1 Kings 8 — Lugbara (E’yo Siza Alatararu Munguniri BIBLIA)

1’Di ma vutia Sulemani oku ’ba ’wara mbaza Israelini ’diyi pi, ’ba ambo suruti vusi ’diyi pie dria, ’ba opiru ’ba yi ati pi vile jo ma alia anzi Israelini ma eselia ’diyi pie, opi Sulemani vu Yerusalemua, sanduku aziza Yehovaniri ofuzu aku Daudini Zioniarisi ejizu uru.

5Te opi Sulemani tualu ’ba ongulumuru ’ba Israelini yi okupi eri vu ’diyi be dria, yi ovu tualu eri be sanduku drilia kabilo olizu ti be, ’bani ecole yi ma kalafe lale ku yini ovule o’birurisi ’diyi.

6Te kuhani yi ofi sanduku aziza Yehovaniri i ma paria, pari e’yo ecezani jo ma aliaria, pari alatararu turia, adaru kerubi ma opile ma etia.

7A’disiku kerubi aja yi ma opile pari sandukuniri ma dria, te kerubi yi a’bu sanduku pi ma dri ci, kali erini eri ’duzu ’diyi be.

8Te kali ’diyi yi ovu izu ’dipi, ’dini ’ba ovupi pari alatararu tu pari e’yo ecezaniri ma driliariari eco kali nde ’diyi ma drile nezaru; te ’ba amve ’diyi econi yi nezaru ku; te yi ovu ’dale ecazu troa andru.

9Afa azini sanduku nde ma alia yo, pe kiri oni iri Musani o’bale alenia Horebu pari Yehovani aziza azizu anzi Israelini ’diyi ma tia yini efuria angu Misiriarisia ’diyi.

10Eri eca ’dini, kuhani ka efu pari alatararuriasi ’bo, iriti ga jo Yehovani ma alia tre,

11’dini iriti ndesi kuhani econi pa sozu azi ngazu ku; te diza Yehovani erini gale jo Yehovani ma alia trerisi.

12Te Sulemani ’yo kini, Yehova ’yo ra kini, i nga adri ini inicici idururi ma alia.

13Te ’di, ma si mi dri jo mini adrizu aleniari ’bo ada, pari mini ngazu rizu ’dani ’daniri.

14Vutinia opi oja i mile, eri fe asi ndriza ’ba ongulumuru Israelini ’diyi dri dria; te ’ba ongulumuru Israelini ’diyi nga pa so urulesi ra.

15Eri ’yo ra, Yehova Mungu Israeliniri ma ovu inzizaru, eri ’yo ndra i ma tisi ma ati Daudi ma tia, te o’du andrurisi eri ma dri fe e’yo nde ma ’ye i ini ’yolerile, kini,

16Engazu o’du mani ’ba mani Israeli ofuzu Misiriasi risi, ma peni aku amboru aluni suruti dria Israelini ’diyi ma eselia ma dri jo sizu, ma runi adrizu alenia aniri ku; te ma pe mira Daudini ovuzu opiru ’ba mani Israelini ma drilia.

17Eri ovu ndra ma ati Daudi ma asia jo sizu Yehova Mungu Israeliniri ma rusi,

18Te Yehova ’yo ma ati Daudi ma tia, Te eri ovu ndra mi asia jo sizu ru manisi ra ’bo, azini mi ’ye onyiru e’yo egazu ’dinile mi asia;

19te ti, mi ngani jo nderi si mi’ini ku, te mvi mini efupi mi aliari nga jo nde si ma rusini.

20Curu’do Yehova fe aziza erini ndra azileri ma eca ’yeke erini ’yolerile; te ma enga pari ma ati Daudiniria, rizu oguŋa Israeliniri ma dria, ekile Yehovani azilerile, ma si jo Yehova Mungu Israeliniri ma rusi ’bo.

21’Dale ma ede pari sandukuni, aziza Yehovani azile a’bi amani be ewu erini yi ofuzu angu Misiriasirini ovuzu aleniari.

22Sulemani eri so pa pari edeta edezu Yehovaniri ma drilia, ’ba ongulumuru Israelini dria ma milia, eri aja dri erini uru ’bua;

23eri ’yo, Yehova la, Mungu Israelini, Mungu azini mileni yo, kani ’bua uru, kani nyakua ele. Mi mba aziza mini ma ta yiki ale berisi ati’ba mini acipi mi drilia yi ma asi driasi ’diyi vu;

24mi mba e’yo mini ’yole ndra ati’bo mini ma ati Daudi ma tiari ma ta eri vu; adaru mi ’yo ndra mi tisi, mi fe mi drisi e’yo nderi ma ’ye i tro tro, ekile erini ovule andrurile.

25Ka’dini curu’do Yehova Mungu Israeliniri la, mi mba e’yo mini azile ati’bo mini ma ati Daudi vuri ma ta, ’yozu, ’Ba mini ngani ece ma milia rizu eguna opini Israeliniri ma dria ku, anzi mini ka acita yini ma ta mba, acizu ma drilia ekile mini acile ma drilia ’borile.

