Amos 7

Lugbara (E’yo Siza Alatararu Munguniri BIBLIA)

← Chapter 6 Jump to: Chapter 8 →

1Opi Yehova nga afa ece ma dri ’dini: te mi ndre, eri ede ombi o’du afa duza vilerini e’dozu idizurisi; te mi ndre, afa duza nderi eri ovu duza angu voza opini ma vutiari’i.

2Eri nga eca ’dini, ombi ka ase idipi angu dri driari nya de ’bo, ma nga di ’yo, Opi Yehova la, mi wu ezata ra fo, ma matu ’ba mi vu! Yakoboni nga pa so ngoni ya? Erini ovule wererurisi!

3Yehova nga asi omvi e’yo ’dirisi; Eri ngani ovu ’dini ku, Yehova ’yo ra.

4Opi Yehova nga afa ece ma dri ’dini: te mi ndre, Opi Yehova omve aci abala ’bazu, aci nde mvu miri aliru dria ra, ’ye te angu a’wiru ve dria indi.

5Ma nga di ’yo, Opi Yehova la, mi ku ja, ma matu ’ba mi vu! Yakoboni nga pa so ngoni ya? Erini ovule wererurisi!

6Yehova nga asi omvi e’yo ’dirisi; E’yo ’diri ngani ovu ku indi, Yehova ’yo ra.

7Eri nga afa ece ma dri ’dini te mi ndre, Opi so pa abi sile baka afa ma kilili o’bizurisiri ma ageia’i baka nde afa o’bizuri eri ma dria indi.

8Yehova nga di ’yo ma tia, Amosi, mi a’du ndre ya? Ma nga di ’yo, Baka afa ma kilili o’bizuri’i. Dika Opi nga vini ’yo, Mi ndre, ma nga baka afa o’bizuri ’ba ’ba mani Israelini ma eselia; ma ngani yi aga dika ku;

9angu uruleru Isakani ’diyi nga ovu andruru, azini pari alatararu Israelini ’diyi nga ovu ezazaru; te ma nga enga sei be ori’ba Yeroboamuni ma ruaa.

10Etu ’dasi Amazia kuhani Beteliari nga ’ba ti pe Yeroboamu opi Israeliniri vu kini, Amosi otu e’yo ’diri omba ’bazu mi be suru ’ba Israelini ma eselia; angu ’dori econi e’yo dria erini ’yole ’diyi a’izaru ku.

11A’disiku Amosi ’yo ’dini kini, Yeroboamuni nga dra seisi ra, azini yi nga Israelini bi ati’baru ofuzu angu yiniarisi ra adaru.;

12Amazia nga vini ’yo Amosi ma tia, Mi ’ba e’yo ndreza ndrepiriru mi’i, mi mu, mi nzu angu Yudaa ’dale, mi nya nyaka ’dale, mi ondri e’yo’dale;

13te mi ma ondri e’yo azini Betelia dika ku, erini ovule pari alatararu opini, azini erini ovule jo opinirisi.

14Amosi nga e’yo omvi, nga ’yo Amazia tia kini, Ma ovuni ndra nabini ku, ma ovuni vini nabi ma ’mva ku indi; te ma ovu ndra ’ba kabilo ocepiri, ’ba elio pati ma rua edepiri indi;

15te Yehova ’du ndra ma mani kabilo ma vuti biria, Yehova nga di ’yo ma tia kini, Mi mu, mi olu e’yo suru mani Israelini ma tia.

16Ka’dini mi eri e’yo Yehovani curu’do. Mi kini, Ma ondri e’yo azini Israeli ma ruaa ku, ma fe e’yo mini ma ’de ori’ba Isakani ma dria ku.

17E’yo ’disi Yehova ’yo ’dini kini: Oku mini nga ovu oku awuouru aku amboru ma alia, agupianzi mini nga odra seisi ezoanzi mini pie, te ’ba yi nga angu mini awa bakasi; te mi ma ngulupini nga dra angu alata kokoruria, azini ’ba nga ’ba Israelini bi ati’baru ofuzu angu yiniasi adadaru.

← Chapter 6 Jump to: Chapter 8 →