Amos 8

Lugbara (E’yo Siza Alatararu Munguniri BIBLIA)

← Chapter 7 Jump to: Chapter 9 →

1Opi Yehova nga afa ece ma dri ’dini: te mi ndre, afazu, alenia pati efi kumararu kapi ayisi ’diyi.

2Te eri ’yo ra, Amosi, mi a’du ndre ya? Ma ’yo ra, Afazuni, alenia pati efi kumararu kapi ayisi ’diyi. Yehova nga di ’yo ma tia, Ku ma ra ada, ’ba mani Israelini ma e’yo de i ’bo; ma ngani yi ku e’yo kokoru dika ku.

3Etu ’dasi ongo ngole hekalua a ’diyi nga i oja awuongoru, Opi Yehova ’yo ra; te avu ’bani nga ovu karakarau; pari dria ’bani yi o’bezuria yi nga ovu ciri.

4Emi eri e’yo ’diri, emi ’ba lepi ’ba afa kokoru okipi ’diyi, emi ’ba lepi ’ba alioru ma ’de i nyakuarisi ra ’diyi la!

5Emi ’yo kini, Mba o’diruni nga i de a’dungare ya ka, ama eco ani ondu ozizaru beni? Azini sabatoni nga lele a’dungare i ya, ama eco anya ofuzu ondizaru ani ra, abaka afa o’bizuri ’bazu wereru, te sekelini ’bazu amboru, ’yezu lokirisi afa o’biza inzorurisi;

6ama eco ani ’ba alioru jezaru dahabusi, ’ba afa kokoru enyiriko paarisi, azini ama eco ani anya drileti fe je indi?

7Yehova so oyo onyi Yakobonisi; ci kini: Adada, ’yeta yini ma tavi ngani avi ma dri aluni ku.

8Angu ngani ya e’yo ’diri ma urisi ku ya? ’Ba dria ovupi alenia ’diyi ngani ovu candisi ku ya? Adaru, eri nga enga pi ekile Yi Ara ndeni tilerile, eri nga ombu ombu, eri nga mvi i paria dika ekile Yi Ara Misiriarile.

9Eri nga ecea o’du dasi, Opi Yehova ’yo ra, Ma nga fe etu ma ’de etu aga piririsi, ma nga fe anguni bi iniciciru angu emve be ’dani.

10Te ma nga omu emini oja ovuzu awu wuzuru, azini ma nga ongo emini oja dria imvo ongoru; ma nga fe ’ba dria ma su koliba yi ma opilia, ma nga fe ’ba dria ma drini ovuzu tuaru indi; ma nga eri ’ba ekile awu ’bani wule mva ilipiliruri ma e’yosirile, te asizaniri nga ovu ekile o’du candi okangalirunirile.

11Mi ndre, o’duni nga eca ra, Opi Yehova ’yo ra, o’du ndesi ma nga liki ma ti pe angua indi; ngani ovu abiri nyakani ovule yorisi ku, kani yi aviconi yi mvuzani ovule yorisi ku, te abiri nderi lu ’bani e’yo Yehovani erizu kurisiri’i.

12Azini ’ba nga aci saaru engazu miri azinia cazu miri aziniria, azini engazu angu andraleruria cazu kpere angu etuni efuzuria; ’ba nga onzu ’dale ’dole, e’yo Yehovani ndruzu, te yi ngani eri isu ku.

13O’du ’dasi ezoanzi aliria ndrizaru ’diyi pi nga ovu okpo kokoru yi avicosi karile be.

14’Ba nde oyo sopi ezata Samariaarisi, ’yopi kini, Ekile Mungu minini ovule idrirurile, Dani la, ’diyi; azini kini, Ekile geri Beerisebanirini ovule idrirurile; ’ba ’dini ’diyi nga o’de va, yi ngani enga dika aluni ku.

← Chapter 7 Jump to: Chapter 9 →