26E’yo’disi curu’do Mungu Israeliniri la, ma matu ’ba mi vu, mi fe e’yo mini ’yole ndra ati’bo mini ma ati Daudi ma tiari ma eca adaru ekile mini ’yolerile.

27Te Munguni nga adri nyakua ada ya? Mi ne, ’bu pi ’bu ’buniri be yi funi dri mini ovuzu alenia ku; ka’dini jo mani sileri nga eco mi dri ngoni ngoni ya!

28Te mi a’i zita ati’bo minini zileri, matu ’baza erini be, Yehova Mungu mani la, wuta mani wule mi vuri erizu, zita ati’bo minini zile mi drilia andruri be;

29mile mini ma ovu zizaru mgbo jo ’dori vu etusi, inisi dria, adaru pari nde mini e’yoni ’yole kini, Ru mani nga ovu alenia ’dale-ri vu, mi ma eri zita ati’bo minini zile erini mile ’baria pari ’dori vuri.

30Mi eri matu ’baza ati’bo minini, ’ba mini Israelini indi, yi ka zita zi mile yini ’baria pari ’dori vu; adaru, mi eri ’bua pari mini adrizuri ma alia, te mini eriria mi wu e’yo onzini indi fo!

31’Ba ka onzi ’ye ’ba i jo ejeliari vu, yi ka fe eri ma so oyo ci i ma dri wazu, eri ka emu oyo sozu pari edeta edezuri drilia jo ’dori ma alia,

32etu nderisi mi eri ’bua, mi ’ye, mi li ati’ba mini ma e’yo, ’ba onziri ndezu e’yo lizasi, geri erini omvizu be eri ma ngulupi dria, azini ’ba kililiri e’dazu ’ba kililiru, eri ofezu onyi erini vusi.

33’Ba mini Israeli ka nga ovu ’bazaru va juru ma palaa yini e’yo onzi ’yele mi vurisi, yi ka nga yi oja dika mi vu, ka nga ru mini e’da, zizu azini matu ’bazu jo ’dori ma alia;

34ka’dini mi eri ’bua, mi wu e’yo onzi ’ba mini Israelini, mi omvi yi dika angu mini ndra fele a’bi yini driria.

35’Bu ka ozoo ombe ci, ka fe ku yini e’yo onzi ’yele mi vurisi, yi ka nga mi zi mile yini ’bazu pari ’dori vu, ka nga ru mini e’da, e’yo onzi yini ku, ewu mini yi dri candi fezunsi,

36ka’dini mi eri ’bua, mi wu e’yo onzi ati’ba minini, ’ba mini Israelini, etu mini yi imbazu, yi dri geri onyiru ecezu yi ma aci alenia aniria; mi pe ozoo ti angu mini fele ’ba mini dri awuafaruri ma dria.

37Liki amboru ka ’de angua, kani azo muani, kani oli aciru afani ’wizuri, kani afani mazu ozoosiri, kani ombi, kani o’doa; juru yini ka yi ace angu aku yiniria; dra ngoni ngori kani azo ngoni ngori ka ovu ra;

38’ba alu, kani ’ba mini Israelini dria, ’ba alu alu yini dra onzi ovupi i ma ngulupi ma asiari niria, yini zita ngoni ngori ziria, kani matu ngoni ngori ’baria, yini dri yini ajaria jo ’dori vu;

39ka’dini mi eri ’bua pari mini adrizuria, mi wu onzi, mi ’ye, mi ofe ’ba dria alu alu mini yi ma asi nile ’diyi acita yini vusi (a’disiku mi’i, mi a’dule ni anzi ’bani dria ma asi ra);

40’dini yi ma ru mi o’du dria yini adrizu angu mini fele a’bi amani driri ma alia ’diyisi.

41Indi vini ani’bo ovupi; ba mini Israelini kuri ma eyo: eri ka nga emu engazu angu ma ru mi ma e’yosi

42(a’disiku yi nga ru mini ambo kuzaruri eri ra, dri mini okporuri pi, wu ejuza mini be), eri ka nga emu ra zita zizu mile erini ’bazu jo ’dori vu,

43mi eri ’bua pari mini adrizuria, mi ’ye e’yo dria ekile ani’bo nderini wule mi vurile; suru wudrikuruni dria ma ni ru mini ani, ma ru mi ekile ’ba mini Israelini mi rulerile beni, ’dini yi ma ni kini, omve jo mani sile ’dori mi rusi.

44’Ba mini ka nga fu omba ’bazu juru yini be, geri ngoni ngori mini yi ti pezurisi, yi ka nga zi Yehova tia mile yini ’bazu aku mini peleri vu, jo mani sile mi rusiri vu indi,

45mi eri zita yini ’bua matu ’baza yini be, mi fe e’yo yini ma so pa kililiru ani.

