Amos 6

Lugbara (E’yo Siza Alatararu Munguniri BIBLIA)

← Chapter 5 Jump to: Chapter 7 →

1Candi emi ’ba ava lipi Zionia ’diyi dri, emi ovupi candi kokoru oni Samariaari ma dria ’diyi, ’ba ru kuza engapi suru ambo suru ndu ndu ma driliaria, ’ba Israelinini ecazu vunia ’diyi!

2Emi aga Kalinea, emi lu; engazu ’dale emi mu Hamati amboruria; ’di ma vutia emi si cazu Gatu ’ba Filisitiaa ’diyiniria. Yi aga suru ’diyi onyisi ra ya? Angu yini ma kalati aga angu emini ma kalati ra ya?

3Emi’i, emi o’du onziri ’bapi ovu emi vu ziri ’diyi, emi ’ba adripi fepi ’ba ’yepi okposi eganasi ’diyi ma kitini ecazu emi vu ogogo ’diyi la!

4Emi ’ba emi olapi va gbolo edele ewasisi ’diyi ma dria, emi ajapi gbolo emini ma dria, adripi kabiloanzi kabilo o’biru ’diyi ma eselia ’diyi pi nyapi kojaanzi licoa ’diyi be ’diyi;

5emi ’ba adripi ongo aparakani ngopi o’disi ’diyi, emi ’ba adripi o’di edepi emi dri ndu ndu ekile Daudinirile ’diyi;

6emi ’ba ewa mvupi imvusi, azini yi ma rua efipi odu onyi be agapi rarisi ’diyi; te yi ovuni candisi inzata ’bani Yusufuni inzazuri ma e’yosi ku!

7E’yo ’disi ’ba nga yi ji curu’do ati’baru, ’ba jile ati’baru ’diyi ma eselia; ’ba mira yi ajapi ’dinile ’diyi ma aparakani nga asi ra.

8Opi Yehova so oyo eri ma ngulupisi, (Yehova ’yo ra, Mungu asikari ongulumuruniri’i); Onyi Yakoboni afu ’bazuri di ma ’bo, ma ngu jo erini onyiru ’diyi onzi; e’yo ’disi ma nga aku amboru nderi fe ari’ba dri, afa alenia ’diyi pie dria,

9Te eri nga eca ’dini, ’ba ka ace mudri jo alu ma alia, yi nga odra ra.

10Agu azini ma adropi ngapi eri ma avu vepiri ka fala e’du ejizu joarisi amve, eri ka nga ’yo ’ba ovupi jo ma esele alialeruri ma tia kini, ’Ba azini ace nga emi vu indi ya? eri nga e’yoni omvi, Yo; eri nga di ’yo tinia, Mi adri ciri, a’disiku ama econi Yehova ma ru ’yozaru ku.

11A’disiku mi ndre, Yehova fe azita, azini yi nga jo amboruri asu erini i oluzu hu hurisi, azini yi nga jo wereri asu erini i asizu tratrarisi.

12Akanya yi nga nzu oni kataru ma dria ra ya? ’Ba yi nga angu ’ya e’bu tini selerisi ’daa ra ya? Emini ani e’yo liza kililiruri ojale oji drazale, azini efi ’yaza onyini ojale enyata okarulerisi-

13emi’i ’ba ovupi ayikosi afa tokonisi, ’yopi kini, Ama isuni o’yu ama dri okpo ama ngulupinisi ku ya? ’diyi.

14A’disiku emi ndre, ma nga suru enga emi ruaa, emi jo Israelini Mungu asikari runiri ’yo ra; te yi nga emi inza engazu pari ’bani fizu Hamatiaria cazu kpere yi raza Arabaaria.

← Chapter 5 Jump to: Chapter 7 →