Amos 5

Lugbara (E’yo Siza Alatararu Munguniri BIBLIA)

← Chapter 4 Jump to: Chapter 6 →

1Emi eri e’yo mani e’dole ’yole emi dria imvo ongole ’dori, emi jo Israelini la:

2Aliria Israeliniri e’de va ’bo, eri ngani enga dika ku; ’be eri va nyaku erinia, ’ba eri engapi uru dikani yo.

3Te Opi Yehova ’yo ’dini: Aku amboru ndra ’bani oku efuzu alifu aluri, yi nga ace turu alu a’dule, azini ndra efuzu turu aluri nga ace kiri ’ba mudri ori’ba Israelini dri a’dule.

4Te Yehova ’yo ani ’dini ori’ba Israelini ma tia: Emi ma nda ma ra, emi nga ovu idriru ani;

5te emi ma nda Betelini ku, emi ma fi Giligalia ku, emi ma aga kpere Beeri-sebaa ku; a’disiku yi nga Giligalini ji ati’baru ada, Betelini nga eca tokoru.

6Emi ma nda Yehova, emi nga ovu idriru ani, eri kazu fuzu okporu ekile acile jo Yusufuni ma alia ku, eri vezu teketeke, azini ’ba ngapi aci inyupi Beteliani yo,

7emi e’yo liza kililiru ojapi oji drazaruri, onyi o’bepi va nyakua ’diyi la!

8Emi ma nda eri’i ’bi’bio aziri Nunumeru ’bapi Aseti be, endrilendri dratani ojapi o’bitiro, diza etuni bipi inicici inisi, yi mirini omvepi osupi nyaku driari’i, eri ma ru Yehova’i;

9eri’i dri jata rugburu ejipi ’ba okpo be kirigbili ’diyi ma driari,’dinile dri jatani nga di ecea pari okporu vu ani.

10Yi ngu agu egapi yi ma dria kalitiliari onzi, yi ngu agu e’yo ’yopi kililiruri onzi tu.

11’Dinile emini pa otule ’ba alioru ma driarisi azini emini anya erini opale musororurisi, emi si jo oni edele kililiru ’diyisi ra ’bo, te emi ngani adri alenia ku; emi sa amvu zabibuni onyiru turi ra ’bo, te emi ngani patiefi ma su efupi aleniari mvu ku.

12A’disiku ma ni e’yo onzi emini ovu karakarau si yari ra, azini ezata emini ovu amboru ngopi yari raemi, ’ba onyi be inzapi, afa feza ti razuri a’ipi, ’ba alioru ’diyi ndezu kalitilia, yi ma isu ani e’yo liza kililiru ku beni ’diyi la!

13E’yo ’disi ewu ’dinile ’disi ’ba e’yo vapiri nga adri ciri; ewu ndeni ovule onzirisi.

14Emi ma nda onyi’i, te e’yo onzi’i ku, emi ma ovu idriru ani; ka’dini Yehova, Mungu asikari ongulumuruniri nga ovu emi be, ekile emini ’yolerile.

15Emi ngu e’yo onzi onzi tu, emi le e’yo onyiru avasi aga ra, emi ma fe e’yo lizu kililiruri ma so pa kalitilia ci; kani Yehova, Mungu asikari ongulumuruniri nga di ovu asi ndriza be ’ba Yusufuni acepi jolokoru ’diyi vu ra yani.

16E’yo ’disi Yehova, Mungu asikari ongulumuruniri, Opi’i, ’yo ’dini: Lulu gazani nga ovu gboko walaru ’diyi ma alia dria; yi nga wu, Eyawaye! Eyawaye! geri dria ma alia ra. Yi nga ’ba amvu ’yapi ’diyi omve awu wuzu, yi nga ’ba imvo ongo olupi onduasi ’diyi omve lulu gazu;

17amvu zabibuni dria ma alia lulu gazani nga ovu indi, mani ngale agale emi eseliarisi, Yehova ’yo ra.

18Candi emi ’ba o’du Yehovani ma mile gapi ’diyi dri! Emi o’du Yehovani ma mile ga a’disi ya? 0’du nde eri inini, ovuni etuni ku;

19ekile agu apapi kami ma urisiri ka nga dri fu nguru dubaru be; kani ka fi joa erini i dri atiria abi ruaa, urini nga eri gani.

200’du Yehovani ngani ovu inini, etu kokoru ku ya? Adaru eri bini iniciciru, diza alenia aluni yori’i ku ya?

21Ma ngu omu emini onzi tu, yi di ma ’bo, ma ovuni ayikosi okuza emini inzitaru ’diyisi aluni ku.

22Ada, emi ka edeta vezaru fe ma dri, edeta anyafurasi ’diyi be ti, ma ngani yi a’i ku; ma ngani vini edeta asi anzuruni emini edele anyapa emini osoru ’diyisi ’diyi ma e’yo ega aluni ku indi.

23Emi ma nga ongo ngoza emini ma o’duko be ma vurisi raj a’disiku ma ngani o’di emini ma awu eri ku.

24Te e’yo liza kililiruri ma ra ekile yini ralerile, onyi ma ra yi raza amborule.

25Emi eji ndra ma dri edeta afa feza be eli kali su angu roko driaria ra ya, emi ori’ba Israelini la?

26Adaru, emi ’du ndra Sikuti opi eminiri pie, Kiuni wura toko emini ’diyi be, ’di Mungu emini ma ’bi’bio, emini edele emi drisi ’diyi;

27e’yo ’disi ma nga fe emi ma mu ati’baru Damasikia ’aa’dasi, Yehova ’yo ra, ru erini Mungu asikari ongulumuruniri’i.

← Chapter 4 Jump to: Chapter 6 →