Amos 1

Lugbara (E’yo Siza Alatararu Munguniri BIBLIA)

Jump to: Chapter 2 →

1E’yo Amosini ’yole ’diyi, eri’i ’ba kabilo ocepi Tekoaa ’diyi ma eseliari; eri ndre e’yo ’diyi e’yo Israelinisi, ewu Uzia opi Yudaarinisi, azini ewu Yeroboamu Yoasi mvi opi Israelinirinisi, ndre eri eli iri de nga oyakia oyani angu ku.

2Eri nga ’yo: Yehovani nga ono Zionia, nga o’duko mi fe efuzu Yerusalemuasi; angu nyamukoru ’ba kabilo ocepi ’diyini nga ovu candisi, oni Karimeli ma dri mbiliri nga onyu ra.

3Yehova ’yo ’dini: Ezata Damasikini na, adani su ’diyi ma e’yosi ma ngani panga yini ma ti ja kalaa ’de ku; a’disiku yini Gileadini cole afa anya cozu ayaru ’diyisirisi.

4Te ma nga aci ma ti pe Hazaeli vile joa, eri nga jo Beni-hadadini onyiru tu ’diyi ve kieikiei ra.

5Ma nga vini katala Damasiki ma tile opizuri onyo ra, ma nga ’ba adripi e’bu Aveniari ma dri ja ra, ’ba kali opiniri ’dupi jo Edeniari be tualu; azini ’ba nga ’ba Suriaa ’diyi ji ati’baru kpere Kiria, Yehova ’yo ra.

6Yehova ’yo ’dini: Ezata Gazani na, adani su ’diyi ma e’yosi ma ngani panga yini ma ti ja kalaa ’de ku; yini suru jile pi ati’baru yi fezu Edomu dririsi,

7Te ma nga aci ti pe abi kaliru Gazaaria, eri nga jo erini onyiru tu ’diyi ve kieikiei ra.

8Ma nga vini ’ba adripi Asidodia ’diyi ma dri ja ra, ’ba kali opiniri ’dupi Asikeloniari be tualu; vutinia ma nga ma dri oja Ekironi ma dria; ’ba Filisitiaa acepi jolokoru ’diyi nga dri ja ra, Opi Yehova ’yo ra.

9Yehova’yo’dini: Ezata Turoni na, adani su ’diyi ma e’yosi ma ngani panga yini ma ti ja kalaa ’de ku;yini suru jile pi ati’baru, yi fezu Edomu dririsi, yini aziza adripiniri ma e’yo egale kurisi.

10Te ma nga aci ti pe abi kaliru Turoari ma dria, eri nga jo yini onyiru tu ’diyi ve kieikiei ra.

11Yehova ’yo ’dini: Ezata Edomuni na, adani su ’diyi ma e’yosi ma ngani panga yini ma ti ja kalaa ’de ku; a’disiku erini adripi ini ma vuti drole seisirisi, erini yiki ’bele dria i vu rerisi, aokoni eri olile zurisi, erini adra ini ma ta mbale i asia ’danirisi.

12Te ma nga aci ma ti pe Temani ma dria, eri nga jo Boziraa onyiru tu ’diyi ve kieikiei ra,

13Yehova ’yo ’dini: Ezata anzi Amonini na, adani su ’diyi ma e’yosi ma ngani panga yini ma ti ja kalaa ’de ku; yini oku oporovuru ovupi Gileadia ’diyi asile elisirisi, yi ma ’ba angu yini walaru ani.

14Te ma nga aci edu abi kaliru Rabaari ma dria, eri nga jo yini onyiru tu ’diyi ve kieikiei, etu ’bani alicere o’bezu ombaarisi, etu olirikoni angu lizu okposirisi;

15opi yini nga mu ati’boru angu azinia, eri’i tualu ’ba erini opiru ’diyi be, Yehova ’yo ra.

Jump to: Chapter 2 →