Amos 2

Lugbara (E’yo Siza Alatararu Munguniri BIBLIA)

← Chapter 1 Jump to: Chapter 3 →

1Yehova ’yo ’dini: Ezata Moabuni na, adani au ’diyi ma e’yosi ma ngani panga yini ma ti ja kalaa ’de ku; erini opi Edomuari ma fala vele acisi ofuzu ofuta emverurisi.

2Te ma nga aci ma ti pe Moabu ma dria, eri nga jo Keriotia onyiru tu ’diyi ve kieikiei, Moabuni nga dra pi otrea ma alia, ’bani oyuria okposi, guka vuza be indi;

3ma nga ’ba e’yo lipiri ma dri ja aleniasi ra, ma nga vini ’ba opiru erini ’diyi ofu eri be dria dria, Yehova ’yo ra.

4Yehova ’yo ’dini: Ezata Yudani na, adani su ’diyi ma e’yosi ma ngani panga yini ma ti ja kalaa ’de ku; yini azita Yehovani gale sirisi, yini azita erini sizaru ’diyi ’yele kurisi, te e’yo yini inzoru ’diyi fe yi aba aba, inzo nde yi ma atipini vutini bile ’diyi.

5Te ma nga aci ti pe Yuda ma dria, eri nga jo Yerusalemua onyiru tu ’diyi ve kieikiei ra.

6Yehova ’yo ’dini: Ezata Israelini na, adani su ’diyi ma e’yosi ma ngani panga yini ma ti la kalaa ’de ku; a’disiku yini ’ba onyi be ’diyi jele dahabusirisi, azini yini ’ba alioru jele enyiriko paarisi indirisi-

7’ba nde yi asi ’bapi irifura alio emve ’diyi ma driari ma dria ’diyi, yi ’ba e’yere ’diyi ma geri ojapi ’diyi; te agu alu pi ati be yi fi lazu zamva alusi, ru mani alatararuri ezazu;

8yi ola yi va pari edeta edezu ’diyi dria ma ageia bongo yini ’dule toboru ’diyi ma dria; azini jo Mungu yinirini ma alia yi adri ewa yini lile ’ba dria pangaruri mvu’i.

9Te di ma ofu ndra ’ba Amorini yi ma drilia ma’i, ’ba nde ’diyi ma oco ovu ndra ekile pati mariorurile, okpo yini ovu mira pati kumaranirile; te ti, ma ja eli ’yaza erini ururi ma dri, ola erini vari be indi.

10Ma ofu ndra vini emi, emi ejizu engazu angu Misiria, ma ce ndra emi dri eli kali su roko dria, emi ma nya angu ’ba Amorini beni.

11Ma fe emi anzipi ma azi ’diyi enga ovuzu nabiru, ma fe karile emini ma azi ’diyi enga ovuzu ’ba Naziriru. Eri ovuni ’dini ku, emi anzi Israelini la? Yehova ’yo ra.

12Te emi fe ’ba Naziriru ’diyini ewa mvuzu, emi azi vini nabi tia kini, Emi ma olu e’yo nabiru ku.

13Emi ndre, ma nga emi omi pari emini ma alia, ekile gari anya be alenia trerini omilerile.

14’Ba ovupi ongu be tu ’diyi ma ongu apazuri nga avi ra, ’ba okporu kirigbili ’diyi ngani vini yi ma okpo idri ku, azini vini ’ba omba ’dipi okposi ’diyi ngani yi pa ku indi;

15’ba adripi osu ’dupi i ma dria ’diyi ngani pa so ku, ’ba nzupi pasi ongu be tu ’diyi ngani vini yi pa ku, ’ba tupi akanya dria ’diyi ngani vini yi pa ku indi;

16’ba uri kokoru ’ba omba ’dipi okposi ’diyi ma eseliari nga apa pililiru o’du nde ’dasi, Yehova ’yo ra.

← Chapter 1 Jump to: Chapter 3 →