1 Kings 4

Lugbara (E’yo Siza Alatararu Munguniri BIBLIA)

← Chapter 3 Jump to: Chapter 5 →

1Te opi Sulemani ovu ndra opiru Israeli ma drilia dria.

2’Ba ’wara erini yi ’diyi: Azaria Zadoki mvi, kuhanini;

3Elihorefa pi Ahiya be, Sisa ma anzi, yi ’ba waraga sipi ’diyi; Yosafati Ahiludi ma mvi, eri ’ba suru ma e’yo sipiri;

4Benaya Yehoyada mvi, eri ’ba asikari dri cepiri; Zadoki pi Abiatari be yi kuhani;

5Azaria Natani mvi, eri ’ba asikari dri cepi ’diyi ma drilia; Zabudi Natani mvi ovu kuhani azini opi ma agyi’i;

6Ahisari ovu ’ba opi vile akua ’diyi ma drilia; azini Adoniramu Abeda mvi ovu ’ba okule azia ’diyi ma drilia.

7Sulemani ovu ’ba ambo be mudri drini iri Israeli dria ma drilia, nyaka okupi opi pi dri ’ba jo erinia ’diyi be ’diyi; eri ovu ’ba ’diyi ma azi nyaka okuzu mba vusi alu alu dria eli alu ma alia.

8Ru yini ’diyi: Beni-huri angu uruleru Efiraimuaria;

9Beni-dekeri ovu Makazia, azini Saalibimua, azini Beti-semesia, azini Eloni-beti-hanania;

10Benihesedi ovu Arubotia (angu Sokoari pi erini, angu Heferiari be dria);

11Beni-abinadabu ovu angu uruleru Doriaria dria (Tafati Sulemani zi ovu oku erini);

12Baana Ahiludi mvi ovu Taanakia azini Megidoa, Beti-seani ovupi Zaretani ageiaria dria, eri ovu Yezireeli etia, engazu Beti-seania cazu Abeli-meholaa, cazu kpere aga Yokimeamu ’aa’dasi;

13Beni-geberi ovu Ramoti-gileadia (aku Yairi Manase mvini ovupi Gileadia ’diyi ovu erini, azini angu Arigobu ovupi Basaniari ovu erini, aku amboru kali azia abi tole kaliru ageinia ci, azini katala molaru kali tile opizu ’diyi be);

14Ahinadabu Ido mvi ovu Mahanaimua;

15Ahimaazi ovu Nafutalia (eri ’du Basemati Sulemani zini oku eriniru indi);

16Baana Husai mvi ovu Aseria azini Bealotia;

17Yosafati Parua mvi ovu Isakaria;

18Simei Ela mvi ovu Benyaminia;

19Geberi Uri mvi ovu angu Gileadia, angu ndra Sihoni opi ’ba Amorini pini nyale Ogi opi Basaniari beria; eri ovu ’ba amboru a’dukule angu nderi ma alia.

20Te Yuda Israeli be yi ovu karakarau ekile cinya miri tiarile; yi ovu nyaria, mvuria, ayiko ’baria indi.

21Te Sulemani ovu opiru suruti dria drilia, engazu Yi Araa cazu angu Filisitinia, azini cazu kpere Misiri ma lokiria; yi eji afa awa’diforu Sulemani dri, yi nga azi eri dri ewu erini ovuzu idrirurisi dria.

22Nyaka Sulemanini o’du alu alu vusi ’diyi yi ’dipi: anyafura inikiniruri abaka ambo kekeleru kali na, azini anyafura azini kekele kali azia,

23ti nguza oso be ’diyi mudri, ti ocele nyamukoa ’diyi kali iri, kabilo; turu alu, eba pie, o’borojo pie, yere pie, a’u a’buza ’diyi be.

24A’disiku eri ovu opiru angu dria ma alia engazu Yi Ara tia ’aa’dosiria, engazu Tifisaa cazu kpere Gazaa, adaru opi dria ovupi angu dria ma alia engazu Yi tia ’aa ’dosiria ’diyi ovu eri ma palaa; angu dria eri ma ageia kuru kuru ’diyi ma alia omba yo.

25Te ewu Sulemaninisi dria, Yuda pi Israeli be yi ovu e’yere uri kokoru, ’ba dria alu aluni ovuzu zabibu pati ini ma etia, azini elio pati iniri ma etiarisi, engazu Dania cazu kpere Beerisebaa.

26Te Sulemani ovu jo ale aliza be alifu kali su akanya gari erini sepi ’diyi dri, azini asikari erini nzupi akanya dria ’diyi ovu alifu mudri drini iri.

27’Ba ’wara nde ’diyi yi oku nyaka opi Sulemani pi dri, ’ba dria emupi mesa opi Sulemaniniri ma tia ’diyi be, yi alu alu mba yini vusi; yi a’ini afa azinini ecezu aluni ku.

28Yi eji vini anya indi, azini ase a’wi akanya pi dri, akanya nzupi ongusi ’diyi be, yi eji eri pari peleria, ekile e’yoni ovule azizaru yi tiarile.

29Te Mungu fe Sulemani dri ondua, azini e’yo vaza aga ra, azini asisile ambo eyikiza be ekile cinya ovupi miri tiarile,

30’dini ondua Sulemanini aga ondua ’ba dria ovupi angu etuni efurialeruria ’diyi ma ondua ra, aga vini ondua Misirini dria ra.

31Te eri ovu onduaru aga ’ba dria ra, aga Etani ’ba Eziranini ra, azini aga ondua Maholi ma anzipiniri ra, yi Hemani pi, Kalikoli pie, Darida pie; ru erini ku suru ovupi eri ma ageia ’diyia dria.

32E’yo o’beza erini o’bele ’diyi yi ovu alifu na; ongo erini ovu alifu drini towi.

33Eri olu e’yo patini, engazu pati i mario ovupi Lebanoniarisi cazu ibibi engapi oni abi ruaa ’diyi ma eseliari vu; eri ’yo indi e’yo anyapa pini, aria pie, afa dria acipi agatisi nyakua ’diyi pie, e’bi pie.

34’Ba e’yo kuza ondua erinirini eripi ’diyi engazu suruti dria ma alia, azini engazu opi dria nyakua ’diyi ve, yi eca ondua Sulemanini erizu.

← Chapter 3 Jump to: Chapter 5 →