoniyani ’yozu eri tia. Te opi enga dri fuzu eri be, eri avu va andri ma drilia; vutinia eri ri va oguna erini dria, eri fe yi ma eji oguna opi andri dri; te eri ri eri dri ndia.

20Te eri ’yo, Ma mi tia e’yo alu werearu a’i; mi nde ma ani ku. Te opi ’yo eri tia, Mi a’i nga, ma andri; a’disiku ma ngani mi nde ku.

21Eri ’yo ra, Onyiru mi fe Abisagi ’ba Sunamuni mi adripi Adoniya dri ovuzu oku eriniru.

22Opi Sulemani omvi e’yo eri tia kini, Mi a’i Abisagi ’ba Sunamuni Adoniya dri a’di e’yosi ya? Mi a’i eri dri opi nyaza indio A’disiku eri ovu adripi mani ma drilia okori’i, mi a’i opi nyaza eri dri kuhani Abiatari pi dri, Yoabu Zeruiya mvi pie dria.

23’Di ma vutia opi Sulemani so oyo Yehova rusi kini, Mungu ma ’ye ’dini ma vu, azini aga ’diri ra indi, Adoniya ka e’yo ’diri ’yo ’dini i ma ngulupini dri jazu ani ku.

24E’yo ’disi curu’do, ekile Yehovani ovule idrirurile, fepi mani pa sozu okporu, ma ’bapi oguna opini ma ati Daudiniri driari, eri’i suru mani ezupi ekile erini ’yolerileri, adaru Adoniyani nga dra andru.

25Opi Sulemani pe Benaya Yehoyada mvi ma ti; ’de drinia, ’ di eri ra, dra ra.

26Opi ’yo kuhani Abiatari ma tia kini, Mi mu Anatoti angu mi ngulupinia, a’disiku e’yo mini fu te dri bani mini drazu ra. Te ma ngani mi fu curu’do ku, a’disiku mi adri ndra sanduku Opi Yehovaniri oji ma ati Daudi ma drilia mi’i, azini vini mi nya candi e’yo dria ndra candi fepi ma ati dri ’diyisi indi.

27’Dini Sulemani nze Abiatarini azi kuhanini Yehova dririarisi ra, ’dini eri fe e’yo Yehovani erini ’yole ’ba Eli vile joa ’diyi ma e’yosi Siloari ma ’ye i trotro.

28E’yo kuza nderi ca Yoabu vuYoabu nde bi mira Adoniya ma vuti erini ndra Abisalomu ma vuti bile kuri ti-Yoabu nga di apa Hema Yehovani vu, eri bi pari edeta edezuri ma o’yu ra.

29Te yi ’yo opi Sulemani tia, Yoabu apa Hema Yehovania ’bo, mi ne, eri ovu pari edeta edezuri ma ageia. Sulemani nga di Benaya Yehoyada mvi ma ti pe, ’yozu kini, Mi mu, mi ’de drinia.

30Te Benaya mu ca Hema Yehovani vu, ’yo tinia, Opi ’yo ’dini, Mi efu. Te eri ’yo ra, Yo,ma nga dra doa. Benaya nga di mvi opi vu e’yoni ecezu ’yozu kini, Yoabu ’yo ’dini, eri omvi e’yo ma tia ’dini.

31Te opi nga di e’yo omvi eri tia, Mi ’ye ekile erini ’yolerile, mi fu eri, mi sa eri; ’dini mi ma nze avuari Yoabuni dale ndra aka e’yo kokoruri ma driasi, azini ’ba ma ati vile joa i ’diyi ma driasi indi.

32Te Yehovani nga ari erini omvi eri ma ngulupi dria, a’disiku eri ’de ’ba iri ovupi kililiru azini onyiru eri agapi ra’diyi ma dria, oli yi seisi, ma ati Daudini e’yoni nikokoru. ’Ba ’diyi yi Abineri Neri mvi, asikari ongulumuru Israeliniri dri cepiri, azini Amasa Yeteri mvi, asikari ongulumuru Yudaniri dri cepiri.

33’Dini yi ma arini nga mvi Yoabu ma dria, azini ori erini ma dria ’dani ’dani; te Yehovani nga asi anzuru fe Daudi pi dri, ori erini pie, jo erini pie, oguna erini pie dria ’dani ’dani.

34’Di ma vutia Benaya Yehoyadamnvi nga mu uru, ’de drinia, fu eri ra; te yi sa eri jo eri ma ngulupini roko driaria.

35Te parinia opi ’ba Benaya Yehoyada mvini asikari ongulumuru ma drilia, azini opi ’ba kuhani Zadokini Abiatari ma paria.

36Te opi pe ’ba ti Simeini omvezu, ’yo tinia, Mi si jo mini Yerusalemua, mi ovu ’ dale, mi fu mu pari azinia aluni ku.

37A’disiku o’du mini fuzu yi Kidronini zozurisi, mi ma ni kilili mi nga dra adaru; ari mini nga ovu mi ma ngulupi dria.

38Simei nga di ’yo opi tia kini, E’yo mini ’yoleri onyiru; ekile e’yo opi mani inzilerini ’yolerile, ati’bo miniri nga ’ye ’dini. ’Dini Simei ovu Yerusalemua o’du kakau.

39Eri eca ’dinile eli na ka aga ’bo,ati’ba iri Simeini yi apa Akisi Maaka mvi,opi Gatuari vu. Yi ’yo Simei tia, Mi ne, ati’ba mini ’diyi yi ovu Gatua.

40Te Simei eri enga, eri ’ba enyiriko akanya erini ngukua, eri mu Gatua Akisi vu, ati’ba erini ndazu; te Simei eri mu, eri eji ati’ba erini Gatuasi ra.

41T’e yi ’yo Sulemani tia e’yo Simeini ngazu Yerusalemuasi muzu Gatua emvizu dikari,

42Te opi pe ’ba ti Simeini omvezu, ’yo eri tia, Ma feni ndra mini oyo sozu Yehova ma rusi ’yozu mi tia okporu kini, Mi ma ni adaru o’du mini fuzu acizu pari aziniarisi, mi nga dra adaru, ’dinini ku ya? Te mi ’yo ndra ma tia, E’yo mani erileri onyiru.

43Ka’dini mi mbani oyo soza mini sole Yehova rusiri pi ma ta azita mani azile mi tiari be ku a’di e’yosi ya

44Indi vini opi ’yo Simei tia, Mi ni e’yo onzi dria ovupi mi asia mini ’yele ndra ma ati Daudi vuri; e’yo ’disi Yehovani nga e’yo mini omvi be mi ma ngulupi ma dria.

45Te asi ndrizani nga ovu opi Sulemani dria, azini oguna Daudiniri nga pa so Yehova drilia ’dani ’dani.

46’Di ma vutia opi fe azita Benaya Yehoyada mvi dri; te eri fu amve, ’de eri ma dria, fu eri, dra ra Opi nyaza so pa Sulemani ma dria okporu.

← Chapter 1 Jump to: Chapter 3 →