1 Kings 20

Lugbara (E’yo Siza Alatararu Munguniri BIBLIA)

← Chapter 19 Jump to: Chapter 21 →

1Te Beni-hadadi opi Suriaari oku asikari ongulumuru erini ’diyi dria tualu; opi kali na drini iri ’diyi ovu eri be indi, akanya pie, gari yi pie; eri mu uru Samariani acezu kuru kuru, eri ’di a’di eri be.

2Eri pe ojio ’diyi ma ti fizu aku amboru nderi alia Ahabu opi Israeliniri vu, eri ’yo eri tia, Beni-hadadi ’yo ’dini:

3Dahabu mini pi mele mini be yi mani; oku mini ’diyi pi anzi mini be, adaru ndripi tu ’diyi, yi ovu vini mani,

4Te opi Israeliniri nga omvi kini, Eri ’dini mini ’yolerile, opi mani opi amboruri la, ma afa mini, afa mani pie dria.

5Ojio nde ’diyi emu dika, ’yo kini, Beni-hadadi ’yo ’dini, Ma pe ’ba ti mi vu ada ’yozu, Mi ma fe ma dri dahabu mini pi mele mini be, oku mini ’diyi pi anzi mini be, ’dini ra ’bo;

6te di dru etu ’doni ma nga ati’ba mani ma ti pe mi vu, yi nga jo mini ma ale nda, azini jo ati’ba minini ma ale nda, te eri nga eca ’dini, yi nga afa dria ovupi onyiru mi asini lele ’diyi o’du yi ma drisi, nga mu yi be.

7’Di ma vutia, opi Israeliniri nga ’ba ’wara angu nderia ’diyi omve dria, eri ’yo kini, Ma matu ’ba emi vu, emi ne onyiru, agu ’dori e’yo nda ma ruaa ngoni ngoni ya ani; epe ’ba ti ma vu oku mani ’diyi omvezu anzi mani ’diyi be, dahabu mani pie, mele pie, te ma gani tini ku.

8Te ’ba ’wara dria, azini ’ba dria ’yo eri tia, Mi eri eri ku, mi a’i vini e’yo nderi ku indi.

9E’yo ’disi eri ’yo ojio Beni-hadadini tini pele ’diyi ma tia, Emi olu opi mani inzileri ma tia kini, Ma nga e’yo dria mini ’ba ti pezu ma zizu oko ’diyi ’ye ra; te e’yo ’dori ma econi ’yezaru ku. Ojio ’diyi nga ra, yi mu dika e’yo omvizu eri vu.

10Beni-hadadi pe ’ba ti eri vu ’yozu, Adrou ma ’ye ma vu ’dini, ma ’ye azini di, irifura angu Samariaari ka nga dri fu ’ba dria ma vuti bipi ’diyi dri ondizu dri ega alu alu ra.

11Te opi Israelini omvi e’yo kini, Emi ’yo eli tia, ’Ba afa ayaru ombani supi i ruaari ma enya i ekile ’ba afa nderi trupirini i enyalerile ku.

12Eri eca ’dini, Beni-hadadi ka e’yo ’dori eri, erini mvuria tualu opiyi be hema alia ra, eri ’yo ati’ba erini ’diyi ma tia, Emi ede emi ngonde omba tezu. ’Dini yi ede yi ngonde omba tezu aku nderi be.

13Te mi ne, nabi alu eca Ahabu opi Israeliniri vu, eri ’yo ra, Yehova ’yo ’dini, Mi ne ’ba ongulumuru ambo ’doyi dria ra ya? Mi ne, ma nga yi fe mi dria andru; te mi nga ni ma Yehova’i.

14Te Ahabu ’yo, A’dini nga e’yo ’diri ’yeni ya? Te eri ’yo, Yehova ’yo ’dini, Opi angu esele awaza ma drilia ’diyi ma karile yi nga ’yeni. ’Di ma vutia eri ’yo, A’dini nga omba e’do okoni ya? Eri omvi e’yo, Mi’i.

15Vutinia eri oku opi angu esele awaza ma drilia ’diyi ma karile tualu, kalafe yini turu iri drini kali na drini iri; yi ma vutia eri oku ’ba dria tualu, adaru anzi Israelini dria, kalafe yini alefu aziri.

16Yi fu etu agaa. Te Beni-hadadi ovu atiria ewa mvuzasi hema alia, eri’i opi be, yi ovu opi kali na drini iri eri aza kopi ’diyi.

17Opi angu esele awaza ma drilia ’diyi ma karile yi fu oko. Te Beni-hadadi pe ’ba ti ’ba orezu, yi ece eri dri kini, ’Ba fu Samariaasi ra.

18Eci ’yo, Yi ka fu asi anzu be, emi obi yi mile be; yi ka fu a’di ’dizu ti, emi obi yi mile be indi.

19’Dini opi angu esele awaza ma drilia ’diyi ma karile yi fu akuasi, ’ba ongulumuru bi yi vuti.

20Te yi dria alu alu fu ’ba alu alu; ’ba Suriaa ’diyi nga apa ra, Israeli nga yi vuti bi, te Beni-hadadi opi Suriaari apa akanya dria asikari nzupi akanya dria ’diyi be.

21Te opi Israelini fu, eri opa akanya piyi gari ombani be, eri ofu ’ba Suriaa ’diyi tu.

22Vutinia nabi esi ogogo opi Israelini vu, eri ’yo eri tia, Mi mu, mi ede e’yo mini okporu, te mi ega e’yo mini ngale ’yeleri kilili; toko ku eli vilerini e’doria opi Suriaari nga tu a’di ’dizu mi be.

23Te opi Suriaari ma ati’ba ’yo eri tia, Adrou yini adrou onini ’diyi, e’yo ’disi yi aga ama okpo ra te onyiru ama ma ’di a’di yi be angu senderua, ka ’dini adaru ama nga ovu okporu aga yi ra.

24Emi ’ye e’yo ’diri: emi onze opiyi alu alu dria pari yiniasi, te emi ’ba ’ba asikari drilia ’diyi yi ma paria;

25emi oku asikari ongulumuru ekile asikari ongulumuru odrapi ’bo ’diyile, akanya akanya ndrakari ma paria, gari gari ndrakari ma paria; te ama nga a’di ’di yi be angu senderua, te adaru okpo amani nga okpo yini aga ra. Eri eri yi ma o’duko ra, eri ’ye ’dini.

26Eri eca ’dini, eli vilerini e’doria, Beni-hadadi oku ’ba Suriaa ’diyi tualu, yi tu Afekia a’di ’dizu Israeli be.

27Anzi Israelini oku yi tualu, oku nyaka yini dria ngonde, fu a’di ’dizu yi be; yi aso hema yini yi drilia ekile ndrianzi buro copi nguluru tindi iri ’diyile, te ’ba Suriaa ’diyi ga angu nderia tre.

28Te ’ba Munguni esi ogogo eri ’yo opi sraelini tia, Yehova ’yo ’dini, ’Ba Suriaa ’diyini ’yole kini, Yehova ovu adrou onini, te adrou angu senderuni yo-risi, e’yo ’disi ma nga ’ba ongulumuru ambo ’diyi fe mi dria, te emi nga ni ma Yehova’i.

29’Ba ongulumuru aso hema yini otizaru ’ba ongulumu azini ’diyi be o’du aziri. Eri ovu ’dini, o’du azirisi yi ’ba a’di ’ dizu; te anzi Israelini ofu ’ba Suriani acipi pasi ’diyi alifu turu alu o’du alusi.

30’Ba joloko acepi ’diyi apa Afekia, yi fi aku nderi alia; te kali abi be izuru asu i ’ba alifu kali iri drini aziri acepi ’diyi ma dria. Beni-hadadi apa aku amboria, fi jo aliza alialeruri ma alia.

31Ati’ba erini ’yo eri tia, kini, Mi ne curu’do, ama eri kini, opi suru Israelini ma drilia ’diyi yi opi yiki be; ama matu ’ba mi vu, mi fe ama m asu koliba ama opilia, azini anzu imvo baa ama dria, ama ma fu opi Israeliniri vu; kani eri nga idri mini ku fukokoru ja ani.

32’Dini yi su koliba yi ma opilia, azini yi anzu imvo baa yi ma dria, yi eca opi Israeliniri vu, yi ’yo ra, Ati’bo mini Beni-hadadi kini, Ma matu ’ba mi vu, mi ku ma idriru fo. Te eri ’yo ra, Eri nga mile be ya? Eri ma adri.

33Te ’ba ’diyi yi ndre kani o’duni nga ti yi driani yani, ka’dini yi a’i e’yo nde yi ma drilebaru mbele, nga ’yo, E, mi adri Benihadadi’i. ’Di ma vutia eri ’yo, Emi mu eri eji. Te Beni-hadadi efu eri vu; eri fe eri tu i vu gari dria.

34Beni-hadadi ’yo eri tia, Ma nga aku ambo ambo ma atini opale mi ati ma dria ’diyi omvi; mi nga gboko ede mi dri Damasikia, ekile ndra ma atini of ale Samariaa ’diyile. Te Ahabu kini, Aziza amani azile ’dorisi, ma nga fe mini muzu. ’Dini eri azi aziza eri be, eri ku eri muzu.

35’Ba alu nabi ma anzi ma eselia ’yo i agyi tia e’yo Yehovanisi, Ma le mi co ma. Te agu nderi ga eri coko si.

36Te ’ba nderi ’ri tia, Mini Yehova ma ti gale sirisi, mi ne, mi ka ma ku ’bo, coti kamini nga mi ci. Eri ka eri ku ’bo, kami isu eri coti, ci di eri kai ra.

37’Di ma vutia ’ba nderi isu ’ba azini, eri ’yo, Ma le mi co ma. Agu nderi co eri ari be.

38’Dini nabi nderi nga ra, mu opini te geri tia, eri a’bu i mile bongosi ’ba kazu i nizu ku.

39Opini agaria eri oyu opi vu kini, Ati’bo mini eru mu omba ma eselia; te mi ne, asikari alu oja i kalaasi ’ba azini ejizu ma vu, eri ’yo, Mi mba ’ba ’dori ma ta; eri ka apa, idri mini nga ovu idri erini ma tia, ka’dini ku mi nga onzi dahaburu fe alu’i.

40Ati’bo minini ovuzu e’yo ’yeria ’dole ’dale, eri apa ra. Opi Israeliniri ’yo eri tia, E’yo liza mini nga ovu ’dini; mi ngulupi li e’yo mini ’bo.

41’Di ma vutia eri tru bongo i ma miliasi mbele; te opi Israeliniri ni eri ovu nabi ma azi aluri’i.

42Eri ’yo eri tia, Yehova ’yo ’dini, Mini fele ’ba mani pele dri jaza isuzurini apale mi driasirisi, e’yo ’disi idri mini nga ovu idri erini ma tia, azini ’ba mini ma idri ’ba erini ma idri ma tia.

43Opi Israeliniri mu i vile joa asi nziza be azini aoko be i asia, eri ca Samariaa.

← Chapter 19 Jump to: Chapter 21 →