Amos 9

Lugbara (E’yo Siza Alatararu Munguniri BIBLIA)

← Chapter 8 Jump to:

1Ma ndre Opini pa soria pari edeta edezuri ma kalatia, eri nga di ’yo: Mi co pati idiaferu ’diyi ma dri, pari ’bani fizuri ma oya ani, mi ma onyo yi nyingiriki ’ba nde dria alu alu ma dria; azini ma nga yi ma joloko ’acepi ’diyi oli seisi; yi ma alu ngani apa ku, te yi ma eselia aluni ngani pa ku,

2Yi ka tro ’bile ga va kpere ’bile drataniria ti, ’dale ma drini yi e’du ra; azini yi ka tro tu kpere ’bua uru ti, engazu ’dale ma nga yi osi va.

3Yi ka tro yi zi Karimeli ma dri mbiliria ti, ma nga yi nda ra, ma nga yi onze ’daarisi ra; te yi ka tro yi zi ma milia miri ma etia ti, ma nga uri amboru azi ’dale ci, eri nga yi oga ra.

4Te yi ka tro mu ati’baru ari’ba ’yini ma drilia ti, ma nga sei azi ’dale ci, eri nga ’di yi ofu ra; te ma nga ma mile ’ba yi vu e’yo onzisi, te e’yo onyirusi ku.

5A’disiku Opi Yehova asikari i ongulumuroniri, eri adri angu elo ra, angu aka ani yiru, azini ’ba dria ovupi alenia ’diyi nga ovu ani candisi; angu nde nga enga pi ekile Yi Ara ndeni tilerile, eri nga emvi i ma paria dika, Yi Ara Misiriarile;

6eri’i eri adri jo aliza erini si ’bua, eri ’ba ’buni pa sozu wariru nyaku dria; eri’i yi mirini omvepi osupi nyaku a’wiru ma driariruni Yehova’i.

7Emi ovuni ma dri ekile anzi ’ba Etiopiaa ’diyinile ku ya, emi anzi Israelini la, Yehova ’yo ra. Ma ejini ndra suru Israelini engazu angu Misiriaa, azini ’ba Filisitiaa ’diyi engazu angu Kafitoria, azini ’ba Suriaa ’diyi engazu Kiria ku ya?

8Mi ndre, Opi Yehova nde ma mile ovu suru e’yo ezapi nderi ma dria, azini ma nga eri dri ja nyaku driarisi ra; pe lu ma ngani ori’ba Yakoboni ma dri ja teketeke ku’i, Yehova ’yo ra.

9Te mi ndre, ma nga e’yoni azi, ma nga suru Israelini oya suru dria ma eselia ’bani anya yale keikeisirile, te anyaefi adaru, ka ovu were ti, ngani e’de va talanisi nyakuaku.

10’Ba ezata ezapi dria suru mani ma eselia nga odra seisi, ’yopi kini, E’yo onzi ngani ama vuti bi ama isuzu ku, ngani vini dri fu ama be ku, ’diyi.

11O’du ’dasi ma nga bere Daudini i asupi vari edre uru, ma nga pari erini yi olupi hu hu ’diyi eci dika, ma nga pari yi asupi va ’diyi edre ra, ma nga eri si uru ekile o’du drio ’diyi ma aliarile;

12yi ma nya ’ba Edomua ecepi jolokoru ’diyi ma angu ani, azini suru dria yi omvepi ru manisi’diyi, Yehova ngapi e’yo ’diri ’yepi rari ’yoni.

13Mi ndre, o’duni nga eca ra, Yehova ’yo ra, ’ba amvu ’yapiri nga ca kpere ’ba anya lopiri vu, azini ’ba zabibu ma patiefi tupiri nga ca kpere ’ba ori ripiri vu; patiefi ma su alupi turi nga ti oni ambo ma ruaa, oni were ’diyi dria nga aka menemeneru,

14Ma nga suru mani Israelini ejile ati’baruri omvi dika, te yi nga aku ’bani ezale ’diyi si dika, yi nga adri aleniani; yi nga amvu zabibuni sa ra, yi nga mvi patiefi ma su engapi aleniari mvuni; yi nga amvu ’ya ra, yi nga vini nyaka kapi aleniari nyani.

15Azini ma nga yi esi angu yinia, ’ba ngani yi onze dika engazu angu mani fele yi dri’boriarisi ku, Yehova Mungu miniri ’yoni.

← Chapter 8 Jump to: