Amos 4

Lugbara (E’yo Siza Alatararu Munguniri BIBLIA)

← Chapter 3 Jump to: Chapter 5 →

1Emi eri e’yo ’diri, emi ti Basani ovupi oni Samariari ma dria, ’ba alioru inzapi, ’ba afa kokoru ’diyi ma dri otupi, ’yopi opi emini ma tia kini, Emi cii, ama ma mvu! ’diyi.

2Opi Yehova so oyo alatara ini ma e’yosi ci ’yozu kini, Emi ndre, o’duni nga eca emi dria, o’du ’bani ngazu emi sezu amve iwusiri, emi ’ba jolokoru acepi ’diyi yi nga emi se iwu e’binirisi ra.

3Emi nga fu pari abi kaliru ruaa yi asupi va hu hu ’diyi ma talaasi, emi alu aluni muzu kililiru emi drilia; emi nga emi o’be kpere Harimonia, Yehova ’yo ra. Israelini cota Yehovani oazu kuri

4Emi emu Betelia, ezata ezazu; Giligalia, ezata ezuzu tre; emi ma eji edeta emini o’biti vusi, esele mudri emini ’diyi be o’du na vusi indi;

5azini emi ede edeta awa’diforu i afa ovupi akufi berisi, emi ma azi afa feza fezu avasi, emi eku, ’yoni; a’disiku erru ’si le ’dini ’diri, emi anzi Israelini la! Opi Yehova ’yo ra.

6Ma fe emi dri si alaru emini afa nyale kurisi, aku vusi dria, ma fe vini abiri pari vusi dria ’bo, te ti, emi ojani nga emi ma vu ku, Yehova ’yo ra.

7Ma oga vini ozoo emi dri ’bo, isu de mba ace na o’du nyakani kazurini ecazu; ma fe vini ozooni ’dizu aku amboru alua, te aku amboru aziniria ma feni ozoo ma ’di aluni ku; amvu azinia ozoo ’di drinia ra, te amvu ozooni ’ dizu drinia kuri ’wi ra

8e’yo ’disi aku amboru iri kani na ere yi aku azinia yi mvuzu, te yi isuni fudri ku; te ti, emi ojani nga emi ma vu ku, Yehova ’yo ra.

9Ma co emi oli aciru afani ’wizuri pisi, ozoo afani mazuri be ’bo; amvu emini karakarau o’doa nya teketeke ra, amvu zabibuni pie, eliopati emini pie, pati mizeituni pie indi; te ti, emi ojani nga emi ma vu aluni ku, Yehova ’yo ra.

10Ma pe azo muani ekile Misiriarileri ma ti emi eselia; karile emini ma ofu seisi ’bo; ma ’du akanya emini ’bo; ma fe pari emini ovuzuri ma aji onzi ma ngu cazu kpere emi omvulea ’bo; te ti, emi ojani nga emi ma vu aluni ku,

11Ma ogu emi azini ’diyi ma dri ’bo, ekile ndra Munguni Sodomu pi ogule va Gomora berile, emi ovu ekile ejati ’bani nzele aci ma aliarile; te ti, emi ojani nga emi ma vu ku, Yehova ’yo ra.

12E’yo ’dirisi ma nga mi ’ye ’dini, Israeli la! Azini mani ngale mi ’yele ’dinirisi, mi ma ede mi ngonde dri fuzu Mungu miniri be, Israeli la!

13Emi ndre, eri’i oni amboru edepi, oli ’bapi, e’yo ovupi ’ba ma asisile ma aliari ecepi eri dri; o’biti ojapi iniciciru, acipi nyaku ma pari uruleru ’diyi ma driari-eeri ma ru Yehova, Mungu asikari ongulumuruniri’i.

← Chapter 3 Jump to: Chapter 5 →