46Yi ka e’yo onzi ’ye mi vu (te ’ba aluni yo e’yo onzi ’yepi kuri), aoko ka mi nya yi ruaa mini ani yi fezu juru ma dria, ’dini juru yi nga yi obi jizu ati’baru angu yinia, kani ziri kani ogogo;

47te angu ’bani yi ejizu ovuzu ati’baruria, yi ka nga ega yi asia yi ojazu dika, matu ’bazu mi vu engazu angu ’ba yi ejipi ovuzu ati’baru ’diyiniria, ’yozu kini, Ama eza ra, ama ’ye pirimasi, ama ’ye onzi;

48yi ka nga emvi mi vu asi driasi yi ma orindi driasi indi angu juru yi ejipi ovuzu ati’baru ’diyiniria, yi ka nga zita zi mi vu mile yini ’bazu yi vile angu mini fele a’bi yini driri vu, azini aku mini pele ’bori vu, azini jo mani sile mi rusiri vu indi;

49ka’dini mi eri ’bua pari mini adrizuri ma alia, mi eri zita yini mate ’baza yini be, mi fe e’yo yini ma so pa kililiru ani,

50mi wu e’yo onzi ’ba mini e’yo onzi ’yepi mi vu ’bo ’diyini, ezata dria yini ezale mi vu ’diyi be; mi fe yi ma isu asi ndriza ’ba yi jipi ovuzu ati’baru ’diyi ma milia, ’dini yi ma nga asi ndriza ’ba yi vu ani

51(a’disiku yi ovu ’ba mini azini mi ma yilaru, mini ofule Misiriasi yi onzezu oka aya dizuri ma aci aliasi ’diyi).

52Mi zi mile mini matu ’baza ati’bo minirini vu, matu ’ba mini Israelini ’diyini ’baleri vu indi, zita yini erizu etu dria yini wuzu mi vurisi.

53Opi Yehova la, mi ope ndra yi ndu suruti wudrikuruni dria ma eseliasi ovuzu yila miniru, ekile mini ’yole Musa ati’bo mini ma tisi, mini a’bi amani of uri a Misiriasirile.

54Eri eca ’dini, Sulemani ka zita ’diri de zizu Yehova tia matu ’baza be ’bo, eri enga pari erini kumuti, osizu dri ajazu ’bua pari edeta edezu Yehovaniri ma driliarisi ra,

55eri Inga pa so uru, eri nga asi ndriza a’i i’ba ongulumuru Israelini ma dria dria, ’yozu o’duko urusi kini,

56Yehova ma ovu inzizaru, erini lava liza fele ’ba erini Israeli dri ekile e’yo dria ndra erini azilerilerisi; aziza onyiru dria erini ’yole ndra Musa ma tisi ’diyi ma eselia, e’yo aluni eceni ’yekokoru ku.

57Yehova Mungu amani ma ovu ama be ekile erini ovule ndra a’bi amani berile; eri ma nga ama vusi ku, ma ku ama pirini ku indi;

58eri ma oja asi amani eri vu ani, acizu geri erini dria ma alia beni, azita erini ma ta mbazu, e’yo aziza erini pie, e’yo liza erini pie, erini ndra azile ama a’bipi vu ’diyi.

59Azini e’yo mani ’yole, mani ani matu ’bazu Yehova vu ’diyi, ma ovu ogogo Yehova Mungu amani vu etusi inisi dria, ’dini eri ma fe ati’bo erini pi ma e’yo ma so pa kililiru, ’ba erini Israelini ’diyi be, ekile ecole onyiru etu vusi etu vusirile;

60’dini suruti wudrikuruni dria ma ni ani Yehovani Mungu’i; azini aluni yo.

61E’yo ’disi emi fe asi emini ma ovu kililiru Yehova Mungu amani vu, acizu e’yo erini azile ’diyi ma alia, azita erini ma ta mbazu ekile o’du andrurisirile.

62Te opi pi tualu Israeli be dria, yi ofe edeta Yehova ma drilia.

63Te Sulemani fe ti alifu kali iri drini iri, azini kabilo alifu turu alu drini kali iri, edeta asi anzuruniriru Yehova dri. ’Dini opi tualu anzi dria Israelini ’diyi be yi fe jo nderi Yehova dri.

64Etu nderisi opi ’ba irii jo Yehovani driliari ma esele agaduari alatararu; a’disiku pari nderia ’daa eri fe edeta vezaru pi, edeta edele anyafurasiri pie, oso edeta asi anzuru ’diyiniri pie; eri ’ye ’dini, a’disiku pari molaru edeta edezu Yehova driliarini ovule wererisi, econi edeta vezaru pi, edeta anyafurasiri pie, oso edeta asi anzuru ’diyiniri pie dria o’bazu drinia ku.

65’Dini ewu nderisi Sulemani pi Israeli be dria yi ede omu amboru Yehova Mungu amani ma da o’du aziri, dika aziri, adaru o’du mudri drini su, ongulumu kakau ’diyi angu dri dria, engazu pari ’bani adrizu fizu Hamatiaria cazu kpere Yi Ara Misirinia.

66O’du arorisi eri pe ’ba ’diyi ma ti mvizu; yi fe asi ndriza opi dri, yi mvi hema yinia nyona be, asi yini ovu ayikosi e’yo onyiru dria Yehovani ecele Daudi ati’bo erini pi dri ’ba erini Israeli be.